ރޮބޯމޭންގެ ލަވައެއް، ނާނާއެއް!

އަންނަ ބުރާސްފަތި ދުވަހު ޕްރިމިއާކުރާ ކުޑަކުދިންގެ ފިލްމު "ރޮބޯމޭން: ދަ މޫވީ"ގެ ލަވައެއް އާންމުކޮށްފި އެވެ.

މިދިޔަ ހުކުރު ދުވަހު ނެރުނު އެ ލަވައިގެ ނަމަކީ "ނާނާއެއް" އެވެ.

މި ލަވަ ކިޔާފައި ވަނީ ދިވެހި ފިލްމު "ވިކްޝާ"ގެ ޓައިޓަލް ލަވަ ކިޔައިގެން 2019 ވަނަ އަހަރު ގައުމީ ފިލްމު އެވޯޑް ކާމިޔާބުކޮށްފައިވާ މަރިޔަމް ރިފްގާ ރަޝީދެވެ.

އަހްމަދު ޝަހީދު (ޝަހީދު ލެގަސީ) މިއުޒިކް ތައްޔާރުކޮށްދީފައިވާ މި ލަވައިގެ ލިރިކްސް ލިޔުނީ، މި ފިލްމުގެ ޕްރޮޑިއުސަރު މުހައްމަދު މުންތަސީރް (މުންކޮ) އެވެ.

ކުޑަކުދިން ވަރަށް ޝައުގުވެރިވާ ވާނެ ގޮތަށް ގެނެސްދޭ މި ފިކްޝަނަލް އަދި ޓައިމް ޓްރެވަލް ފިލްމުގައި ދެ ޒަމާނެއް ދައްކާނެ އެވެ. އެއީ މި އަހަރާއި 2040 ވަނަ އަހަރު ހިނގާ ކަންތައްތަކެކެވެ. މުޅި ވާހަކަ ބިނާވަނީ "ދަ ރޮބޯ ޖޫނިއާ ޗެލެންޖު" ކިޔާ ކުޑަކުދިންގެ ނެށުމުގެ މުބާރާތެއްގައި ބައިވެރިވާ ކުދިންތަކެއް މެދުގައި ހިނގާ ކަންތައްތަކެއްގެ މައްޗަށެވެ.

"ރޮބޯމޭން: ދަ މޫވީ"ގެ ލީޑު ރޯލުތައް ކުޅެނީ އުމުރުން 11 އަހަރުގެ މިޝާ އިސްމާއިލް ނިޔާޒާއި އުމުރުން 8 އަހަރުގެ އަމީލިއާ ނަސްރުﷲ ޝަކީބެވެ. އެ ދެ ކުދިންނާ އެކު، ރޮބޯމޭން ފެންނާނެ އެވެ. އަދި މުހިންމު ރޯލުތަކުން ދެން ފެންނާނީ އައިމިނަތު ނޫރާ އާއި މުހައްމަދު ޝިވާޒް އަދި މަރިޔަމް ޝިމާ އެވެ. އެކްސްޓެންޑެޑް ކެމިއޯއަކުން މަރިޔަމް އައްޒަ އާއި ރަވީ ފާރޫގް ވެސް ފެންނާނެ އެވެ.

ފިލްމުގެ ޑައިރެކްޓަރަކީ ކުރީގެ އެކްޓަރު އަދި މިހާރު ކުޅަދާނަ ޑައިރެކްޓަރެއް ކަމަށްވާ އިބްރާހިމް ވިސާމް (ކަނޑި) އެވެ. ފިލްމުގެ ސްކްރީންޕްލޭ ލިޔުނީ މަހުދީ އަހުމަދެވެ.

މުންކޮ ކުރިން ބުނި ގޮތުގައި، މި ފިލްމު ތައްޔާރުކޮށްފައި ވަނީ އާއިލާގެ އެންމެ އެކުގައި ގޮސް ބަލައިލެވޭނެ ގޮތަށް އަދި ހާއްސަކޮށް ކުޑަކުދިންނަށް ވަރަށް ކަމުދާނެ ގޮތަށެވެ. ފިލްމު އޮލިމްޕަހުގައި އަޅުވަނީ ވެސް އާއިލާ އެންމެން އެކުގައި ގޮސް ބަލައިލަން ފަސޭހަވާނެ ގަޑިތަކަށް ތާވަލުކޮށްގެންނެވެ.

މި ފިލްމު އޮލިމްޕަހުގައި އަޅުވަނީ މި މަހުގެ ފަހު ހަފުތާގައި ލިބޭ ފުރަތަމަ ޓާމު ޗުއްޓީއާ ދިމާކޮށެވެ. އެ ބަންދުގައި 10 ދުވަހު، ކޮންމެ ދުވަހަކު ދެ ޝޯ އޮލިމްޕަހުގައި އަޅުވާނެ އެވެ. ޝޯތައް އޮންނާނީ މެންދުރު 2:00 އާއި ހަވީރު 4:00 ގަ އެވެ. އެ ޝޯތަކަށް މިހާރު ވަނީ ޓިކެޓް ބުކް ކޮށްދޭން ފަށައިފަ އެވެ.