ވެލެންސިއާގެ ސަސްޕެންޝަން ނޯމަލައިޒޭޝަން ކޮމިޓީން އުވާލައިފި

އެފްއޭއެމްގެ ކުރީގެ ރައީސް ބައްސާމް އަދީލް ޖަލީލުގެ ދައުރުގައި މި އަހަރުގެ މާޗު މަހު އެ އެސޯސިއޭޝަނުގެ ޑިސިޕްލިނަރީ ކޮމިޓީން ކްލަބް ވެލެންސިއާ ސަސްޕެންޑްކުރީ އުސޫލުން ބޭރުން ކަމަށް ނިންމައި، ނޯމަލައިޒޭޝަން ކޮމިޓީން އެ ކްލަބް އާއްމު ހާލަތަށް ގެނެސްފި އެވެ.

"މިހާރު" ނޫހަށް އިތުބާރުހުރި ގޮތަކަށް މައުލޫމާތު ލިބިފައިވާ ގޮތުގައި، ނޯމަލައިޒޭޝަން ކޮމިޓީން ބެލި ބެލުމުން ފާހަގަކުރެވުނީ ވެލެންސިއާ ސަސްޕެންޑްކޮށްފައިވަނީ ގަވާއިދާ ވެސް ހިލާފަށް، އެއްވެސް ހަމައެއް ނެތި އެވެ. އެހެންވެ، އެ ސަސްޕެންޝަން ބަލައިނުގަންނަން ކޮމިޓީން ނިންމީ އެވެ. ނަމަވެސް ކޮމިޓީން އެ ނިންމުން އަދި އާއްމުކޮށް އިއުލާނެއް ނުކުރެ އެވެ.

ވެލެންސިއާ އަކީ، ފީފާ އިން މިހާރު ސަސްޕެންޑްކޮށްފައިވާ، އަދި ކޮރަޕްޝަނާއި، މަނީ ލޯންޑަރިންގެ ބޮޑެތި ތުހުމަތަކެއް ފުލުހުން ކޮށްފައިވާ ބައްސާމް އެއް ދުވަސްވަރެއްގައި ހިންގި އަދި އަބަދުވެސް އޭނާގެ އާއިލީ ކޮންޓްރޯލް އޮތް ކްލަބެކެވެ. އެ ކްލަބަށް އަދަބު ލިބުނީ، ޔަގީންކުރެވޭ ގޮތުގައި މިދިޔަ އަހަރު ބާއްވަން އުޅުނު އިންތިހާބުގައި ބައްސާމަށް ތާއީދުނުކުރަން ނިންމުމުންނެވެ.

އެ އިންތިހާބުގައި ވެލެންސިއާ ޗެއާމަން އަބްދުﷲ އަޒްމީން ބުނި ގޮތުގައި ކްލަބުން ތާއީދުގެ ސިޓީ ދިނީ ބައްސާމްއާ އިދިކޮޅު ކެންޑިޑޭޓް އަހުމަދު ތޯރިގް (ޓޮމް) އަށެވެ. އެކަމަކު، ބައްސާމުގެ ޕްރޮކްސީއެއް ގޮތަށް އިންތިހާބަށް ކުރިމަތިލި މުފާވިޒް ހާޝިމް (މުފާ) ވެސް ވެލެންސިއާގެ ތާއީދުގެ ސިޓީއެއް ހުށަހެޅި އެވެ. އަޒްމީން ތުހުމަތުކުރި ގޮތުގައި އެއީ ފޯޖުކޮށްފައިވާ ސިޓީ އެކެވެ. އަދި އޭނާ އެ މައްސަލަ ފުލުހަށް ވެސް ހުށަހެޅި އެވެ.

ވެލެންސިއާގެ ބޯޑުގައި ތިބީ ބައްސާމަށް ތާއީދުކުރާ މެމްބަރުން ނޫސްވެރިންގެ ބައްދަލުވުމެއް ބާއްވައި ބުނީ ޗެއާމަންކަމުން އަޒްމީން އިސްތިއުފާ ދީފައިވާ ކަމަށާއި، އަދި އޭގެ ކުރިން އޭނާގެ އިތުބާރު ނެތްކަމުގެ ވޯޓެއް ނަގާފައިވާ ކަމަށެވެ. އެހެންވެ ވެލެންސިއާގެ ތާއީދު ސިޓީ އެއްވެސް ކެންޑިޑޭޓަކަށް ދިނުމުގެ ހައްގެއް އޭނާ އަށް ނޯންނާނެ ކަމަށެވެ.

