ސައޫދީގައި އެއް ދުވަހު ހަތް މީހުންނަށް މަރުގެ ހުކުމް ތަންފީޒުކޮށްފި

ޑްރަގް ޓްރެފިކް ކުރުމުގެ ކުށް ސާބިތުވެފައިވާ ފަސް މީހަކާ އެކު ޖުމްލަ ހަތް މީހަކަށް ސައޫދީ އަރަބިއްޔާގައި އެއް ދުވަހެއްގައި މަރުގެ ހުކުމް ތަންފީޒުކޮށްފި އެވެ.

އިއްޔެ މަރާލި މި މީހުންނާ އެކު މި އަހަރުގެ ސައޫދީގައި މަރުގެ ހުކުމް ތަންފީޒުކުރި މީހުންގެ އަދަދު 236 އަށް އަރާފައިވާ ކަމަށް، ރަސްމީ ބަޔާންތަކުގައި އާންމުކޮށްފައިވާ މައުލޫމާތާ ހަވާލާދީ އޭއެފްޕީން ބުންޏެވެ.

އިންޓީރިއާ މިނިސްޓްރީން ނެރުނު ބަޔާނެއްގައި ބުނީ ޔަހްޔާ ލުތުފުﷲ އަލީ އާޒިބް، އަހުމަދު އަލީ އަދި ސަލީމް ނަހާރީގެ މައްޗަށް މަރުގެ އަދަބު ދީފައިވަނީ ދެކުނުގެ ޕްރޮވިންސް އާސިރުގައި، ހަޝިޝް އެތެރެކުރުމުގެ ކުށުގައި ކަމަށެވެ.

މި ހަތަރު މީހުންނަކީ ވެސް ޔަމަނު މީހުންނެވެ.

އަދި މަސްތުވާތަކެތީގެ ވިޔަފާރި ކުރުމުގެ ކުށުގައި ޕާކިސްތާނުގެ ފިރިހެނަކަށް މަރުގެ އަދަބު ހުކުމް ތަންފީޒުކުރި ކަމަށް ބުނެފައި ވާއިރު މިއީ އެ ކުށުގައި ސައުދީން މި އަހަރު މަރުގެ ހުކުމް ތަންފީޒުކުރި މީހުންގެ އަދަދު ވަނީ 71 އަށް އަރައިފަ އެވެ.

ހަނގުރާމައިގެ ތެރޭގައި އޮތް ސީރިއާ އާއި ލުބްނާންގައި އާންމުވެފައިވާ، ފަސޭހައިން ދެވިހިފާ އެމްފެޓަމިންގެ ބާވަތެއް ކަމަށްވާކެޕްޓަގަންގެ ބޮޑު މާކެޓަކަށް ސައުދީ އަރަބިއްޔާ މިހާރު ވަނީ ވެފަ އެވެ.

މަސްތުވާތަކެއްޗާ ދެކޮޅަށް ސައުދީގެ ކަމާބެހޭ ފަރާތްތަކުން މިދިޔަ އަހަރު ވަރުގަދަ ކެމްޕެއިނެއް ފަށާފައިވާއިރު، އެ ކެމްޕޭނުގައި ގިނަ އަދަދެއްގެ ތަންތަން ރެއިޑްކޮށް އެތައް ބަޔަކު ހައްޔަރުކޮށްފައިވެ އެވެ.

މަސްތުވާތަކެތީގެ މައްސަލަތަކުގައި މަރުގެ އަދަބު ތަންފީޒުކުރުން މަޑުޖައްސާލާފައި އޮތުމަށް ފަހު މީގެ ދެ އަހަރު ކުރިން އަލުން ތަންފީޒުކުރަން ފަށާފައި ވާއިރު މަރުގެ އަދަބު އަންނަ މީހުންގެ އަދަދު ވެސް ގިނަ ކަމަށް ހިސާބުތަކުން ދައްކަ އެވެ. ޗައިނާ އާއި އީރާނަށް ފަހު ދުނިޔޭގައި 2023 ވަނަ އަހަރު ތިން ވަނައަށް އެންމެ ގިނަ މީހުންނަށް މަރުގެ އަދަބު ތަންފީޒުކުރީ ސައޫދީން ކަމަށް އެމްނެސްޓީ އިންޓަނޭޝަލް އިން ވަނީ ބުނެފަ އެވެ. ސައޫދީގައި މަރުގެ ހުކުމް ތަންފީޒުކުރުމަކީ، ހައްގުތަކުގެ ނަމުގައި އަޑު އުފުލާ މީހުން ދެކޮޅުހަދާ ކަމެކެވެ. އެކަމަކު ސައޫދީން ކުރިން ބުނެފައި ވަނީ މަރުގެ އަދަބަކީ "އަމާންކަން ދެމެހެއްޓުމަށް" ކޮންމެހެން ދޭންޖެހޭ އަދަބެއް ކަމަށާއި މި ހުކުމްތައް ތަންފީޒު ކުރަނީ ދައުވާ ލިބޭ މީހުންނަށް ލިބެން އޮންނަ ހުރިހާ ފުރުސަތެއް ދިނުމަށް ފަހު ވެސް ކުށުން ބަރިއްޔަ ނުވެވުމުން އެކަނި ކަމަށެވެ. -- އޭއެފްޕީ