ކާބޯތަކެތި ލޭބަލްކުރުމުގެ ގަވައިދާ ހިލާފަށް ބައެއް ތަކެތި ވިއްކާތީ ސަމާލުވާން އެދިއްޖެ

ކާބޯތަކެތި ލޭބަލްކުރުމުގެ ގަވާއިދާ ހިލާފަށް ބައެއް ތަކެތި ވިއްކާތީ ސަމާލުވާން އެމްއެފްޑީއޭއިން މިއަދު އެދިއްޖެ އެވެ.

އެ އިދާރާއިން ނެރުނު ބަޔާނުގައި ބުނީ "އަމިއްލަ ދިރިއުޅުމަށްޓަކައި ކާބޯތަކެތި އުފައްދާ ވިއްކުމުގެ މަސައްކަތްކުރާ ފަރާތްތައް ދަފްތަރުކުރުމުގެ އުސޫލު"ގެ ދަށުން ރަޖިސްޓްރީވެފައިވާ މީހުންގެ މައުލޫމާތު ދިރިތި ޕޯޓަލްއާ އެމްއެފްޑީއޭ އަދި ހެލްތު މިނިސްޓްރީގެ ވެބްސައިޓުގައި އާއްމުކުރާނެ ކަމަށެވެ.

އެމްއެފްޑީއޭއިން ވަނީ "ހިންނަވަރު އަތުޖެހި"ގެ ނަމުގައި ނުބައި ލޭބަލް އެއްގެ ދަށުން އަތުޖެހި ޕެކެޓު ނެރޭތީ އެކަން އިއުލާންކޮށްފަ އެވެ.

ބަޔާނުގައި ބުނީ އެއީ އަމިއްލަ ދިރިއުޅުމަށްޓަކައި ކާބޯތަކެތި އުފައްދާ ވިއްކުމުގެ މަސައްކަތްކުރާ މީހުންގެ ދަފްތަރުކުރުމުގެ އުސޫލުގެ ދަށުން އެ އޮތޯރިޓީގައި ރަޖިސްޓްރީވެފައިވާ މީހެއް ނޫން ކަމަށެވެ. އެ ލޭބަލްގައި ބޭނުންކޮށްފައިވަނީ އެމްއެފްޑީއޭއިން ދޫކޮށްފައިވާ ނަމްބަރެއް ނޫން ކަމަށް ވެސް ބުންޏެވެ. "ކާބޯތަކެތި ގަތުމުގައި މިކަމަށް ހާއްސަ ސަމާލުކަމެއް ދިނުމަށް އިލްތިމާސްކުރަމެވެ. އަދި އިސްވެ ދެންނެވުނު އުސޫލާ ހިލާފަށް އެއްވެސް ފަރާތަކުން އަމަލުކުރާކަން ފާހަގަވެއްޖެ ނަމަ އެކަން މި އޮތޯރިޓީގެ ނަމްބަރު 3014361/7603204 ފޯނަށް ގުޅައި ހިއްސާކުރެއްވުން އެދެމެވެ." ބަޔާނުގައި ވެ އެވެ.

ކާބޯތަކެތިގެ ރައްކާތެރިކުރުމުގެ ގާނޫނުގެ ދަށުން ހަދާފައިވާ ގަވައިދުގައިވާ ގޮތުން، އެ ގާނޫނާ ހިލާފުވެއްޖެ ނަަމަ، ޖިނާއީ ދައުވާކުރުމާއި އެއް މިލިއަން ރުފިޔާއާ ހަމައަށް ޖޫރިމަނާކުރުމުގެ ބާރު އޮވެ އެވެ. މިހާރު އެ ކަންކަން ބަލަމުން އަންނަ އާންމު ސިއްހަތުގެ ގާނޫނުގައި އޮންނަނީ އެންމެ ބޮޑުވެގެން ވެސް 10،000ރ. ގެ ޖޫރިމަނާއެކެވެ.

އެ ދެ ތަނުގައި ރަޖިސްޓްރީ ވާން ޖެހޭ ތަންތަން ވަކިން ބަޔާން ކޮށްފައިވާއިރު ރަޖިސްޓްރީކުރުން ލާޒިމް ނުވާ ތަންތަނަކީ ވަގުތީ މާރުކޭޓުތަކާއި އުޅަނދުތަކާއި ސްޓޭންޑްތަކެވެ. ނަމަވެސް އެ ތަންތަނުން ވެސް އެމްއެފްޑީއޭގެ މިންގަނޑުތަކާ އެއްގޮތަށް އަމަލު ކުރަން ޖެހޭނެ ކަމަށް އެ އުސޫލުގައިވެ އެވެ.

ގިނަ ތަންތަނަށް އެއް އަހަރުގެ ލައިސަންސް ދޫކުރާއިރު، ޔޫރަޕިއަން ޔޫނިއަންއަށް އެކްސްޕޯޓްކުރާ ކާރުހާނާތަކަށް ހަ މަސް ދުވަހުގެ ލައިސަންސެއް ދޫކުރާނެ އެވެ. ލައިސަންސް ދޫކުރުމަށް ވެސް ވަކި ފީއެއް ނަގާނެ އެވެ.