ދެ ކެންޑިޑޭޓުންނަށް ސިޓީ ދީފައިވާތީވެ ވެލެންސިއާގެ އެއްވެސް ސިޓީއެއް ބަލައިނުގަންނަން އެފްއޭއެމުން ނިންމައިފި ނަމަ ޓޮމްގެ ކެންޑިޑެސީ އޮތީ ބާތިލުވާ ގޮތަށެވެ. އެއީ، އެފްއޭއެމްގެ އަސާސީ ގަވާއިދުގައި ބުނާ، ފުރަތަމަ ޑިވިޝަނުގެ ތިން ކްލަބެއްގެ ތާއީދު ސިޓީ އޭނާ އަތުގައި ހަމަނުވާނެތީވެ އެވެ. އެހެންވެއްޖެ ނަމަ، ފަސޭހަކަމާ އެކު ބައްސާމުގެ ޕްރޮކްސީ އަށް އެފްއޭއެމް އިންތިހާބު ކާމިޔާބުކުރެވޭނެ އެވެ.

އެ މައްސަލައިގައި ދެން ފެނުނީ އެފަދަ މަންޒަރެކެވެ. ޑިސިޕްލިނަރީ ކޮމިޓީން ވެލެންސިއާ ސަސްޕެންޑްކުރީ އެވެ. އަދި ޓޮމްގެ ކެންޑިޑެސީ ވެސް އޭރު ގެއްލުނެވެ. އެ މައްސަ ޓޮމް އިސްތިއުނާފުކުރި ނަމަވެސް އެފްއޭއެމްގައި އިލެކްޓޯރަލް އެޕީލް ކޮމިޓީއެއް ނެތުމުން އޮތީ ގޮތެއް ނުނިންމި އެވެ. އެހެން އޮއްވާ ފީފާ އާއި އޭއެފްސީން އިންތިހާބު ހުއްޓުވީ އެވެ.

އަލުން އިންތިހާބު ބާއްވަން ބައްސާމް މަސައްކަތްކުރެއްވި ނަމަވެސް، ފީފާގެ އެތިކްސް ކޮމިޓީން އޭނާ ފުޓްބޯޅައިގެ ހުރިހާ ހަރަކާތަކުން ސަސްޕެންޑްކޮށް، އިންތިހާބު ހުއްޓުވި އެވެ. އަދި ފަހުން ނޯމަލައިޒޭޝަން ކޮމިޓީއެއް އެކުލަވާލައި އެފްއޭއެމް ހިންގުން އެ ކޮމިޓީއާ ހަވާލުކުރި އެވެ. އެ ކޮމިޓީގެ މެންޑޭޓަކީ އެފްއޭއެމުން ގެއްލިފައިވާ ފައިސާ ހޯދުމާއި، އިންތިހާބެއް ބާއްވައި އާއްމު ހާލަތަކަށް ގެނައުމެވެ. އެކަންކުރުމަށް އަހަރެއްހާ ދުވަސް ފީފާ އިން ވަނީ ދީފަ އެވެ. އެ ކޮމިޓީގެ ޗެއާމަނަކީ ކުރީގެ ސްޕޯޓްސް މިނިސްޓަރު އަހުމަދު ޒުހޫރެވެ. ދެން ހިމެނެނީ ފައިނޭންސް އަދި ގާނޫނީ ދާއިރާގެ ތަޖުރިބާކާރުންނެވެ.

ރާއްޖޭގެ ބޮޑު ތިން ކްލަބުގެ ތެރޭ ހިމެނޭ ވެލެންސިއާ އޭރު ސަސްޕެންޑްކުރުމުން އެ ކްލަބުގެ ޔޫތު ޓީމުތަކަށް މުބާރާތްތަކުގައި ވާދަކުރަން ދަތިތަކާ ކުރިމަތިވި އެވެ. އަދި އެފްއޭއެމުން ދަނޑު ދިނުން ހުއްޓާލުމުން ޕްރެކްޓިސް ވެސް މެދުކެނޑުނެވެ. އޭގެ ފަހުން ރާއްޖޭގެ ފުރަތަމަ ޑިވިޝަނުގެ ހަރަކާތެއް ބާއްވާފައިނުވާތީވެ، އެ ކްލަބުގެ މައި ޓީމަށް ސަސްޕެންޝަނުގެ އަސަރެއް ނުކުރެ އެވެ.