"ސެންސް މޭކް" ކޮށްލި ޗިންއަށް މާފުށިން ހުދަންބަރެއް ފެނިއްޖެ

ޓިކްޓޮކްގައި "ބިލީވް މީ، ސެންސް މޭކް"ގެ ނަމުން މަޝްހޫރުވި އާސިމް ވަހީދު (ޗިންޗޮން) ކ. މާފުށިން ހުދަންބަރެއް ކަމަށް ބެލެވޭ އެއްޗެއް މިއަދު ހޮވައިފި އެވެ.

އާސިމް "މިހާރު" އަށް ބުނީ ހެނދުނުގެ ކޮފީ ތަށި ހިފައިގެން މާފުށީ ބީޗުގައި ހިނގާލަން ނުކުމެ އުޅެނިކޮށް ނަސީބު އަތުގައި ހިފީ ކަމަށެވެ. ގޮނޑުދޮށުން ފެނުނު އެއްޗެއް ނެގިއިރު އެއީ ހުދުމާވަަހަރެއް ކަމަށް އޭނާ ބުންޏެވެ.

އޭނާ ލަފާ ކުރާ ގޮތުގައި އޭގައި ގާތްގަނޑަކަށް ކިލޯއެއް ހުންނާނެ އެވެ. މާވަހަރުގެ އަގު އެނގޭތީއާ އެކު، ގޮނޑުދޮށުން އޭތި ފެނުމުން ލިބުނު އުފަލާ އެކު އޭނާ އެ ހުދަންބަރު އަދި ނުކިރަ އެވެ.

"ކޮންމެ ދުވަހަކު ފަތިހު ބީޗުގައި ހިނގާލަން ނުކުންނަން ކޮފީތަށި ހިފައިގެން. އަތަށް ކޮފީތަށި ލައިގެން އެހެން ފެންނަ ބައެއް އެއްޗެހި ހޮވަން ހިނގާފައި ދާއިރު. ގުރައަށް ކާންދެން ގެންގުޅޭ ކަހަލަ [ދިލަފުށި] އެއްޗެހި ވެސް ހޮވަން. ބައެއް ދުވަސް ދުވަހު މަސް ބާނަން ބުޅި ހިފައިގެން ވެސް އުޅެން،" ހުދުމާވަހަރު ފެނުނު ގޮތް އާސިމް ކިޔައިދިނެވެ.

އާސިމް ވަނީ މާފުށީގައި ބެލެން ހުރި ގޮތަކަށް ބަލައިގެން އެއީ ހުދަންބަރެއްތޯ ޔަގީންކޮށްފަ އެވެ. އެކަމަކު މާލެ ފޮނުވައިގެން ޓެސްޓްކޮށްގެން އިތުރަށް ޔަގީންކުރާނެ ކަމަށް އޭނާ ބުންޏެވެ.

"ބިލީވް މީ، މިފަހަރު މިއޮތީ ސެންސް މޭކް ކޮށްފައި،" އޭނާ ބުންޏެވެ.

މާފުށީގެ ވައިޓް ބީޗު ވޯޓާ ސްޕޯޓްސްގައި، އާސިމް މަސައްކަތް ކުރާތާ 14 އަހަރު ވެއްޖެ އެވެ. ވައިރަލްވި ޓިކްޓޮކްތަކަށް ފަހު އޭނާއަކީ މިހާރު މާފުއްޓަށް ދަތުރުދާ ހުރިހާ މީހުން ހެއްވާލާ، އެކުގައި ފޮޓޯ ނަގާ ސެލަބްރިޓީއެކެވެ.