ރައީސް މުއިއްޒުގެ ތާރީހީ ދަތުރުފުޅު އިންޑިއާއަށް ފައްޓަވައިފި

ރައީސް ޑރ. މުހައްމަދު މުއިއްޒުގެ ދެކަނބަލުން އިންޑިއާ އަށް ކުރައްވާ ތާރީހީ ދަތުރުފުޅު، ސަރުކާރުގެ މަތީ ފެންވަރުގެ ވަފުދަކާ އެކު މިއަދު ފައްޓަވައިފި އެވެ.

އިންޑިއާގެ ރައީސް ދުރޫޕަދީ މުރުމޫގެ ދައުވަތަކަށް ކުރައްވާ ފުރަމާނަ މި ދަތުރުފުޅަށް ރައީސް މުއިއްޒު ފުރާވަޑައިގަތީ އާދަކާދައާ އެއްގޮތަށް ރާއްޖޭގެ ރައީސުން އެ ގައުމަށް ކުރައްވާ މިފަދަ ދަތުރުފުޅުތަކަށް އިންޑިއާގެ ސަރުކާރުން ހަމަޖައްސައިދިން ހާއްސަ ފްލައިޓެއްގަ އެވެ.

އަންނަ ބުދަ ދުވަހުގެ ނިޔަލަށް ކުރައްވާ ދަތުރުފުޅުގައި އިންޑިއާގެ ވެރިރަށް ނިއު ދިއްލީގެ އިތުރުން މުމްބާއީ އަދި ބެންގަލޫރަށް ރައީސް ވަޑައިގެން ވިޔަފާރީގެ މަޝްވަރާތައް ކުރައްވާނެ އެވެ. ރައީސް މުއިއްޒުގެ އަރިހުގައި ވަޑައިގަތް، ދިވެހި ސަރުކާރުގެ މަތީ ފެންވަރުގެ ވަފުދުގައި ފޮރިން މިނިސްޓަރު ޑރ. އަބްދުﷲ ޚަލީލް އާއި ޑިފެންސް މިނިސްޓަރު މުހައްމަދު ޣައްސާން މައުމޫނާއި ހޯމް މިނިސްޓަރު އަލީ އިހްސާން އާއި ފިނޭންސް މިނިސްޓަރު މޫސާ ޒަމީރާއި ހެލްތު މިނިސްޓަރު އަބްދުﷲ ނާޒިމް އިބްރާހިމް އާއި އިކޮނޮމިކް މިނިސްޓަރު މުހައްމަދު ސައީދު ހިމެނިވަޑައިގަންނަވަ އެވެ.

މީގެ އިތުރުން، އެޓާނީ ޖެނެރަލް އަހްމަދު އުޝާމް އާއި ޓޫރިޒަމް މިނިސްޓަރު އިބްރާހިމް ފައިސަލް އާއި ޓްރާޏްސްޕޯޓް މިނިސްޓަރު މުހައްމަދު އަމީނާއި ކޮންސްޓްރަކްޝަން އެންޑް އިންފްރާ ސްޓްރަކްޗާ މިނިސްޓަރު ޑރ. އަބްދުﷲ މުއްތަލިބްގެ އިތުރުން ޗީފް އޮފް ސްޓާފް އަބްދުﷲ ފަޔާޒް އާއި ރައީސް އޮފީހުގެ ބައެއް އިސް ބޭފުޅުން ބައިވެރިވެވަޑައިގަތެވެ.

ރައީސް މުއިއްޒު ދިއްލީ އަށް ވަޑައިގަންނަވާތީ އެ ގައުމުގެ މަގުތަކުގައި ދެ ގައުުމުގެ ދިދަ ޖަހައި ވަނީ ވަރަށް ބޮޑަށް ޒީނަތްތެރިކޮށްފަ އެވެ. ރައީސަށް އިންޑިއާ އިން ރަސްމީކޮށް މަރުހަބާ ދެންނެވުން އޮންނާނީ މާދަމާ ހެނދުނެވެ. މި ދަތުރުފުޅުގައި އިންޑިއާގެ ރައީސާއި ބޮޑުވަޒީރު މޯދީއާ ވެސް ރައީސް މުއިއްޒު ބައްދަލުކުރައްވާނެ އެވެ.

އަބަދުވެސް އެކުވެރި، ދެ ގައުމުގެ ގުޅުން އިތުރަށް ބަދަހިކުރުމުގެ ދަތުރުފުޅުގައި ރައީސް މުއިއްޒުގެ އެންމެ ފުރަތަމަ ބައްދަލުވުން މިއަދު ހަވީރު އޮތީ އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރާ އެކުގަ އެވެ. ރައީސް އާއި ބޮޑުވަޒީރު ނަރެންދުރަ މޯދީއާ އެކު ރަސްމީ ވާހަކަތަކާއި އެއްބަސްވުންތަކުގައި ސޮއިކުރުން އޮތީ މާދަމާ އެވެ.

