ހަތީބުން ތަމްރީން ކުރުމުގެ ދެވަނަ ޕްރޮގްރާމް 209 މީހުން ފުރިހަމަކޮށްފި

ޒުވާން ހަތީބުން ތަމްރީނު ކުރުމުގެ ޕްރޮގްރާމުގެ ދެވަނަ ބެޗުގައި 209 ހަތީބުން ތަމްރީނުކޮށް، އެކަމުގެ ލިޔުން ހަވާލުކޮށްފި އެވެ.

އިސްލާމީ މަރުކަޒުގައި މިއަދުހަވީރު ބޭއްވި ޖަލްސާގައި ހަތީބުންނަށް ލިޔުން ހަވާލުކޮށްދެއްވީ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި އިސްލާމީ މަރުކަޒުގެ އިސް އިމާމު މުހައްމަދު ލަތީފާއި ފަތުވާ މަޖިލީހުގެ މެމްބަރު އިލްޔާސް ހުސެއިން އަދި ސްޓޭޓް މިނިސްޓަރު ޑރ. މޫސާ އަންވަރެވެ.

އެ ރަސްމިއްޔާތުގައި މިނިސްޓަރު ވިދާޅުވީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން ކުރިއަށް ގެންދާ އެ ޕްރޮގްރާމްގައި މިހާތަނަށް 300 އަށް ވުރެ ޒުވާނުން ޕްރޮގްރާމް ފުރިހަމަކޮށްފައިވާ ކަމަށެވެ. އެކަމުން އެނގެނީ އެ ޕްރޮގްރާމަކީ މުޖުތަމައަށް ބޭނުންތެރި ޕްރޮގްރާމެއް ކަމަށް މިނިސްޓަރު ވިދާޅުވި އެވެ.

ސަރުކާރުން އަމާޒު ހިފާފައި ހުރީ މި ދައުރުގެ ތެރޭގައި 1000 ހަތީބުން ތަމްރީނު ކުރުމަށެވެ. ޝަމީމް ވިދާޅުވީ އެ އަމާޒަށް ވާސިލުވެވޭނެ ކަމުގެ ފުރިހަމަ ޔަގީންކަން އެބަ އޮތް ކަަމަށެވެ. އަދި ވަރަށް އަވަހަށް އެ ޕްރޮގްރާމުގެ ތިން ވަނަ ބެޗު ފަށާނެ ކަމަށް އޭނާ ވިދާޅުވި އެވެ.

މި ޕްރޮގްރާމުގެ ދަށުން ހުތުބާ ކިޔުމާއި އިމާމުވެ ނަމާދުކުރުން ފަދަ ދީނީ އެހެން ތަމްރީނުތައް ވެސް ދެ އެވެ. ސްކޫލު ނިމިފައިވާ ޒުވާނުންނާއި ގްރޭޑް 10 އާއި ގްރޭޑް 11 އަދި ގްރޭޑް 12 ގައި އުޅޭ ދަރިވަރުން ވެސް ދަނީ މި ޕްރޮގްރާމުގައި ބައިވެރިވަމުންނެވެ.