ޗެކްޕޮއިންޓަށް މަޑުނުކޮށް ފިލަން އުޅެނިކޮށް ފުލުހެއްގެ ގައިގައި ސައިކަލުން ޖެހިއްޖެ

ފުލުހުން ހިންގި ޓްރެފިކް އޮޕަރޭޝަނެއްގައި ޗެކްޕޮއިންޓަށް މަޑުކުރަން އެންގުމުން މަޑުނުކޮށް ފިލަން މަސައްކަތް ކުރަނިކޮށް ފުލުހެއްގެ ގައިގައި ސައިކަލުން ޖެހުމުން، ސައިކަލު ދުއްވި މީހާ ހައްޔަރު ކޮށްފި އެވެ.

މި މައްސަލާގައި ހައްޔަރު ކޮށްފައިވަނީ މއ. ހިއްތަލަވިލާ، އާދަމް ޒިދާނެވެ.

ފުލުހުން ބުނީ ރޭ ދަންވަރު 01:20 ހާއިރު ރަސްފަންނު ކައިރިން ޒިދާން ބާރު ސްޕީޑުގައި ނުރައްކާތެރިކޮށް ސައިކަލު ދުއްވާފައި ދަނިކޮށް މަޑުކުރަން އެންގުމުން ފުލުހުންގެ އަމުރަށް ނުކިޔަމަންތެރިވެ، ދާން އުޅުމުގެ ތެރޭގައި ފުލުހެއްގެ ގައިގައި ސައިކަލުން ޖެހިފައިވާ ކަމަށެވެ.

ފުލުހުން ބުނީ އޭނާ ހައްޔަރުކޮށް، ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ބަންދަށް ފަސް ދުވަސް ޖަހާފައިވާ ކަމަށެވެ. އަދި އޭނާ ދުއްވި ސައިކަލު ވެސް ފުލުހުން ވަނީ ޓޯ ކޮށްފައިވާ ކަމަށް ފުލުހުން ބުންޏެވެ.

ފުލުހުން ބުނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.

މި މައްސަލާގައި ހައްޔަރުކުރި ޒިދާން އަކީ ފިލްމީ ދާއިރާގައި ހަރަކާތްތެރިވާ ޒުވާނެކެވެ. ޑާކްރެއިންގެ ފިލްމު "ބީވީމާ" ގައި އޭނާ ކުޅުނު ރޯލުން އޭނާ ބޮޑު މަގުބޫލު ކަމެއް ހޯދާފައިވެ އެވެ.

މިދިޔަ ހޯމަ ދުވަހު ޓްރެފިކް ފުލުހުން މާލޭ ސަރަހައްދުގެ މަގުތަކަށް ނުކުމެ ބޮޑު އޮޕަރޭޝަނެއް ފެށީ ގިނަ އެކްސިޑެންޓްތަކެއް މާލެ ސަރަހައްދުގައި ހިނގަން ފެށުމުންނެވެ. އެގޮތުން ނުރައްކާތެރިކޮށް ބާރަށް ސައިކަލު ދުއްވުމުގެ މައްސަލައަށް އިންތިހާއަށް އިތުރުވެފައިވާއިރު، އެކްސިޑެންޓުތައް ވެސް އިތުރުވެފަ އެވެ. އަދި މިދިޔަ ހަފުތާގައި ހިނގި އެކްސިޑެންޓުތަކުގައި ދެ ޒުވާނަކު ވަނީ މަަރުވެފަ އެވެ.