ހާޝިމްގެ މަރާ ގުޅިގެން ހުށަހެޅި ކަންބޮޑުވުންތައް ފުލުހުން ބަލަނީ

ކުއްލި ގޮތަކަށް މަރުވެފައި އޮއްވައި ފެނުނު ވިޔަފާރިވެރިޔާ ހާޝިމް މުހައްމަދުގެ މަރުގެ މައްސަލައިގެ ތަހުގީގު ނިމިފައި ވަނިކޮށް އާއިލާ އިން ހުށަހެޅި ކަންބޮޑުވުންތަކާ ގުޅިގެން ބަލަން ޖެހޭ ކަންކަން ބަލަމުން އަންނަ ކަމަށް ފުލުހުން މިއަދު ބުނެފި އެވެ.

ހއ. ހޯރަފުއްޓަށް ނިސްބަތްވާ ހާޝިމް މަރުވެފައި އޮއްވައި ފެނުނީ ޖެނުއަރީ 2، 2022 ގަ އެވެ. މާލޭގައި އޭނާ ދިރިއުޅޭ ގޭގައި މަރުވެފައި އޮއްވާ ފެނުނު އިރު، ޝައްކުކުރެވޭ ކަންތައްތަކެއް ހުރުމުން ފުލުހުން މައްސަލަ ތަހުގީގުކުރި އެވެ. އެ ތަހުގީގުން، އެ މަރުގައި އިތުރު ބައެއްގެ ބައިވެރިވުން އޮތް ކަމަށް ނުފެންނަ ކަމަށް ފުލުހުން ބުނެފައިވެ އެވެ.

ހާޝިމްގެ މަރަށް ދެ އަހަރު ފަހުން، އެ މައްސަލަ އަނެއްކާ ފެންމަތިވީ، އޭނާގެ ވިޔަފާރިއާ ގުޅޭ ލިޔުންތައް ފޯޖުކޮށް، އިސްލާމިކް މިނިސްޓްރީގެ ޑެޕިއުޓީ މިނިސްޓަރު އަބްދުލްޖަލީލް އިސްމާއިލްގެ މައްޗަށް ބަދަލުކޮށްފައިވާ ކަމަށް އެ އާއިލާއިން ތުހުމަތުކުރުމުންނެވެ. އެކަމަކު، ހާޝިމްގެ މަރާއި ޖަލީލާ ފުލުހުން އެއްވެސް ވަރަކަށް ނުގުޅުވަ އެވެ.

ފުލުހުން މީޑިއާގައި މިއަދު ބުނީ، ހާޝިމްގެ މަރުގެ މައްސަލައިގައި އެއްވެސް މީހެއްގެ މައްޗަށް ތުހުމަތު ކުރެވޭ އެއްވެސް ކަމެއް ނެތް ކަމަށެވެ.

ފުލުހުންގެ މީޑިއާ އޮފިޝަލަކު ވިދާޅުވީ ހާޝިމްގެ މަރުގެ މައްސަލައިގެ ތަހުގީގަށް ކުރިން އޭނާގެ ފޯނު ގެންދިޔަ ކަމަށެވެ. ބޭނުންވާ ތަހުލީލުތަކަށް ފަހު، ފޯނު އާއިލާއާ ހަވާލުކޮށްފައިވާ ކަމަށާއި އިލެކްޓްރޯނިކްސް އިތުރު އާލާތެއް ނުގެންދާ ކަމަށް އޭނާ ވިދާޅުވި އެވެ.

ފުލުހުންގެ މީޑިއާ އޮފިޝަލް ވިދާޅުވި ގޮތުގައި އެ މައްސަލައިގެ ތަހުގީގު ނިންމާފައިވަނިކޮށް އާއިލާއިން ކަންބޮޑުވުންތަކެއް ހިއްސާކޮށްފައިވާތީ ފުލުހުން ދަނީ ބަލަންޖެހޭ ކަންތައްތައް ބަލަމުންނެވެ.

"މައްސަލަ އަލުން ތަހުގީގުކުރަން ފެށީއެއް ނޫން. ނަމަވެސް، ކަންބޮޑުވާ ކަންތައްތައް ބަލާއިރު އަލުން ތަހުގީގުކުރަން ފެނިއްޖެ ނަމަ އެގޮތަށް ކުރިއަށްދާނެ،" އޮފިޝަލް ވިދާޅުވި އެވެ.

ހާޝިމް ދަންނަ މީހަކު "މިހާރު" އަށް ކުރިން ކިޔައިދިން ގޮތުގައި ހާޝިމް މަރުވީ ބޯ ފަޅައިގެން ދިޔުމުގެ ސަބަބުން ކަމަށް ބެލެވެ އެވެ. އަދި ބޯ ފެޅުމުގެ އިތުރުން ވެސް ޒަހަމްތަކެއް ހުރި ކަަމަށް ވަނީ އެނގިފަ އެވެ.

ހާޝިމް މަރުވެފައި އޮތީ އޭނާ ދިރިއުޅޭ އެޕާޓްމަންޓުގަ އެވެ. އެތަނުގައި އޭނާ މާލޭގައި ހިންގާ ބައެއް ފިހާރަތަކުގައި މަސައްކަތް ކުރާ ބިދޭސީންތަކެއް ވެސް އުޅޭ ކަމަށް އާއިލާ އިން ބުންޏެވެ.

ވާހަކަ ދެއްކި މީހާ ބުނީ ހާޝިމްގެ ބޯ ފަަޅައިގެން ދިޔުމުން "އަމިއްލަ އަށް ޑޮކްޓަރަށް ދާނަމޭ" ބުނި ކަމަށް ބިދޭސީން ބުނި ކަމަށެވެ. އެކަމުގައި ވެސް ސުވާލު އުފެދޭ ކަންކަން ހުރި ކަމަށް އޭނާ ބުންޏެވެ.

"އަޅުގަނޑުމެންނަކަށް ޔަގީނެއް ނުވޭ ރިޕޯޓްކުރީ ހާޝިމް ކަމެއް ނުވަތަ އެ ތަނުން ބިދޭސީ މީހެއް ކަމެއް،" އޭނާ ބުނެފައިވެ އެވެ.