ޖަލު އޮފިސަރުންގެ މައްސަލަ: ތިން މީހަކާ އެކު އިއުތިރާފްގެ އެއްބަސްވުމެއް ދައުލަތުން ހަދައިފި

މާފުށީ ޖަލަށް ފޯނާއި މަނާ ތަކެތި ވައްދައިގެން ގިނަ އަދަދެއްގެ ފައިސާ ހޯދިކަމުގެ ތުހުމަތުގައި ދައުލަތުން ދައުވާކުރި ކަރެކްޝަނަލް ސާވިސް ފަސް އޮފިސަރުންގެ ތެރެއިން ތިން މީހަކާ އެކު އިއުތިރާފްގެ އެއްބަސްވުމެއް ދައުލަތުން ހަދައިފި އެވެ.

މިދިޔަ ޖޫން މަހު ފުލުހުން ހިންގި ހާއްސަ އޮޕަރޭޝަނެއްގައި، ޖަލަށް މަސްތުވާތަކެއްޗާއި ފޯނު ވައްދައިގެން 73 މިލިއަނަށް ވުރެ ގިނަ ރުފިޔާ އެކި ފަހަރު މަތިން ހޯދި މައްސަލާގައި 18 މީހަކު ހައްޔަރުކުރި ނަމަވެސް ދައުވާކުރަން ފޮނުވީ އޭގެ ތެރެއިން 13 މީހެއްގެ މައްޗަށެވެ.

އެ މައްސަލާގައި ދައުލަތުން ދައުވާ ކުރަނީ ރ. އުނގޫފާރު އައިވަރީހައުސް، ޖިނާހް އަބްދުއްރަހީމާއި ނ. ލަންދޫ ކާމިނީގޭ އަލީ އަސްފާގާއި ކ. މާފުށީ ބީޗްހައުސް، އަލީ ޝަހީމާއި ގއ. ވިލިނގިލީ ކުއްޅަވައްގޭ މުހައްމަދު ފަތޫހު ފަތުހުﷲ އާއި ހދ. ނޭކުރެންދޫ ތަރާނާގޭ އަލީ ނާޒިމްގެ މައްޗަށެވެ. ހެކި ނެތުމުގެ ސަބަބުން، ބާކީ ތިބި 8 މީހުންނަށް ދައުވާ ނުކުރަން ޕްރޮސެކިއުޓާ ޖެނެރަލްގެ އޮފީހުން އޮތީ ނިންމައިފަ އެވެ.

އޭގެ ތެރެއިން ޖިނާހާއި ޝަހީމްގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ އާއި މަނީ ލޯންޑްރިންގެ ދައުވާ އާއި ނުހައްގު މުއްސަނދިކަން ލިބިގަތުމުގެ ދައުވާ ކުރާއިރު، ބާކީ ތިބި ތިން މީހުންގެ މައްޗަށް ކުރަނީ ނުހައްގު މުއްސަނދިކަން ހޯދުމާއި ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމުގެ ދައުވާ އެވެ.

އެ ފަސް މީހުންގެ ޝަރީއަތް ފަށައި، ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ދައުލަތުން ބުނީ އޭގެ ތެރެއިން ޖިނާހާއި ފަތޫހު އަދި އަސްފާގާ އެކު އިއުތިރާފްގެ އެއްބަސްވުމެއް ހަދާފައިވާ ކަމަށެވެ. ނަމަވެސް އެ އެއްބަސްވުމުގެ ދަށުން، އެ މީހުންގެ އަދަބަށް ދޭން ނިންމާފައިވާ ލުއިތަކެއް ދައުލަތުން ހާމައެއް ނުކުރެ އެވެ.

އެކަމާ ގުޅިގެން ދިފާއީ ވަކީލުން ބުނީ އިއުތިރާފްގެ އެއްބަސްވުމާ އެކު، ކުރިއަށް ދިއުމުގެ ކުރިން މައްސަލާގެ ބައެއް ލިޔުންތައް ދިރާސާކުރަން ބޭނުންވާ ކަމަށެވެ. ބައެއް ލިޔުންތައް ނެތުމުން އެ ލިޔުންތައް ހޯދަން ބޭނުންވާ ކަމަށް ވަކީލުން ބުންޏެވެ.

އެހެންވެ، ލިޔުންތައް ހޯދުމަށް އެ މައްސަލަ ބައްލަވާ ގާޒީ އިސްމާއިލް ޝަފީއު ފުރުސަތު ދެއްވި އެވެ. މަދުވާ ކަމަށް ފާހަގަވާ ލިޔުންތައް ވަކީލުން ފާހަގަ ކުރުމަށް ފަހު 10 ދުވަސް ތެރޭގައި ޕްރޮސެކިއުޓާ ޖެނެރަލްގެ އޮފީހަށް އެކަން އެންގުމުން ދައުލަތުން އޭގެ ޖަވާބެއް ވަކީލުންނަށް ދޭން ވާނެ ކަމަށް ގާޒީ ވިދާޅުވި އެވެ.

ފަތޫހުގެ ވަކީލެއް ނެތުމުން ވަކީލަކު ހަމަޖައްސަން އޭނާއަށް ގާޒީ ފުރުސަތު ދެއްވި އެވެ.

އޭގެ ތެރެއިން ފަތޫހު ފިޔަވައި ދެން ތިބި މީހުން ތިބީ ބަންދުކޮށްފަ އެވެ.