"ރޮބޯމޭން" އޮލިމްޕަހުގައި ޕްރިމިއާ ކޮށްފި

ކުޑަކުދިންގެ ފިލްމު "ރޮބޯމޭން: ދަ މޫވީ" އޮލިމްޕަސް ސިނަމާގައި މިއަދު ޕްރިމިއާ ކޮށްފި އެވެ.

އެ ފިލްމު ޕްރިމިއާކުރުމުގެ ގޮތުން އޮލިމްޕަހުގައި މިއަދު މެންދުރު ފަހު ވަނީ ރެޑްކާޕެޓް އިވެންޓެއް ބާއްވައިފަ އެވެ. އެ އިވެންޓުގައި ފިލްމުގެ ކާސްޓާއި ކްރޫގެ އިތުރުން އެކި ގޮތްގޮތުން ފިލްމަށް ކޮންޓްރިބިއުޓް ކުރި މީހުން ބައިވެރިވި އެވެ.

ކުޑަކުދިންގެ ފިލްމެއް އޮލިމްޕަހުގައި މި އެޅުވީ ވަރަށް ގިނަ އަހަރުތަކެއް ފަހުންނެވެ.

މިއަދުން ފެށިގެން ކުރިއަށް އޮތް 10 ދުވަހު، ކޮންމެ ދުވަހަކު މި ފިލްމުގެ ދެ ޝޯ އޮލިމްޕަހުގައި ބާއްވާނެ އެވެ. އެއީ މެންދުރު ފަހު 2:00 އާއި ހަވީރު 4:00 ގައި ބާއްވާ ޝޯއެކެވެ. މި ޝޯތަކަށް އޮލިމްޕަހުގެ ކައުންޓަރުން އަންނަނީ ޓިކެޓް ވިއްކަމުންނެވެ.

ކުޑަކުދިން ވަރަށް ޝައުގުވެރިވާ ވާނެ ގޮތަށް ގެނެސްދޭ މި ފިކްޝަނަލް އަދި ޓައިމް ޓްރެވަލް ފިލްމުގައި ދެ ޒަމާނެއް ދައްކާނެ އެވެ. އެއީ މި އަހަރާއި 2040 ވަނަ އަހަރު ހިނގާ ކަންތައްތަކެކެވެ. މުޅި ވާހަކަ ބިނާވަނީ "ދަ ރޮބޯ ޖޫނިއާ ޗެލެންޖު" ކިޔާ ކުޑަކުދިންގެ ނެށުމުގެ މުބާރާތެއްގައި ބައިވެރިވާ ކުދިންތަކެއް މެދުގައި ހިނގާ ކަންތައްތަކެއްގެ މައްޗަށެވެ.

"ރޮބޯމޭން: ދަ މޫވީ"ގެ ލީޑު ރޯލުތައް ކުޅުނީ އުމުރުން 11 އަހަރުގެ މިޝާ އިސްމާއިލް ނިޔާޒާއި އުމުރުން 8 އަހަރުގެ އަމީލިއާ ނަސްރުﷲ ޝަކީބެވެ. އެ ދެ ކުދިންނާ އެކު، ރޮބޯމޭން ފެންނާނެ އެވެ. އަދި މުހިންމު ރޯލުތަކުން ދެން ފެންނަނީ އައިމިނަތު ނޫރާ އާއި މުހައްމަދު ޝިވާޒް އަދި މަރިޔަމް ޝިމާ އެވެ. އެކްސްޓެންޑެޑް ކެމިއޯއަކުން މަރިޔަމް އައްޒަ އާއި ރަވީ ފާރޫގް ވެސް ފެނެ އެވެ.

ފިލްމު ޑައިރެކްޓުކުރީ ކުރީގެ އެކްޓަރު އަދި މިހާރު ކުޅަދާނަ ޑައިރެކްޓަރެއް ކަމަށްވާ އިބްރާހިމް ވިސާމް (ކަނޑި) އެވެ. ފިލްމުގެ ސްކްރީންޕްލޭ ލިޔުނީ މަހުދީ އަހުމަދެވެ.

ފިލްމުގެ ޕްރޮޑިއުސަރު މުހައްމަދު މުންތަސީރް (މުންކޮ) ކުރިން ބުނި ގޮތުގައި، މި ފިލްމު ތައްޔާރުކޮށްފައި ވަނީ އާއިލާގެ އެންމެ އެކުގައި ގޮސް ބަލައިލެވޭނެ ގޮތަށް އަދި ހާއްސަކޮށް ކުޑަކުދިންނަށް ވަރަށް ކަމުދާނެ ގޮތަށެވެ. ފިލްމު އޮލިމްޕަހުގައި އަޅުވަނީ ވެސް އާއިލާ އެންމެން އެކުގައި ގޮސް ބަލައިލަން ފަސޭހަވާނެ ގަޑިތަކަށް ތާވަލުކޮށްގެންނެވެ.