ދެއްވަދު އަށް ދިޔަ ފިޝަރީޒް މިނިސްޓްރީގެ ޓީމަކަށް އެ ރަށުގެ މަސްވެރިން ހުރަސްއަޅައިފި

މަސްދޯނިތަކުގައި މަސް ފިނި ކުރާ އާރްއޯ ޕްލާންޓް އެޅުމަށް ދޫކުރާ ލޯނާ ގުޅޭ މައުލޫމާތު ދިނުމަށް ގއ. ދެއްވަދު އަށް މިއަދު ދިޔަ ފިޝަރީޒް މިނިސްޓްރީގެ ޓީމަކަށް އެ ރަށުގެ މަސްވެރިން ހުރަސްއަޅައިފި އެވެ.

އެ މިނިސްޓްރީގެ ޓީމެއް މިއަދު މެންދުރު ދެއްވަދު އަށް ދިއުމުން މަސްވެރިން ވަނީ ނުރުހުން ފާޅުކޮށް، އެ ޓީމު ރަށުން ފައިބަން މަޖުބޫރު ކޮށްފަ އެވެ. އެ މަންޒަރު ފެންނަ ވީޑިއޯތައް ވެސް ސޯޝަލް މީޑިއާގައި ދަނީ ދައުރުވަމުންނެވެ. އެ ޓީމުގެ ބޭފުޅުން ވަށާލައި އަޑުގަދަކުރާތަން ވެސް އެ ވީޑިއޯތަކުން ފެނެ އެވެ.

ފިޝަރީޒް މިނިސްޓްރީގެ ޓީމާ އެކު ދެއްވަދު އަށް ވަޑައިގެންނެވި ޑެޕިއުޓީ މިނިސްޓަރު އަހްމަދު ޝާފިއު "މިހާރު" އަށް ވިދާޅުވީ އެ ރަށުގެ މަސްވެރިންގެ މައިގަނޑު ޝަކުވާއަކަށް ވީ މަސްވެރިންނަށް ލިބެން ޖެހޭ ފައިސާ ލިބުން ލަސްވުން ކަމަށެވެ.

ޝާފިއު ވިދާޅުވީ އެއީ އިއްޔެ ދެއްވަދު އަށް ކުރަން ރާވާފައި އޮތް ދަތުރެއް ކަމަށް ވިޔަސް، މަސްވެރިންގެ ޝަކުވާތައް ހުރުމުން މިއަދަށް ދަތުރު ފަސްކުރީ ކަމަށެވެ. މިނިސްޓްރީގެ ޓީމު އެ ރަށަށް ދިޔައިރު ވެސް ބައެއް މަސްވެރިންގެ ހިތްހަމަނުޖެހުންތަކެއް ހުރިކަން އެނގިވަޑައިގަންނަވާ ކަމަށް އޭނާ ވިދާޅުވި އެވެ.

އެ ޓީމުގައި ޝާފިއުއާ އެކު، ހިމެނެނީ އިތުރު ހަތަރު ބޭފުޅުންނެވެ. އޭނާ ފިޔަވައި އެ ޓީމުގައި ދެން ހިމެނެނީ އެ ލޯނު ދޫކުރާ އިސްލާމިކް ޑިވެލޮޕްމަންޓް ފަންޑް ބޭންކް (އައިއެސްޑީބީ) ގައި ލޯނު ދޫކުރުމުގެ ކަންކަން ކުރާ މުވައްޒަފުންނެވެ.

އޭނާ ވިދާޅުވި ގޮތުގައި، މިނިސްޓްރީގެ ޓީމު ދެއްވަދު އަށް ދިޔައީ ވެސް މި ލޯނާ ގުޅޭ މައުލޫމާތު ސާފުކޮށްދޭން ދިއުމަށް އެ ރަށުގެ ބައެއް އޮޑިވެރިން އެދިފައި ވާތީ އެވެ.

"މަސްވެރިންގެ ހިތްހަމަނުޖެހުން ހުރިކަން އެނގޭ. އެކަމަކު ވެސް، ފައިސާގެ މައްސަލަ ހައްލު ނުވެ އަދި އޮތަސް މަސްދޯނިފަހަރަށް އައިސް ނުލިބުމާއި އައިހަށް ހޭދަކުރަން ޖެހޭ ހޭދަވެސް ވަރަށް ބޮޑު،" އޭނާ ވިދާޅުވި އެވެ.

