މަރުގެ ހުކުމް ތަންފީޒުކުރުމުގެ ކުރިން ފަހު ބަސް: ކޮންމެ ހާލެއްގައި ވެސް ﷲ އަށް ހަމްދުކުރަން

މީހަކު މެރިކަމުގެ ކުށް ސާބިތުވާ ކަމަށް ކަނޑައަޅައި އެމެރިކާގައި މިއަދު މަރުގެ ހުކުމް ތަންފީޒުކުރި މީހާގެ ފަހު ބަހަކީ "ކޮންމެ ހާލެއްގައި ވެސް ﷲ އަށް ހަމްދުކުރަން" ކަމަށް ކަރެކްޝަންސް ޑިޕާޓްމަންޓުން ހާމަކުރި އޭނާގެ ބަޔާނުގައި ބުނެފި އެވެ.

މާސެލަސް ވިލިއަމްސް، 55، ބޮން ޓެރޭގައި ހުންނަ ސްޓޭޓް ޖަލުގައި، ލީތަލް އިންޖެކްޝަން ޖަހައިގެން މަރާލީ އޭނާ އަށް ކުށް ސާބިތުކުރި ގޮތާ މެދު ސުވާލުތަކެއް އުފެދި، މަރުގެ ހުކުމް ތަންފީޒުކުރުން ފަސްކޮށްދޭން ކޯޓަށް ހުށަހެޅުމުން ވެސް އެކަން ބަލައިނުގަތުމުންނެވެ.

އޭނާގެ ދިފާއުގައި މަސައްކަތްކުރާ މީހުން ބުނެފައިވާ ގޮތުގައި ވިލިއަމްސް ވަނީ އިސްލާމް ދީނަށް ވަދެ އޭނާގެ ނަން ޚަލީފާ އިބްނު ރޭފޯޑް ޑެނިއަލްސް އަށް ބަދަލުކޮށްފަ އެވެ.

ކަރެކްޝަންސް ޑިޕާޓްމަންޓުން ޚަލީފާ އޭނާ އަތުން ލިޔުނު ބަޔާން އާންމުކޮށްފަ އެވެ.

"ކޮންމެ ހާލަތެއްގައި ﷲ އަށް ހަމްދުކުރަން" ކަމަށް އެ ބަޔާނުގައިވެ އެވެ.

ވިލިއަމްސްގެ މައްޗަށް ކުށް ސާބިތުވާ ކަމަށް ކަނޑައެޅީ 1998 ވަނަ އަހަރު، ކުރީގެ ނިއުސް ރިޕޯޓަރެއް ކަމަށްވާ ފެލިޝިއާ ގޭލް އޭނާގެ ގޭތެރޭގައި، ވަޅިން 43 ފަހަރު ހަމަލާދީ މަރާލާފައި އޮއްވައި ފެނުނު މައްސަލައިގަ އެވެ. ވައްކަމާއި ފޭރުމުގެ ކުށް ސާބިތުވެ މީގެ ކުރިން ވެސް ކުށް ސާބިތުވެފައިވާ ވިލިއަމްސްގެ ޑީއެންއޭ ވަޅިން ނުވަތަ ކުށުގެ ވެށިން ފެނިފައި ނުވިޔަސް ކުށް ސާބިތުކުރީ އޭނާއާ އެކު ކުރިން ޖަލުގައި ހުރި މީހަކާއި ކުރީގެ ލޯބިވެރިއެއްގެ ހެކިބަހަށް ބިނާކޮށެވެ.

ވިލިއަމްސްއާ ގުޅުމެއް ނެތް ފިރިހެން ޑީއެންއޭއެއް ވަޅިން ފެނުމާ ގުޅިގެން 2015 ވަނަ އަހަރު މިސޫރީ ސުޕްރީމް ކޯޓުން އަދި 2017 ވަނަ އަހަރު އެ ސްޓޭޓްގެ އޭރުގެ ގަވަރުނަރު އެރިކް ގްރީޓެންސް ވަނީ މަރުގެ ހުކުމް ތަންފީޒު ކުރުން މަޑުޖައްސާލައިފަ އެވެ. އޭނާގެ މައްޗަށް އިއްވާފައިވާ ހުކުމް ބާތިލް ކުރުމުގެ މަސައްކަތް މި އަހަރު ލޯކަލް ޕްރޮސެކިއުޓަރުން ފެށި އެވެ. ނަމަވެސް މިދިޔަ ހޯމަ ދުވަހު ސްޓޭޓް ސްޕްރީމް ކޯޓުގެ އިއްތިފާގުން ނިންމީ ވިލިއަމްސްގެ މަރުގެ ހުކުމް ތަންފީޒުކުރަން ޖެހޭ ކަމަށެވެ.

އިނގިރޭސި ވިލާތުގެ ބިލިއަނަރު ރިޗަޑް ބްރެންސަން އާއި މަޝްހޫރު އެތައް ބަޔަކު ވަނީ ވިލިއަމްގެ ދިފާއުގައި މަސައްކަތްކޮށްފަ އެވެ. އެ މީހުން ބުނަމުންދަނީ ވިލިއަމްގެ ކުށެއް ނެތި މަރާލީ ކަމަށެވެ.