އިންޑިއާގެ ނިއު ދިއްލީގައި ދިރިއުޅޭ ދިވެހިންނާ ރައީސް މުއިއްޒު މިރޭ ބައްދަލުކުރައްވާނެ އެވެ.

ރައީސް މުއިއްޒުގެ މި ދަތުރުފުޅު ތާރީހުގެ ތެރެއަށް ވަދެގެންދާ މައިގަނޑު އެއް ސަބަބަކީ މިއީ މިދިޔަ އަހަރުގެ ނޮވެމްބަރު 17 ގައި އެ މަނިކުފާނު މަގާމާ ހަވާލުވެވަޑައިގެންނެވި ފަހުން އެ ގައުމަށް ކުރައްވާ ފުރަތަމަ ފުރަމާާނަ ދަތުރުފުޅަށް ވުމެވެ. އެކަމަކު، ބޮޑުވަޒީރު ނަރެންދުރަ މޯދީ ތިންވަނަ ދައުރަކަށް މަގާމުގެ ހުވާކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށް މިދިޔަ ޖޫން މަހު ވެސް ރައީސް މުއިއްޒު އިންޑިއާ އަށް ވަޑައިގަތެވެ. އެ ދަތުރުފުޅުގައި މޯދީއާ ބައްދަލުކުރައްވައި ދެ ގައުމުގެ ގުޅުން ހަރުދަނާ ކުރުމުގެ މަޝްވަރާތައް ދެ ބޭފުޅުން ކުރެއްވި އެވެ.

ރައީސް މުއިއްޒު މަގާމާ މަގާމާ ހަވާލުވެވަޑައިގެންނެވި ފަހުން އިންޑިއާގެ ބޮޑުވަޒީރު މޯދީއާ އެންމެ ފުރަތަމަ ބައްދަލުކުރެއްވީ މިދިޔަ އަހަރުގެ ޑިސެމްބަރު މަހު ދުބާއީގައި ބޭއްވި ކޮޕް ސަމިޓުގެ ހަވާސާގެ ތެރެއިންނެވެ.

ރައީސް މުއިއްޒުގެ ދަތުރުފުޅަށް ރާއްޖެ އާއި އިންޑިއާގެ ސަމާލުކަން އެންމެ ބޮޑަށް ހުއްޓިފައިވަނީ މި ވެރިކަމުގެ ކުރީކޮޅު ދެ ގައުމުގެ ގުޅުން ވަރަށް ބޮޑަށް ގޯސްވެ، އެއް ގައުމުން އަނެއް ގައުމަށް އެކި ލެވެލްތަކުގައި ބަހުގެ ހަމާލަތައް ބަދަލުކޮށްފައި ވާތީ އެވެ.

ރާއްޖޭގައި ތިބި އިންޑިއާގެ ސިފައިން ފޮނުވައިލުމަކީ ރައީސް މުއިއްޒުގެ ރިޔާސީ ވައުދެއް ކަމަށް ވާއިރު، އެ އަށް އަމަލު ކުރަން ނިންމުމަކީ ވެސް ގުޅުމަށް އަސަރުކުރި ކަމެކެވެ. އެކަމަކު، ދެ ގައުމުން އެއްބަސްވި ގޮތަށް އިންޑިއާގެ ސިފައިންގެ ބަދަލުގައި އެ ގައުމުގެ މަދަނީ މީހުން ގެންނަން ނިންމައި މަސްރަހު ފިނިކުރި އެވެ. އެއީ އިންޑިއާ އިން ރާއްޖެ އަށް ދީފައިވާ ދެ ހެލިކޮޕްޓަރާއި ޑޯނިއާ މަތިންދާބޯޓު ދުއްވާށެވެ.

ނަމަވެސް ރާއްޖޭގެ ދެ ޑެޕިއުޓީ މިނިސްޓަރަކު ދެ ގައުމުގެ ގުޅުމަށް އަސަރުކުރާ ގޮތަށް އަދި ބޮޑުވަޒީރު މޯދީ އަށް ނިސްބަތްކޮށް ދެއްކެވި ނޭދެވޭ ވާހަކަތަކާ އެކު އިތުރަށް ހޫނުވި އެވެ. އެ މައްސަލާގައި ޔޫތު މިނިސްޓްރީގެ ޑެޕިއުޓީ މިނިސްޓަރުކަމުން މަލްޝާ ޝަރީފާއި މަރިޔަމް ޝިއުނާ އެ ވަގުތު ސަސްޕެންޑްކުރި އެވެ. އެ ދެ ބޭފުޅުން ވަނީ މިދިޔަ ސެޕްޓެމްބަރު 10 ގައި އެ މަގާމުން އިސްތިއުފާ ދެއްވައިފަ އެވެ.