ޕީއެސްއެމްގެ ހިޔާނާތުގެ މައްސަލަ ބަލަން ފުލުހުން އޭސީސީ އަށް ފޮނުވައިފި

ދައުލަތުގެ މީޑިއާ ޕީއެސްއެމުން ޑޮލަރު މާރުކުރުމާއި އާމްދަނީން އަދި ތިޖޫރިން ނުވަ މިލިއަން ރުފިޔާ ގެއްލުނު މައްސަލަ އެންޓި ކޮރަޕްޝަން ކޮމިޝަން (އޭސީސީ) އަށް ފޮނުވާފައިވާ ކަމަށް ފުލުހުން މިއަދު ބުނެފި އެވެ.

އޮޑިޓަ ޖެނެރަލްގެ ރިޕޯޓުގައިވާ ގޮތުން ޕީއެސްއެމުން ގެއްލިފައި ވަނީ 2017 ވަނަ އަހަރުން ފެށިގެން މި އަހަރުގެ އޭޕްރީލް މަހުގެ ނިޔަލަށް 4.9 މިލިއަން ރުފިޔާ އާއި ތިޖޫރީގައި ހުރި 190،000ރ. އެވެ.

އެ ފައިސާ ޖަމާކޮށްފައި ވަނީ ޕީއެސްއެމްގެ ފައިނޭންސް ޑިރެކްޓަރާއި އޭނާގެ ދަރިއެއްގެ އެކައުންޓަށް ކަމަށް އެ ރިޕޯޓުގައިވެ އެވެ.

އެ މައްސަލަ ބަލަމުންދޭތޯ ސުވާލުކުރުމުން ފުލުހުންގެ މީޑިއާ އޮފިޝަލަކު "މިހާރު" އަށް ވިދާޅުވީ ކޮރަޕްޝަންގެ މައްސަލަތައް ތަހުގީގު ކުރުމުގެ އިހުތިސާސް އޮންނަނީ އޭސީސީގައި ކަމަށާއި އެހެންވެ، އެ މައްސަލަ ފުލުހުން ވަނީ އޭސީސީ އަށް ފޮނުވާފައި ކަމަށެވެ.

އޮޑިޓު ރިޕޯޓުގައި ބުނީ 2020 ވަނަ އަހަރުން ފެށިގެން އޭޕްރީލް 2024 ގެ ނިޔަލަށް 373،988 ޑޮލަރު ގަތުމަށް 5.8 މިލިއަން ރުފިޔާ ޕީއެސްއެމްގެ ބޭންކް އެކައުންޓުން ނެގި ކަމަށާއި އެކަމަކު އޭގެ ތެރެއިން 80 ޕަސެންޓު ފީއެސްއެމަށް ނުލިބޭ ކަމަށެވެ. ޕީއެސްއެމަށް ލިބުނީ އެ ރުފިޔާއަށްވާ ޑޮލަރުގެ ތެރެއިން އެންމެ 76،731 ޑޮލަރެވެ. ބާކީ 297،257 ޑޮލަރު އެ ކުންފުންޏަށް ވަދެފައިވާކަން އެނގެން ނެތް ކަމަށް އެ ރިޕޯޓުގައި ވެ އެވެ.

އެ މައްސަލައާ ގުޅިގެން، ފައިނޭންސް ޑިރެކްޓަރު އަހުމަދު ހަނީފު ސަސްޕެންޑް ކުރީ މިދިޔަ އޭޕްރީލް މަހުގަ އެވެ. އަދި މެއި މަހު އޭނާ ވަނީ ވަޒީފާ އިން ވަކިކޮށްފަ އެވެެ.

އެ މައްސަލަ ފުލުހުންނަށް ހުށަހެޅީ ޕީއެސްއެމުންނެވެ.

އޮޑިޓަ ޖެނެރަލްގެ ރިޕޯޓުގައިވާ ގޮތުން، އޮންލައިންކޮށް ޑޮލަރު ގަންނަން ހިންގި މުއާމަލާތެއްގައި 1.3 މިލިއަން ރުފިޔާއަށްވާ 75،491 ޑޮލަރަށް 1.2 މިލިއަން ރުފިޔާ ހަނީފުގެ ދަރިއެއްގެ ބޭންކް އެކައުންޓަށް އެކި ފަހަރު މަތިން ޖަމާކޮށްފައިވެ އެވެ. އޮންލައިން ޓްރާންސްފާ ކޮށްގެން ޑޮލަރުގެ މުއާމަލާތް ހިންގުމުގެ ނަމުގައި 405،122ރ. ގެ ޕޭމަންޓް ވައުޗާތަކުގައި ހުއްދަ ދިނުމުގެ ގޮތުން ސޮއިކޮށްފައި ވަނީ ވެސް ހަނީފު އެކަނި ކަމަށާއި އެއްވެސް މީހަކު ސޮއިނުކޮށް 30،000ރ. ގެ މުއާމަލާތް ހިންގާފައިވާ ކަމަށް އެ ރިޕޯޓުގައި ވެ އެވެ.

އެ މައްސަލާގައި އޮޑިޓާ ޖެނަރަލް އޮފީހުން ވެސް އަންގާފައި ވަނީ ޑޮލަރު ގަތުމަށާއި އާމްދަނީން އަދި ނަގުދު ފައިސާގެ ތެރެއިން ގެއްލުނު ނުވަ މިލިއަން ރުފިޔާ ހޯދުމަށް، އެ ކަންކަމުގައި ޒިންމާވާ ފަރާތްތައް ހޯދައި ފިޔަވަޅު އެޅުމަށް، އޭސީސީ އަށް އެންގުމަށެވެ.