ޒުވާން ވޮލީ ޓީމަށް ފުރަތަމަ މެޗުން ނާކާމިޔާބު

ސްރީލަންކާގައި މިއަދު ފެށި ކާވާ 20 އަހަރުން ދަށުގެ ފިރިހެނުންގެ ވޮލީބޯޅަ ޗެމްޕިއަންޝިޕްގައި ރާއްޖޭގެ ޒުވާން ޓީމު ފުރަތަމަ މެޗުގައި ތުރުކުމެނިސްތާން އަތުން ބަލިވެއްޖެ އެވެ.

ތުރުކުމެނިސްތާނުން މެޗުގެ ސެޓްތައް ގެންދިޔައީ 25-10، 25-13 އަދި 27-25 އިންނެވެ.

ތަޖުރިބާ މަދު ރާއްޖޭގެ ޒުވާން ޓީމު ބަލިވި ނަމަވެސް ފަހު ސެޓުގައި އުންމީދީ ކުޅުމެއް އެޓީމުން ދެއްކި އެވެ. އެގޮތުން ފުރަތަމަ ދެ ސެޓް ގެއްލުނު ނަމަވެސް ތިންވަނަ ސެޓުގައި ރާއްޖޭން ބޮޑު ލީޑެއް ނެގި އެވެ. އެކަމަކު ފަހު ވަގުތު ތުރުކުމެނިސްތާނުގެ ބާރު ހަމަލާތައް ރަނގަޅަށް ރިސީވް ކުރެވޭގޮތް ނުވެ، ސެޓު ގެއްލުނީ އެވެ.

● ރާއްޖޭގެ 20 އަހަރުން ދަށުގެ ވޮލީ ޓީމުގެ ކުޅުންތެރިން: އަލީ އަދުހަމް އަހުމަދު އާދަމް، އަހުމަދު އިލްހާމް އަލީ، އިޔާން އަލީ، އިބްރާހިމް ރާކިން ހަސަން،، މުހައްމަދު ރިއްފަތު، އަހުމަދު މާއީ މުހައްމަދު، ޔައީޝް ރިއްފަތު މުހައްމަދު، މުހައްމަދު އިކުރާމް އިސްމާއިލް ރަޝީދު، ޝާނިފް އަހުމަދު، އަހުމަދު މިފްޒާލް، ޔައިޝް މުހައްމަދު ޝިހާމް، ހަސަން އަލްވިން ޝާހިދު.

މުބާރާތުގައި ވާދަކުރާ ރާއްޖޭގެ ޓީމުގެ ހެޑް ކޯޗަކީ ޑރ. މުހައްމަދު މުނީޒް އެވެ. އަދި ޓީމުގެ މެނޭޖަރަކީ މުހައްމަދު ޝިފާޒް އެވެ.

މި މުބާރާތުގައި، ރާއްޖެ އާއި ތުރުކުމެނިސްތާން އަދި މުބާރާތް ބާއްވާ ގައުމު ސްރީލަންކާގެ އިތުރުން ދެން ވާދަކުރަނީ ނޭޕާލާއި އުޒްބެކިސްތާން އަދި ކިރިގިސްތާނެވެ.

ނޭޕާލް ވަނީ މިއަދު 25-14، 25-23 އަދި 28-26 އިން ސެޓްތައް ގެންގޮސްގެން ސްރީލަންކާ ބަލިކޮށްފަ އެވެ. އަދި އުޒްބަކިސްތާނުން ވަނީ 25-30، 28-26 އަދި 25-10 އިން ސެޓްތައް ކާމިޔާބު ކޮށްގެން ކިރިގިސްތާން ބަލިކޮށްފަ އެވެ.

ރައުންޑް ރޮބިން ބުރުގެ ކުޅުމަށް ފަހު އެއްވަނަ އަދި ދެވަނައިގައި ނިންމާ ޓީމު ކުޅޭ ފައިނަލް މެޗު އޮންނާނީ އަންނަ ހޮނިހިރު ދުވަހު އެވެ. މީގެ އިތުރުން ބާކީ ހަތަރު ޓީމު ވެސް އެ ދުވަހު ރޭންކިން މެޗު ކުޅޭނެ އެވެ.

ރާއްޖޭގެ ދެވަނަ މެޗުގައި މާދަމާ ސްރީލަންކާއާ ދެކޮޅަށް ކުޅޭއިރު، އަންގާރަ ދުވަހު ނުކުންނާނީ ނޭޕާލާ ދެކޮޅަށެވެ. އަދި ބުރާސްފަތި ދުވަހު އުޒްބަކިސްތާނާ ދެކޮޅަށް ކުޅުމަށް ފަހު، ރައުންޑް ރޮބިން ބުރުގެ ފަހު މެޗުގައި ހުކުރު ދުވަހު ކުޅޭނީ ކިރިގިސްތާނާ ދެކޮޅަށެވެ.