ވިއްސާރައާ އެކު ބަލިތައް ފެތުރުން އިތުރުވެދާނެތީ ސަމާލުވާން އެދިއްޖެ

ރާއްޖެއަށް މިހާރު ކުރަމުންދާ ވިއްސާރައިގެ ސަބަބުން އާންމު ބަލިތައް ފެތުރުމުގެ ފުރުސަތު ބޮޑުވުމުން އެކަމަށް ސަމާލުވެ ދުރާލާ ފިޔަވަޅު އެޅުމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ) އިން އިލްތިމާސްކޮށްފި އެވެ.

އެޗްޕީއޭއިން ނެރުނު ބަޔާނެއްގައި ބުނީ، ވިއްސާރަ އާ އެކު ފެންބޮޑުވުމާއި ޖަންކްޝަންތައް ފުރި، ނަޖިސް ބޭރުވުމުންނާއި ވިއްސާރައިގެ ފެން ތަންތަނުގައި ހަރުލާފައި ހުރުމުގެ ސަބަބުން ބަލިތައް ފެތުރުން އިތުރުވުމުގެ ފުރުސަތު އެބައޮތް ކަމަށެވެ.

މިގޮތުން، ބޭރަށް ހިންގުމާއި ހޮޑުލުމާއި ބުޅަލާއި މީދަލުގެ ނަޖިހުން ފެތުރޭ ބަލިތަކާއި ފަންގަސްގެ ސަބަބުން ނޭވާލާ ނިޒާމަށް ޖެހޭ ބަލިތަކާއި މަދިރީގެ ސަބަބުން ފެތުރޭ ބަލިތައް ކަމަށްވާ ޑެންގޫ، ޗިކަންގުންޔާ އަދި ޒިކާ ފަދަ ބަލިތައް ކުރިއަށް އޮތް ތަނުގައި އިތުރުވުމުގެ ފުރުސަތު އެބައޮތް ކަމަށް އެޗްޕީއޭ އިން ބުންޏެވެ.

އެޗްޕީއޭ ސަމާލުވާން އިލްތިމާސް ކޮށްފައިވާ ކަންކަން:

- ވިއްސާރައިގެ ސަބަބުން އުފެދިފައިވާ ފެންގަނޑުތަކަށް ނޭރުން

- ފެންގަނޑަށް އެރެން ޖެހޭނަމަ ވޯޓާޕްރޫފް ތަކެތި ބޭނުންކުރުން

- ފެން ހިންދުމާއި ސާފުކުރުމުގައި ހަރަކާތްތެރިވާ ފަރާތްތަކުގެ އެޗްޕީއޭގެ ގައިޑްލައިންތަކަށް އަމަލުކުރުން

- ގިނަގިނައިން ސައިބޯނި ލައިގެން އަތް ދޮވުން

- ބުއިމާއި ކެއްކުމަށް ވާރޭފެން ކައްކައިގެން ބޭނުންކުރުން، ނުވަތަ ފުޅީގައި ބަންދުކުރި ފެން ބޭނުންކުރުން

- ގެއާއި ގޯތިތެރޭގައި ފެން ހެދޭ ގޮތަށް ހުރި ތަންތަން ހުސްކޮށް ފެން ނޭޅޭ ގޮތް ހެދުން

އެޗްޕީއޭއިން ވަނީ މިފަދަ އެއްވެސް ބައްޔެއްގެ އަލާމާތެއް ފެނިއްޖެނަމަ ލަސްނުކޮށް ސިއްހީ ލަފާ ހޯދުމަށް ވެސް އިލްތިމާސްކޮށްފަ އެވެ.