10،000 ބްރޭންޑާ އެކު އެފްއެޗްއޭއެމް އެގްޒިބިޝަން ފަށައިފި

ރާއްޖޭގައި ބާއްވާ އެންމެ ބޮޑު ހޮސްޕިޓަލިޓީ އެސްކްޕޯ، ފުޑް އެންޑް ހޮސްޕިޓަލިޓީ އޭޝިއާ މޯލްޑިވްސް (އެފްއެޗްއޭއެމް) މިއަދު ފަށައިފި އެވެ.

ދަރުބާރުގޭގައި ފެށި މި އެކްސްޕޯގައި 100 އަށް ވުރެ ގިނަ އެގްޒިބިޓަރުން ބައިވެރިވާއިރު، އެކި ކުންފުނިތަކުން ގާތްގަނޑަކަށް 10،000 ބްރޭންޑުގެ އުފެއްދުންތައް ވަނީ ދައްކާލައިފަ އެވެ. އޭގެ ތެރޭގައި ހައުސް ކީޕިން ބްރޭންޑުތަކާއި ސައިނޭޖް އުފައްދާ ވިޔަފާރިތަކާއި މޭވާ އާއި ތަރުކާރީ ވިއްކާ ފަރާތްތަކާއި އެކި ވައްތަރުގެ ފުޑް އެންޑް ބެވަރެޖް ކުންފުނިތަކާއި ޓޫރިޒަމާ ގުޅުންހުރި ކުންފުނިތައް ވެސް ހިމެނެ އެވެ.

މި އަހަރުގެ އެގްޒިބިޝަންގައި ރާއްޖޭގެ އިތުރުން ތުރުކީ އާއި ޖަރުމަނާއި އިޓަލީ އާއި ޔޫއޭއީ އާއި ސިންގަޕޫރާއި ޕާކިސްތާނާއި އިންޑިއާ އާއި ސްރީ ލަންކާ ހިމެނޭ ގޮތަށް ގިނަ ގައުމުތަކަކެއްގެ ކުންފުނިތައް ބައިވެރިވެފައިވެ އެވެ.

މި އިވެންޓު އިންތިޒާމުކުރާ ސީޑީސީ އިވެންޓުގެ ސީއީއޯ އަދި މެނޭޖިން ޑިރެކްޓަރު އިމްރާން ހަސަން ވިދާޅުވި ގޮތުގައި މި އަހަރުގެ އެފްއެޗްއޭއެމް އަކީ މިހާތަނަށް އެ ކުންފުންނިން ހިންގާ އެންމެ ކާމިޔާބު އެއް ހަރަކާތަށް ވާނެ އެވެ. ގާތްގަނޑަކަށް 5،000 މީހުން އެ އިވެންޓަށް ޒިޔާރަތް ކުރާނެ ކަމަށް ބެލެވޭ ކަމަށް ވިދާޅުވި އެވެ.

އެ އެގްޒިބިޝަން ފެށުމަށް ބޭއްވި ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދު ވިދާޅުވީ، މިއީ ރާއްޖޭގެ ޓޫރިޒަމް ދާއިރާގައި މުހިންމު ދައުރެއް އަދާކުރާ ހަރަކާތެއް ކަމަށެވެ. މި އެގްޒިބިޝަނާއި އެކު ކުރިއަށްދާ ކަލިނަރީ ޗެލެންޖުން ރާއްޖޭގެ ޝެފުންނަށް، އެމީހުންގެ ހުނަރުތައް ދައްކާލުމަށް ފުރުސަތު ފަހިވާނެ ކަމަށް އޭނާ ވިދާޅުވި އެވެ.

"ރާއްޖެ އަކީ ޓޫރިޒަމްގެ ޕްރިމިއަމް ބްރޭންޑަކަށް ވާއިރު އަޅުގަނޑުގެ އުއްމީދަކީ މި އެގްޒިބިޝަނުގައި ބާއްވާ ކަލިނަރީ ޗެލެންޖު ފަދަ މުބާރާތްތަކުގެ ސަބަބުން ރާއްޖޭގެ ރަހަތައް އެއާލައިންތަކުގެ މެނޫތަކާ ހަމައަށް ދިއުން،" މިނިސްޓަރު ވިދާޅުވި އެވެ.

މި އެގްޒިބިޝަނުގައި ބާއްވާ ކަލިނަރީ ޗެލެންޖު އިއްޔެ ވަނީ ފަށައިފަ އެވެ. މި ޗެލަންޖުގައި 21 ކެޓަގަރީއެއް ހިމެނެ އެވެ.

ކަލިނަރީ ޗެލެންޖުގެ އިތުރުން މި އެގްޒިބިޝަނުގައި ބަރިސްތާ ޗެލެންޖަކާއި މޮކްޓެއިލް ޗެލެންޖެއް އަދި ހައުސްކީޕިން ޗެލެންޖެއް ވެސް ކުރިއަށް ދެ އެވެ. މި ހުރިހާ މުބާރާތްތަކުގައި 700 އެއްހާ ބައިވެރިން ވާދަކުރެ އެވެ.

އެފްއެޗްއޭއެމް ކުރިއަށް ދާނީ އަންނަ ބުދަ ދުވަހުގެ ނިޔަލަށެވެ. ތިން ދުވަހަށް ކުރިއަށްދާ އެ އެކްސްޕޯގެ ހަރަކާތްތައް ހެނދުނު 10 އިން ރޭގަނޑު 8 ޖެހުމާ ހަމައަށް ކުރިއަށްދާނެ އެވެ.