ރާއްޖެ ނުދާނަމޭ ބުނި އަރުޖުންއަށް ރާއްޖެ އާދެވުމުން "ހުވަފެން ހަގީގަތަކަށް"

ރާއްޖެ އާއި އިންޑިއާގެ ގުޅުން ގޯސްވި ދުވަސްވަރު "ދުވަހަކު ވެސް ރާއްޖެއަށް ނުދާނަމޭ" ބުނި އިންޑިއާގެ އެކްޓަރު އަރްޖުން ބިޖްލާނީ ޗުއްޓީއަށް އައިސް ރާއްޖޭގެ ރީތިކަން ސިފަކޮށް، "ހުވަފެން ހަގީގަތަކަށް ވެއްޖެ" ކަމަށް ބުނެފި އެވެ.

ހިންދީ ޑްރާމާތަކުގައި މަޝްހޫރު އެކްޓަރު އަރްޖުން އާއި އޭނާގެ އަންހެނުން ނޭހާ ސްވާމީ އަދި އެ ދެމީހުންގެ ދަރިފުޅު ރާއްޖެ އައީ މީގެ ތިން ދުވަސް ކުރިންނެވެ.

އެ އާއިލާ ޗުއްޓީ ހޭދަކުރަމުން އަންނަނީ ރ. އަތޮޅުގައި އޮންނަ އެމެރަލްޑް މޯލްޑިވްސް ރިސޯޓް އެންޑް ސްޕާގަ އެވެ.

އެ ރިސޯޓުގައި އެ މީހުން ހޭދަކުރި ވަގުތުތައް ފެންނަ ފޮޓޯތަކާއި ރީލްސްތައް ވަނީ އަރްޖުންގެ އިންސްޓަގްރާމްގައި ހިއްސާކޮށްފަ އެވެ.

އަރްޖުންގެ އެއް ޕޯސްޓެއްގެ ކެޕްޝަނެއްގައި ވަނީ ރާއްޖެ އައުމަކީ ހުވަފެނެއް ހަގީގަތަކަށް ވުން ކަހަލަ ކަމެއް ކަމަށް ސިފަ ވެސް ކޮށްފަ އެވެ.

ރާއްޖޭގެ ޑެޕިއުޓީ މިނިސްޓަރުންތަކެއް އިންޑިއާގެ ބޮޑުވަޒީރު ނަރެންދުރަ މޯދީއަށް ކުޑައިމީސްކޮށް އެކްސްގައި ކުރި ޕޯސްޓުތަކަކާ ގުޅިގެން އަރްޖުން އޭރު ކުރި ޕޯސްޓެއްގައި ބުނެފައި ވަނީ "ރާއްޖެއަށް ދުވަހަކު ވެސް ނުދަން އަދި ދެން ދުވަހަކު ވެސް ނުދާނަން،" ކަމަށެވެ.

އަރްޖުން އެހެން ބުނުމަށް ފަހު ރާއްޖެ އައުމުން އިންޑިއާގެ މީޑިއާތަކުން ވެސް އޭނާއަށް ދަނީ ފާޑުކިޔަމުންނެވެ.

ދެ ގައުމުގެ ގުޅުން ގޯސްވި ދުވަސްވަރު އިންޑިއާގެ މަޝްހޫރު ވަރަށް ގިނަ އެކްޓަރުން ވަނީ ރާއްޖެއަށް ފާޑުކިޔައިފަ އެވެ. އަދި ރާއްޖެއާ ދެކޮޅަށް އޭރު އިންޑިއާއިން ހިންގި "ބޮއިކޮޓް މޯލްޑިވްސް" ކެމްޕެއިންގައި ވެސް އެ ތަރިން ބައިވެރިިވި އެވެ.

ނަމަވެސް، ރާއްޖެ އާއި އިންޑިއާގެ ގުޅުން މިހާރު ރަނގަޅުވެފައި ވާތީ، އިންޑިއާގެ ސެލެބްރިޓީން ރާއްޖެ އައުން ވަނީ އަނެއްކާވެސް އިތުރުވާން ފަށައިފަ އެވެ.