ޓެން ހަގްގެ ކިބައިން ބްރުނޯ މައާފަށް އެދިއްޖެ

މެންޗެސްޓާ (ނޮވެމްބަރު 4) – މެންޗެސްޓާ ޔުނައިޓެޑްގެ ކޯޗުކަމުން މިދިޔަ ހަފުތާގައި ވަކި ކުރި އެރިކް ޓެން ހަގްގެ ކިބައިން، އެ ޓީމުގެ ކެޕްޓަން ބްރުނޯ ފެނާންޑޭޒް މައާފަށް އެދިއްޖެ އެވެ.

ޗެލްސީއާ ދެކޮޅަށް ކުޅެ އެއްވަރުވި މެޗަށް ފަހު ބްރުނޯ ބުނީ، ނަތީޖާ ގޯސް ވުމުން ޒިންމާ ނަގަން ޖެހޭނީ ހަމައެކަނި ކޯޗު ނޫން ކަމަށެވެ.

"ކުޅުންތެރިން ވެސް އެކަމުގައި އެއްވަރަށް ހިއްސާ ވާން ޖެހޭނެ،" ރޭ ގެ މެޗުގައި ޔުނައިޓެޑަށް ލަނޑު ޖަހައިދިން ބްރުނޯ ބުންޏެވެ.

އޭނާ ބުނީ 11 ކުޅުންތެރިން ވަކިކޮށް ފޮނުވާލުން އެއީ އުނދަގޫ ކަމެއް ކަމަށެވެ. އެހެންވެ ނަތީޖާ ގޯސްވުމުން އަބަދުވެސް މަގާމު ގެއްލޭ މީހަކަށް ވާނީ ކޯޗު ކަމަށެވެ.

"މެނޭޖަރަކު [ކޯޗަކު] މަގާމު ދޫކޮށްލަން ޖެހޭތަން ފެންނަ ކޮންމެ ފަހަރަކު އޭގެ ޒިންމާގެ ބައެއް ކުޅުންތެރިން ވެސް އަމިއްލަ އަށް ނަގަން ޖެހެނެ. އެއީ ޓީމު އެހާ ރަނގަޅަށް ނުކުޅެވޭތީ،" ޕޯޗުގަލްގެ މިޑްފީލްޑަރު ބުންޏެވެ.

"ޓީމުގެ 15 ކުޅުންތެރިން ފޮނުވާލުމަށް ވުރެ މެނޭޖަރު [ކޯޗު] ފޮނުވާލުން ފަސޭހަ. މެނޭޖަރު [ޓެން ހަގް] އާ ވާހަކަ ދައްކައިގެން އަހަރެން މައާފަށް އެދުނިން. މާޔޫސްވީ އޭނާ ދިޔައީމަ. އޭނާގެ ކޯޗުކަމުގައި އޭނާ އަށް ސަޕޯޓް ދިނުމަށް އަހަރެމެން މަސައްކަތް ކުރިން. އެކަމަކު އަހަރެންނަށް ގޯލު ޖަހަނީކީ ނޫން. ގޯލު ނުޖެހި އަހަރެންނަށް ޒިންމާއަދާ ނުކުރެވޭކަން ގަބޫލުކުރަން. (އެހެންވެ އަހަރެން މައާފަށް އެދުނީ."

ޔުނައިޓެޑްގެ ވަގުތީ ކޯޗު ރޫޑް ވެން ނިސްޓެލްރޯއީގެ ކޯޗުކަމުގެދަށުން ޕްރިމިއާ ލީގުގައި ކުޅުނު ފުރަތަމަ މެޗުން ރޭ އެއްވަރުވީ ލީޑް ނެގީތާ ހަތަރު މިނެޓް ފަހުންނެވެ.

ޔުނައިޓެޑްގެ ކޯޗުކަމާ ހަވާލުވާނީ ސްޕޯޓިން ލިޒްބަންގެ ކޯޗު ރުބެން އަމޯރިމް އެވެ. އޭނާ ޓީމާ ހަވާލުވާނީ އަންނަ ހޯމަ ދުވަހު އެވެ.