ޑިޑީ އަށް ޖިންސީ ގޯނާ އާއި މުޑުދާރު އެތައް އަމަލެއްގެ ތުހުމަތު

އެމެރިކާގެ ރެޕް ލަވަކިޔުންތެރިޔާ އަދި މިއުޒިކް ޕްރޮޑިއުސަރު ޝޯން ޖޯން ކޮމްބްސް ނުވަތަ މަޝްހޫރު ނަމުން ނަމަ ޕީ ޑިޑީއަށް މުޑުދާރު އެތައް އަމަލެއްގެ ތުހުމަތު ވަނީ ކޮށްފަ އެވެ. އޭގެ ތެރެއިން ބައެއް މައްސަލަތަކުގެ ތުހުމަތުގައި އޭނާ މިހާރު ވަނީ ހައްޔަރުކޮށްފަ އެވެ.

ރެޕް މިއުޒިކްގައި އެންމެ ކާމިޔާބު އެއް ފަންނާނު ކަމަށްވާ ޑިޑީއަކީ ހޮލީވުޑާއި މިއުޒިކް އިންޑަސްޓްރީގެ އެންމެ މަޝްހޫރު ތަރިން ގެންގޮސްގެން ބޮޑެތި ޕާޓީތައް ބޭއްވުމަށް ވެސް މަޝްހޫރު މީހެކެވެ.

ނަމަވެސް، ޑިޑީގެ ކުރީގެ ލޯބިވެރިޔާ ކެސެންޑްރާ އެލިޒަބަތު ވެންޓުރާ އޭނާގެ މައްޗަށް ވަރަށް ސީރިއަސް ތުހުމަތުތަކެއްކޮށް، ނިއު ޔޯކުގެ ކޯޓަކަށް މިދިޔަ އަހަރުގެ ޑިސެމްބަރު މަހު ހުށަހެޅި މައްސަލައާ އެކު ވަރަށް ގިނަ ކަންކަން ފަޅާއަރަން ފެށި އެވެ. ކެނެސްޑްރާ ތުހުމަތުކުރި ގޮތުގައި، ޑިޑީ ވަނީ އެ މީހުން ރަށްޓެހިވެގެން އުޅުނު 10 އަހަރު ދުވަހުގެ ތެރޭގައި އޭނާ އަށް ޖިސްމާނީ އަނިޔާ އާއި ޖިންސީ އަނިޔާ އަދި ރޭޕް ވެސް ކޮށްފަ އެވެ. އެ ހުރިހާ ކަމެއް ޑިޑީގެ ކައިރީގައި އުޅޭ އޭނާގެ "ނެޓުވޯކު"ގެ މީހުންނަށް އެނގި ތިބެ ވެސް ހުއްޓުވާފައި ނުވާ ކަމަށް އޭނާ ބުންޏެވެ.

ނަމަވެސް، އެ މައްސަލަ ކޯޓަށް ހުށަހެޅުމަށް ފަހު ވަނީ އަނބުރާ ގެންގޮސްފަ އެވެ. އެ މައްސަލަ އަނބުރާ ގެންދިޔައީ އޭނާ އާއި ޑިޑީއާ ދެމެދުގައި ކޯޓުން ބޭރުގައި ވި އެއްބަސްވުމެއްގެ ދަށުން ކަމަށް ކެސެންޑްރާގެ ވަކީލުން ބުނެފައިވެ އެވެ. އެކަމަކު، އެ އެއްބަސްވުމާ ގުޅޭ އެއްވެސް ތަފުސީލެއް ނުދެ އެވެ.

ކެސެންޑްރާ އެ މައްސަލަ ހުށަހެޅި ހަފުތާގައި އިތުރު ދެ އަންހެނަކު ވެސް ޑިޑީ އަށް ހަމަ އެ ކަހަލަ ތުހުމަތުތަކެއްކޮށް ކޯޓަށް މައްސަލައެއް ހުށަހަޅާފައިވެ އެވެ. އެ ތަނުން އެކަކު ބުނި ގޮތުގައި، ޑިޑީ ވަނީ އޭނާ އަށް ގަދަކަމުން މަސްތުވާތަކެތި ދިނުމަށް ފަހު ޖިންސީ އަނިޔާކޮށްފަ އެވެ. އޭނާ އަށް ޖިންސީ އަނިޔާކުރާ މަންޒަރު ރިކޯޑްކޮށް، އެ ވީޑިއޯ މީހުންނަށް ބެހި އެވެ.

އޭގެ ފަހުން ހަމަ އެ މަހު އިތުރު އަންހެނަކު ވަނީ ޑިޑީ އާއި އޭނާ ގާތް ބަޔަކާ ދެކޮޅަށް މައްސަލައެއް ހުށަހަޅައިފަ އެވެ. އެއީ ސެކްސް ޓްރެފިކިން އާއި ގޭންގް ރޭޕްގެ ތުހުމަތާ އެކުގަ އެވެ. އަނިޔާ ލިބުނުއިރު އޭނާގެ އުމުރަކީ 17 އަހަރުގައި ކަމަށް ވެސް ބުންޏެވެ.

އޭގެ ފަހުން މިއަދާ ހަމައަށް އޭނާގެ މައްޗަށް ތުހުމަތުވާ މި ކަހަލަ އެތައް މައްސަލައެއް ވަނީ ފެންމަތިވެފަ އެވެ.

