މަޖީދިއްޔާ ސްކޫލްގެ ޕްރިންސިޕަލާއި ޑެޕިއުޓީ ވަކިކުރަން އެދި ޕެޓިޝަނެއް!

މަޖީދިއްޔާ ސުކޫލުގެ ޕްރިންސިޕަލް އައިޝަތު މުހައްމަދު ސޯލިހާއި ޑެޕިއުޓީ ޕްރިންސިޕަލް ޝީޒާ އަލީ ވަކިކުރަން އެދި އެ ސުކޫލުގެ ބެލެނިވެރިންތަކެއް ޕެޓިޝަނެއް ހުށަހަޅައިފި އެވެ.

ރާއްޖޭގެ އެންމެ ގިނަ ދުވަސްވީ ސްކޫލްގެ ދެ ފަންފަޅީގައި ކިޔަވާ ގިނަ އަދަދެއްގެ ކުދިންގެ ބެލެނިވެރިން ސޮއިކޮށް، އެޑިއުކޭޝަން މިނިސްޓަރު އިސްމާއިލް ޝަފީއުއަށް ފޮނުވި ޕެޓިޝަންގައި 35 ނުކުތާއެއް ވަނީ ފާހަގަކޮށްފަ އެވެ.

އޭގެ ތެރޭގައި ކުދިންގެ މެދުގައި ތަފާތުކުރުން ގެންގުޅުމާއި ކިޔެވުމާއި އިތުރު ހަރަކާތްތައް ހިންގުމަށް އެކަށީގެންވާ ސަމާލުކަމާއި ވަގުތު ނުދިނުމުގެ ސަބަބުން ކަންކަން ބޮއްސުންލައިގެން ދިޔުމާއި ވަކި ފިކުރެއްގެ ޓީޗަރުންނަށް ކުރިއެރުމާއި ފުރުސަތުތައް ތަނަވަސް ކޮށްދިނުމާއި ކޮރަޕްޝަނުގެ ތުހުމަތުތައް ވެސް ހިމެނެ އެވެ.

ޕެޓިޝަނުގައި ފާހަގަކޮށްފައިވާ ބައެއް ކަންކަން:

- ޕްރިންސިޕަލާއި ޑެޕިއުޓީ ޕްރިންސިޕަލް ގިނަ ކަންކަމުގައި ހިޔާލު ތަފާތުވުމުގެ ސަބަބުން ޓީޗަރުންގެ މަސައްކަތާއި ކުދިންގެ ކިޔެވުމަށް ބުރޫއެރުން.

- ކިޔެވުމުގެ އިތުރުން ކުދިންނަށް ތަފާތު ތަޖުރިބާތައް ކުރުމަށް އެކި ދިމަދިމާލުން ހޯދަންޖެހޭ ފުރުސަތުތައް ހޯދައިނުދިނުން.

- ބެލެނިވެރިންނާ މެނޭޖުމަންޓާ އޮތް ގުޅުން ހީނަރުވުން.

- ޕްރިންސިޕަލްގެ މަގާމުގައި 8 އަހަރު ހޭދަކުރެއްވިއިރު ހެޔޮ ބަދަލެއް އައިސްފައި ނުވުން.

- ޕްރިންސިޕަލްގެ ފަރާތުން ޓީޗަރުންނަށް ސިޔާސީ ގޮތުން ފިއްތުންތައް ފިއްތުން.

- މެނޭޖުމަންޓުގެ ނާގާބިލް ކަމުން ގާބިލް އެތައް ޓީޗަރުން ސްކޫލް ދޫކޮށް ދިއުން.

- ސްކޫލުގެ 30 ކްލާސްރޫމް އޭސީ ކުރަން ބެލެނިވެރިއަކު ހަދިޔާކުރި އޭސީ ޔުނިޓުތަކަށް ވީނުވީއެއް ނޭނގުން.

ޕެޓިޝަންގައިވާ ބުނެފައިވާ ގޮތުން މެނޭޖުމަންޓުން ކަން ކުރަމުންދާ ނާއިންސާފު އަމަލުތަކުގެ ސަބަބުން ކުދިންގެ ކިޔެވުމަށް އޭގެ ނޭދެވޭ އަސަރުކޮށް، މަޖީދިއްޔާ ސްކޫލްގެ ފަހުރުވެރި ނަން ދަނީ ހަޑިވަމުންނެވެ.