"އެހެންވީމާ، މިހާރު އިއުލާންކޮށްފައި އޮތް ލޯނަކީ މަސްވެރިންނަށް ވަރަށް ހަރަދު ކުޑަކޮށް ދޯނީގައި އައިސްޕްލާންޓާއި ޖަނަރޭޓަރު އެޅޭ ލޯނަކަށް ވުމާއި އަދި ގއ، ގދ ގައި އައިސްޕްލާންޓް ހަރުނުކޮށް ހުރި ދޯނިތައް އެންމެ ގިނައިން އޮތީ ދެއްވަދޫގައި ކަމަށް ވާތީ، ދެއްވަދޫން އިއްޔެ ހަވީރާއި ރޭގަނޑު ވެސް ރިކުއެސްޓް އައީމާ އެ ރަށަށް ދިޔައީ."

އެ ޓީމުން އަންނަނީ ގއ. އަދި ގދ. ގެ ރަށްރަށަށް ޒިޔާރަތްކޮށް، މި ލޯނާ ގުޅޭ މައުލޫމާތު އޮޑިވެރިންނަށް ދެމުންނެވެ.

ފިޝަރީޒް މިނިސްޓްރީގެ މި ޓީމުން އިއްޔެ ގއ. ދާންދު އަށް ދިއުމުން ވެސް އެ ރަށުން ވެސް ބަޔަކު ވަނީ ހުރަސް އަޅައިފަ އެވެ.

ޝާފިއު ވިދާޅުވީ މި ލޯނުން މަސްވެރިންގެ ފައިސާގެ މައްސަލަ ހައްލު ނުވިޔަސް، މަސްވެރިކަން މިހާރު އޮތް ހާލަތުން 100 ވަރަކަށް އޮޑިވެރިންނަށް ހަރަދު ކުޑަކޮށް، ދޯނީގައި މަސް ރައްކާކުރެވޭނެ ގޮތް ފަހިވާނެ ކަމަށެވެ.

އައިސް ޕްލާންޓް ނާޅާ 130 ވަރަކަށް މަސްދޯނި އޮތް ކަމަށް ބެލެވޭ ކަމަށް އޭނާ ވިދާޅުވި އެވެ.

އޭނާ ވިދާޅުވި ގޮތުގައި، މި ވަގުތު ރާއްޖޭގެ ހަތަރު އަތޮޅެއް ފިޔަވައި އެހެން ހުރިހާ އަތޮޅެއްގައި މިނިސްޓްރީގެ ޓީމުތައް އަންނަނީ މި ލޯނާ ގުޅޭ މައުލޫމާތު އޮޑިވެރިންނަށް ދިނުމަށް މަސައްކަތް ކުރަމުންނެވެ.

މަސްވެރިން ބާނާ މަސް ގަތުމަށް ފަހު 48 ގަޑިއިރުގެ ތެރޭގައި އެއަށް ވާ ފައިސާ ދިނުމަކީ ރައީސް ޑރ. މުހައްމަދު މުއިއްޒުގެ ވައުދެކެވެ. އެކަމަކު، މި ސަރުކާރު އައިރު މަސްވެރިންނަށް ގިނަ އަދަދެއްގެ ފައިސާ ނުދީ ހުރުމުން ފައިސާ ދިނުމުގައި ސަރުކާރަށް ބޮޑެތި ގޮންޖެހުންތައް ކުރިމަތިވި އެވެ. އެ ގޮންޖެހުންތަކާ އެކު، ސަރުކާރުން ވަނީ މަސްވެރިން ގިނަ އަދަދެއްގެ ފައިސާ ދޫކޮށްފަ އެވެ.

މިފްކޯ އިން އެންމެ ފަހުން ބުނި ގޮތުގައި، މިދިޔަ އަހަރުގެ ނޮބެމްބަރު 17 އިން ފެށިގެން މި މަހުގެ ތިނެއްގެ ނިޔަލަށް މަސްވެރިންނަށް ވަނީ ޖުމްލަ 862 މިލިއަނަށް ވުރެ ގިނަ ރުފިޔާ ޖަމާކޮށްދީފަ އެވެ.