ރިޕޯޓްތައް ބުނި ގޮތުގައި، އޭނާގެ ފަރާތުން އަނިޔާ ލިބިގެން ސަތޭކަވިއްސަށް ވުރެ ގިނަ މީހުން ވަނީ ތުހުމަތުތައް ކޮށްފަ އެވެ. އޭގެ ތެރޭގައި އަންހެނުންނާއި ފިރިހެނުން ވެސް ހިމެނެ އެވެ. ބައެއް މީހުންނަށް އަނިޔާކޮށްފައި ވަނީ އެ މީހުން ކުޑައިރު އެވެ. މައިގަނޑު ގޮތެއްގައި އޭނާ އަށް ތުހުމަތުކޮށްފައި ވަނީ ޖިންސީ ގޯނާކުރުމާއި ރޭޕްކުރުމާއި ގަދަކަމުން މަސްތުވާތަކެތި ދީގެން ޖިންސީ އަނިޔާކުރުމާއި އަނިޔާކުރާ މަންޒަރުތައް ވީޑިއޯކުރުމާއި ކުޑަކުދިންނަށް ޖިންސީ ގޯނާކުރުން އަދި ބްލެކްމެއިލްކުރުމެވެ.

އެ އެންމެން ވެސް، އަންނަނީ އޭނާއާ ދެކޮޅަށް ދައުވާކުރަން ތައްޔާރުވަމުން ކަމަށް ރިޕޯޓްތައް ބުންޏެވެ.

އެ މުޑުދާރު އަމަލުތައް ހިންގުމުގައި އޭނާއާ އެކު ހޮލީވުޑްގެ ބައެއް ތަރިންނާއި ބައެއް ސިޔާސީ މީހުން ވެސް ބައިވެރިވި ކަމަށް ތުހުމަތުކުރެ އެވެ.

އެފްބީއާ އާއި އެމެރިކާގެ ހޯމްލޭންޑް ސެކިއުރިޓީން ވަނީ ޑިޑީގެ ގެތަކާއި އެހެން ޕްރޮޕަޓީތައް ބަލައި ފާސްކޮށް، މި މައްސަލައާ ގުޅޭ ހެކިތައް ވެސް އެއްކޮށްފަ އެވެ. އެ ތަންތަނުން ވަނީ ގިނަ އަދަދެއްގެ މަސްތުވާތަކެއްޗާއި 1،000 ފުޅި ބޭބީ އޮއިލް އާއި ލުބްރިކޭންޓާއި ވަރަށް ގިނަ އަދަދެއްގެ އޭއާރު-15 ބަޑި އާއި ވަޒަން ވެސް ފެނިފަ އެވެ.

އެ މައްސަލަތަކުގެ ތުހުމަތުގައި އޭނާ ހައްޔަރުކުރީ މިދިޔަ މަހު 16 އިގަ އެވެ. އެމެރިކާގެ އޭޖީ އޮފީހުން ވަނީ އޭނާގެ މައްޗަށް ތިން ދައުވާއެއް ކޮށްފަ އެވެ. އެއީ، ގަދަކަމުން މީހުން ލައްވައި ސެކްސް ޓްރެފިކިންކުރުވުމާއި މީހުންގެ ނުގަބޫލުގައި ގަދަބާރުން ކަންކަން ކުރުވުމާއި ހަށިވިއްކުމުގެ ވިޔަފާރިކުރުމުގެ ތުހުމަތެވެ.

އެ ހުރިހާ ތުހުމަތަކަށް ޑިޑީ ވަނީ ކޯޓުގައި އިންކާރުކޮށްފަ އެވެ.

ކަފާލާތުގެ ދަށުން އޭނާ މިނިވަންކޮށްދޭން ކޯޓުގައި އެދުނު ނަމަވެސް، އޭނާ ދޫކޮށްލުމަކީ މުޖުތަމައަށް އޮތް ނުރައްކަލެއް ކަމަށް ފެންނާތީ ކޯޓުން ނިންމީ އޭނާ ބަންދުން ދޫކޮށްނުލައި ޝަރީއަތް ކުރިއަށް ގެންދާށެވެ.

ޑިޑީއަކީ ހޮލީވުޑްގެ މަޝްހޫރު ވަރަށް ގިނަ ތަރިންނާ ވަރަށް ގާތް ގުޅުމެއް ބޭއްވި މީހެކެވެ. އޭގެ ތެރޭގައި ޖަސްޓިން ބީބާ، ކިމް ކަޑޭޝިއަން، ލިއޮނާޑޯ ޑިކެޕްރިއޯ، މަރިއާ ކެރީ، ޖެނިފާ ލޮޕޭޒް އަދި ޖޭ-ޒީ ކަހަލަ މަޝްހޫރު އެތައް ފަންނާނުންނެއް ހިމެނެ އެވެ. އެ އެންމެންނަކީ ވެސް ޑިޑީގެ ޕާޓީތަކުގައި ބައިވެރިވި މީހުންނެވެ. ނަމަވެސް، މި މައްސަލަތައް ފެންމަތިވި ފަހުން އެ އިން އެއްވެސް ފަންނާނަކު އަދި އެއްވެސް އެއްޗެއް ބުނެފައެއް ނުވެ އެވެ.