ސެކަންޑްރީން ފާސްކުރުވަން، ޕްރައިމަރީ ގްރޭޑްތަކުން ފާސްވާ ކުދިން އިތުރުކުރަންޖެހޭ: މިނިސްޓަރު

އޯލެވެލް އަދި އޭލެވެލް އިމްތިހާނުން ފާސްވާ ކުދިންގެ އަދަދު އިތުރުކުރުމަށް، ޕްރައިމަރީ ގްރޭޑްތަކުން ފާސްވާ ކުދިންގެ ނިސްބަތް އިތުރުކުރަން ޖެހޭ ކަމަށް އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.

ދަރުބާރުގޭގައި ބޭއްވި މަތީ އަރުތަވެރިންގެ އިނާމު ދިނުމުގެ ރަސްމިއްޔާތު 2022-2023 ގައި މިނިސްޓަރު ވިދާޅުވީ އިލްމީ ގޮތުން ރާއްޖެއަށް ތަރައްގީ ގެނައުމަށް ވަރަށް ގިނަ މަސައްކަތްކުރަންޖެހޭ ކަމަށެވެ.

ޕްރައިމަރީ ގްރޭޑްތަކުން ފާސްވާ ކުދިންގެ އަދަދު ވަރަށް ބޮޑަށް ދަށްވެފައިވާކަން ފާހަގަކުރައްވައި މިނިސްޓަރު ވިދާޅުވީ ގްރޭޑް 3 ގެ ދިވެހި މާއްދާއިން ފާސްވާ ކުދިންގެ ނިސްބަތް 40 ޕަސެންޓަށްވުރެ ދަށްވެފައިވާކަމަށެވެ. އަދި ގްރޭޑް 6 ގައި ކިޔަވާ ދަރިވަރުންގެ އިނގިރޭސި އާއި ހިސާބު އަދި ދިވެހި މާއްދާ އިން ފާސްވާ ކުދިންގެ އަދަދު 50 ޕަސެންޓަށްވުރެ ދަށް ކަމަށް މިނިސްޓަރު ވިދާޅުވި އެވެ.

އެއީ ކަންބޮޑުވާކަމެއްކަން ފާހަގަކުރައްވާ އިސްމާއިލް ވިދާޅުވީ އޭލެވެލް އާއި އޯލެވެލްއިން ގިނަކުދިން ކުރުވަން ބޭނުންވާ ނަމަ ޕްރައިމަރީ ގްރޭޑުން ފާސްވާ ކުދިންގެ ނިސްބަތް އިތުރު ކުރަންޖެހޭކަމަށެވެ.

"ޕްރައިމަރީ ގްރޭޑްތަކަށް ނިސްބަތުން، ހަރަދުކުރެވޭ ފައިސާގެ އަދަދު ވެސް މަދު، ސެކަންޑްރީ ގްރޭޑްތަކަށްވުރެ. ޒަމާނުއްސުރެ ޕްރައިމަރީ ގްރޭޑަށް ދެވިފައި އޮތް އަހަމިއްޔަތުކަން ވެސް ކުޑަވެފައި އޮތީ. އަޅުގަނޑު އަރުވަން ބޭނުންވާ ޔަގީންކަމަކީ ޕްރައިމަރީ ގްރޭޑުން ފާސްވާ ކުދިންގެ ނަތީޖާ ރަނގަޅު ކުރުމަށް މިނިސްޓްރީން ގިނަގުނަ މަސައްކަތްތަކެއް ކުރާނެކަން،" އޭނާ ވިދާޅުވި އެވެ.

ރާއްޖޭގެ ތައުލީމީ ދާއިރާގެ ކުރިއެރުމަށް ހުރި ހުރަސްތައް ނައްތާލައި ކަންކަން ހައްލު ކުރުމަށް 9.5 މިލިއަން ޑޮލަރުގެ ހިލޭ އެހީއާ އެކު ބޮޑު މަޝްރޫއެއް މިދިޔަ މަހު ވަނީ އިފުތިތާހު ކޮށްފަ އެވެ. މިނިސްޓަރު ވިދާޅުވީ އެ ޕްރޮޖެކްޓުގައި ހިމެނޭކަންކަން ހާސިލްކުރެއްވުމާއެކު ޕްރައިމަރީ ގްރޭޑުތަކުން ފާސްވާ ކުދިންގެ ނިސްބަތް ވެސް އިތުރުކުރަންޖެހޭ ކަމަށެވެ.

ގައުމު އާރާސްތު ކުރެވޭނީ ތައުލީމީ ފެންވަރު ރަނގަޅުކޮށްގެންކަން ކަމަށާއި އެކަން ހާސިލްކުރަން އެންމެން އެކުގައި މަސައްކަތްކުރަން ޖެހޭކަން މިނިސްޓަރު ފާހަގަކުރެއްވި އެވެ.