ކުށް ސާބިތުކުރި ގޮތާ މެދު ސުވާލު އުފެދިފައި ވަނިކޮށް އެމެރިކާގައި މީހަކަށް މަރުގެ ހުކުމް ތަންފީޒުކޮށްފި

އެމެރިކާގައި، މީހަކު މެރިކަމުގެ ކުށް ސާބިވާ ކަމަށް ހުކުމްކޮށްފައި ވަނިކޮށް އެ މީހާއާ ދެކޮޅަށް ހުރި ހެކިތަކާ މެދު ޕްރޮސިކިއުޓަރުން ފަހުން ސުވާލު އުފައްދައި ހުކުމް ތަންފީޒުކުރުން ފަސްކޮށްދޭން އެދުމުން ވެސް މިއަދު އެ މީހާއަށް ހުކުމް ތަންފީޒުކޮށް މަރާލައިފި އެވެ.

މާސެލަސް ވިލިއަމްސް، 55، މަރާލީ ބޮން ޓެރޭގައި ހުންނަ ސްޓޭޓް ޖަލުގައި، ލީތަލް އިންޖެކްޝަން ޖަހައިގެންނެވެ.

ވިލިއަމްސްގެ ވަކީލުން ވަނީ ވަކި އަތަކަށް ޖެހިފައި ތިބި ޖޫރީން ނެގި ކަމަށާއި މަރާލަން ބޭނުންކުރި ވަޅިން ހެކި ނެތޭ ފަދަ ކަންކަން މައްސަލަ ނިމުމުގެ ކުރިން ކޮށްފައިވާ ކަމަށް ބުނެ އާ ހެކީގެ ގޮތުގައި ކަންތައްތަކެއް ހުށަހަޅައިފަ އެވެ. މައްސަލައިގެ ފުރަތަމަ ދުވަހުން ފެށިގެން ވެސް ވިލިއަމްސް ގެންދިޔައީ އޭނާ އެ ކުށް ނުކުރާ ކަމަށް ބުނަމުންނެވެ.

ވައްކަންކުރަން ވަދެ އުޅެނިކޮށް ގޭގެ މީހަކަށް ފެނުމުން އެ މީހާއަށް ހަމަލާދީ މަރާލާފައިވާ ކަމަށް ބެލެވޭ މި މައްސަލައިގައި، ހަމަލާދޭން ބޭނުންކުރި ވަޅިން ނުވަތަ އެ ހާދިސާ ހިނގި ތަނުން ވެސް ވިލިއަމްސްގެ ޑީއެންއޭ ފެނިފައެއް ނުވެ އެވެ. އެކަމަކު ފަހުން ވަނީ އެހެން ފިރިހެނެއްގެ ޑީއެންއޭ ވަޅިން ފެނިފަ އެވެ.

މި ކަންކަމާ އެކު އޭނާގެ މަރުގެ ހުކުމް ތަންފީޒު ނުކޮށް މަޑުޖައްސާލަން އެދި ޕްސޮރިކިއުޓަރުންނާއި ވިލިއަމްސްގެ ވަކީލުން ގަވަރުނަރާއި ސުޕްރީމް ކޯޓަށް ހުށަހެޅި ނަމަވެސް އެ ހުށަހެޅުންތައް ބަލައި ނުގަތީ އެވެ.

ވިލިއަމްސްގެ މައްޗަށް ކުށް ސާބިތުވާ ކަމަށް ކަނޑައެޅީ 1998 ވަނަ އަހަރު، ކުރީގެ ނިއުސް ރިޕޯޓަރެއް ކަމަށްވާ ފެލިޝިއާ ގޭލް އޭނާގެ ގޭތެރޭގައި، ވަޅިން 43 ފަހަރު ހަމަލާދީ މަރާލާފައި އޮއްވައި ފެނުނު މައްސަލައިގަ އެވެ.

ވައްކަމާއި ފޭރުމުގެ ކުށް ސާބިތުވެ މީގެ ކުރިން ވެސް ކުށް ސާބިތުވެފައިވާ ވިލިއަމްސްގެ ޑީއެންއޭ ވަޅިން ނުވަތަ ކުށުގެ ވެށިން ފެނިފައި ނުވިޔަސް ކުށް ސާބިތުކުރީ އޭނާއާ އެކު ކުރިން ޖަލުގައި ހުރި މީހަކާއި ކުރީގެ ލޯބިވެރިއެއްގެ ހެކިބަހަށް ބިނާކޮށެވެ.

ވިލިއަމްސްއާ ގުޅުމެއް ނެތް ފިރިހެން ޑީއެންއޭއެއް ވަޅިން ފެނުމާ ގުޅިގެން 2015 ވަނަ އަހަރު މިސޫރީ ސުޕްރީމް ކޯޓުން އަދި 2017 ވަނަ އަހަރު އެ ސްޓޭޓްގެ އޭރުގެ ގަވަރުނަރު އެރިކް ގްރީޓެންސް ވަނީ މަރުގެ ހުކުމް ތަންފީޒު ކުރުން މަޑުޖައްސާލައިފަ އެވެ. އޭނާގެ މައްޗަށް އިއްވާފައިވާ ހުކުމް ބާތިލް ކުރުމުގެ މަސައްކަތް މި އަހަރު ލޯކަލް ޕްރޮސެކިއުޓަރުން ފެށި އެވެ. ނަމަވެސް މިދިޔަ ހޯމަ ދުވަހު ސްޓޭޓް ސްޕްރީމް ކޯޓުގެ އިއްތިފާގުން ނިންމީ ވިލިއަމްސްގެ މަރުގެ ހުކުމް ތަންފީޒުކުރަން ޖެހޭ ކަމަށެވެ.

އެމެރިކާގެ 23 ސްޓޭޓެއްގައި މަރުގެ އަދަބު އުވާލާފައިވާއިރު، ހަ ސްޓޭޓެއްގައި ވަނީ މަރުގެ ހުކުމް ތަންފީޒުކުރުން ހުއްޓާލައިފަ އެވެ. އެއީ އެރިޒޯނާ، ކެލިފޯނިއާ، އޮހާޔޯ، އޮރެގަން، ޕެންސިލްވޭނިއާ އަދި ޓެނެސީގަ އެވެ.