ހަރަދުކުޑަކުރުމުގެ ފިޔަވަޅުތަކެއް އަޅަން ޔުނައިޓެޑަށް މަޖުބޫރު ވެއްޖެ

މެންޗެސްޓާ (އޮކްޓޯބަރު 2) – މެންޗެސްޓާ ޔުނައިޓެޑަށް މާލީ ގެއްލުންތައް ކުރިމަތިވުމުން އެ ކަލްބްގެ ހަރަދުތައް ކުޑަކުރަން މަޖުބޫރު ވެއްޖެ އެވެ.

މިދިޔަ ސީޒަނުގައި ޔުނައިޓެޑަށް 132 މިލިއަން ޕައުންޑްގެ ގެއްލުމެއް ކުރިމަތިވި އެވެ. އެ ވެއްޓުން ފޫބައްދަން ޔުނައިޓެޑުން ހަރަދުތައް ކުޑަކުރާއިރު އެ ޓީމުގެ ކޯޗު އެރިކް ޓެން ހަގްގެ ޕްލޭންތަކަށް އަސަރުކުރާނެ އެވެ.

ޔުނައިޓެޑްގެ ނަތީޖާތައް ގޯސްވުމުން ޓެން ހަގް މިހާރު ވެސް ހުރީ ޕްރެޝަރުގެ ތެރޭގަ އެވެ.

އޭނާ އަށް އިތުބާރުކޮށް މަގާމުގައި ދެމެހެއްޓުމުގެ ވިސްނުން ޔުނައިޓެޑްގެ ވެރިން ގެންގުޅެ އެވެ. އެކަމަކު އޭނާ ބޭނުންވާ ވަރަށް ހަރަދުކޮށްދިނުމުގެ ވިސްނުމެއް އެ ކްލަބުން ނުގެންގުޅޭ ކަމަށް މީޑިއާ ރިޕޯޓްތައް ބުނެ އެވެ.

ޔުނައިޓެޑްގެ މާލީ ހިސާބުތަކުން ފެންނަ ގޮތުގައި އެ ކްލަބުން އެންމެ ބޮޑު ހޭދައެއް ކުރީ ފިރިހެން ފުޓްބޯޅަ ޓީމުގެ ޓްރާންސްފާއަށެވެ.

ހަރަދުކުޑަ ކުރުމުގެގޮތުން ޔުނައިޓެޑްގެ ކޯ އޯނަރު ޖިމް ރެޓްކްލިފް ވަނީ ބައެއް ފިޔަވަޅުތައް އަޅައިފަ އެވެ. ޓީމުގެ އެކި ޑިޕާޓްމެންޓްތަކަށް ދޫކޮށްފައިވާ ކްރެޑިޓް ކާޑުތައް އޭނާ ވަނީ ކެންސަލްކޮށްފަ އެވެ.

ކްލަބްގެ އެކި ޑިޕާޓްމެންޓްތަކުގައި ވަޒީފާ އަދާކުރާ 250 މުވައްޒަފަކު ވަޒީފާއިން ވަކިކުރުމަށް، މިދިޔަ މަހު އެ ކްލަބުން ވަނީ ނިންމައިފަ އެވެ. އަދި އެ މަގާމުތައް އެކީއެކައްޗަކަށް އުވާލުމަށް ވެސް ރެޓްކްލިފް ވަނީ ނިންމައިފަ އެވެ.