ބައްސާމްގެ އެޕާޓްމެންޓް އަތުލުން ފަސްކުރުމުން ފުލުހުންނަށް ގިނަ ފާޑުކިޔުންތަކެއް

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ކުރީގެ ރައީސް ބައްސާމް އަދީލް ޖަލީލު އެފްއޭއެމްގެ ފައިސާއިން ގަނެފައިވާ ކަމަށް ތުހުމަތު ކުރެވޭ އެޕާޓްމަންޓް އަތުލުން ފަސްކުރަން ފުލުހުން ނިންމުމުން އާންމުންގެ ގިނަ ފާޑުކިޔުންތަކެއް ފުލުހުންނަށް އަމާޒުވެއްޖެ އެވެ.

އަމީން އެވެނިއު އިން ބައްސާމް ގަނެފައިވާ އެޕާޓްމަންޓްތައް ފުލުހުންނާ ހަވާލުކުރަން ހުޅުމާލޭ މެޖިސްޓްރޭޓް ކޯޓުން މިދިޔަ މަހުގެ 28 ވަނަ ދުވަހު ނެރުނު އަމުރުގެ ދަށުން، އެ ތަން އިއްޔެގެ ނިޔަލަށް ފުލުހުންނާ ހަވާލުކުރަން ފުލުހުން ކުރިން އެންގި އެވެ.

ނަމަވެސް މިމަހުގެ ނިޔަލަށް އެ މުއްދަތު އިތުރުކޮށްދޭން ބައްސާމްގެ ފަރާތުން އެދުމުން ފުލުހުން އިއްޔެ ވަނީ އެ މުއްދަތު އިތުރުކޮށްދީފަ އެވެ.

ފުލުހުންގެ މީޑިއާ އޮފިޝަލަކު މިއަދު ވިދާޅުވީ އެޕާޓްމަންޓްތައް އަތުލުމުގައި އިންސާނީ ކަރާމާތަށް ހުރުމަތްތެރިކޮށް ހިތުމަށް ކޯޓުން އަންގާފައިވާ ކަމަށެވެ. އެހެންވެ، އެ އެޕާޓްމަންޓްގައި ކުޑަކުދިންނާއި ބޮޑެތި މީހުން ދިރިއުޅޭތީ އެ ތަން ހުސްކުރަން އެކަށީގެންވާ މުއްދަތެއް ދިނުމަށްޓަކައި އެ މުއްދަތު އިތުރުކުރީ ކަމަށް ވިދާޅުވި އެވެ.

ނަމަވެސް، ފުލުހުންގެ އެ ނިންމުމާ މެދު ގިނަ ބައެއްގެ ފާޑުކިޔުން ވަނީ އަމާޒުވެފަ އެވެ.

އެކްސްގައި މީހަކު ކުރި ކޮމެންޓެއް ބުނީ ވައްކަން ކުރާ އާދައިގެ މީހާ ވަގަށް ނަގާ ތަކެތި ވެސް އަނބުރާ ހަވާލުކުރަން އެ މީހަކަށް ފަސޭހަ ވަގުތަކަށް ފުލުހުން މަޑުކުރަން ޖެހޭނެ ކަމަށެވެ.

"މީ އަޅެ ޕޮލިސްގެ ފެންވަރު،" ހޯމް މިނިސްޓަރު އަލީ އިހުސާން ޓެގްކޮށް، ކުރި ޕޯސްޓުގައި ވެ އެވެ.

"މިހާރު"ގެ މި ހަބަރަށް މީހަކު ކުރި ކޮމެންޓެއްގައި ބުނީ ވަގަށް ނަގާ ފޯނާއި ރިހާކުރި ފުޅި ވަގުތުން އަތުލާއިރު، އެ އުސޫލުން މި މައްސަލާގައި ވެސް އަމަލު ކުރެވެން ޖެހޭނެ ކަމަށެވެ.

"އިންސާފު މިނަންވާނީ އެއް ނާޅިއަކުން." އޭނާގެ ކޮމެންޓުގައިވެ އެވެ.

އަހަމަދުﷲގެ ނަމުގައި އެކްސްގައި ކުރި ޕޯސްޓެއްގައި މީހަކު ބުނީ ހަވާލުކުރި އެތައް މިލިއަން ރުފިޔާއެއް ނަހަމަ ގޮތުގައި ބޭނުންކުރި މުއްސަނދި މީހަކަށް އެ ވަރުގެ ލުއިތަކެއް ލިބޭއިރު، އާދައިގެ މީހަކު ފުލުހަކާ ކުރިމަތިލައިފިނަމަ އެއްވެސް ލުޔެއް ނުލިބި، ހަރުކަށި އަދަބު ލިބޭ ކަމަށެވެ.

އެއާއެކު، އޭނާ ދެން ކުރީ ސުވާލެކެވެ.

"މިއީ ޖޯކެއް ނޫން ހެއްޔެވެ."

މި ދެ އެޕާޓްމަންޓް ބައްސާމް ގަނެފައި ވަނީ ކޮވިޑް-19 ގެ ދުވަސްވަރު، ފުޓްބޯޅަ ކްލަބްތަކަށް ދިމާވި މާލީ ހާލަތުން އަރައިގަތުމަށް ފީފާ އިން އެފްއޭއެމްއަށް ދޫކުރި ލޯނު ފައިސާ އިންނެވެ. ފުލުހުން ކުރިން ބުނެފައިވާ ގޮތުގައި އެ ދެ ޕެންޓްހައުސް ގަތުމަށް ބައްސާމް ވަނީ އެފްއޭއެމްގެ ފައިސާ އިން އެއް މިލިއަން އެމެރިކާ ޑޮލަރު އަމިން ކޮންސްޓްރަކްޝަނަށް ދައްކައިފަ އެވެ. އެ ޑޮލަރަށްވާ ދިވެހި ރުފިޔާ އަމިން އިން އެފްއޭއެމަށް ދައްކާފައިނުވާ ކަމަށާއި ނަމަވެސް ފައިސާ ދެއްކި ކަމަށް ހެދުމަށް ލިޔެކިޔުން ތައްޔާރުކޮށްފައިވާ ކަމަށް ފުލުހުން ބުނެފައިވެ އެވެ.

އެ މައްސަލާގައި މިދިޔަ މަހު ފުލުހުން ވަނީ ބައްސާމްގެ މައްޗަށް ދައުވާކޮށްދޭން ވެސް ޕީޖީ އޮފީހަށް ފޮނުވައިފަ އެވެ. އަދި އަމިން ކޮންސްޓްރަކްޝަނާއި އެފްއޭއެމްގެ އޭރުގެ ފައިނޭންސް ހެޑް މުހައްމަދު އަގީލާއި އެ އެސޯސިއޭޝަނުގައި އޭރު މަސައްކަތްކުރި ހަސަން ވަހީދަށް ވެސް ދައުވާކޮށްދޭން އެދިފައިވެ އެވެ.

ބައްސާމްގެ މައްޗަށް ދައުލަތުން ދައުވާކުރާ އެހެން މައްސަލަތަކެއް ކްރިމިނަލް ކޯޓުގައި މިހާރު ވެސް ދަނީ ހިނގަމުންނެވެ.