އެންސްޕާއިން އެހީ ދޭ ގޮތް ހަރުދަނާ ކުރަން އޭސީސީން ލަފާ ދީފި

ބޭސްފަރުވާއަށް އެންސްޕާއިން އެހީ ދޭ އުސޫލު ހަރުދަނާ ކުރަން އެންޓި ކޮރަޕްޝަން ކޮމިޝަން (އޭސީސީ) އިން ލަފާ ދީފި އެވެ.

އޭސީސީން މިދިޔަ ބުރާސްފަތި ދުވަހު ނެރުނު "ސިއްހީ ވެލްފެއާ ނިޒާމުގެ ކޮރަޕްޝަން ރިސްކް އެސެސްމަންޓް" ގައި އިންޝުއަރެންސްގެ ނިޒާމާއި އާސަންދަ އަދި އެންސްޕާ ހިންގުމުގައި ކޮރަޕްޝަނާއި ނާޖާއިޒު މަންފާއަށް މަގުފަހިވާ ކަންކަން ރަނގަޅު ކުރުމަށް ލަފާ ދީފައިވެ އެވެ.

އޭގެ ތެރޭގައި އެންސްޕާ މެދުވެރިކޮށް އެހީ ދޭއިރު، ތަފާތުކުރާ މައްސަލަ ފާހަގަ ކޮށްފައިވެ އެވެ.

ރިޕޯޓުގައި ބުނީ އެންސްޕާއިން ބޭސްފަރުވާގެ އެހީ ދެނީ އެކަމަށް ހުށަހަޅާ ލިޔެކިޔުންތައް، އެންސްޕާއިން ކަނޑައަޅާފައިވާ ހާއްސަ ކޮމެޓީއަކުން ބަލައި ހުއްދަދީގެންނެވެ. ނަމަވެސް، ލިޔެކިޔުންތައް އެންމެ ރަނގަޅަށް ވެރިފައި ކުރެވޭނެ ވަގުތު ނެތި އަދި ބަލި މީހުންގެ ހާލަތަށް ރިއާޔަތް ކުރުމެއް ނެތި އެހީ ދޫކޮށްފައިވާކަން ފާހަގަ ކުރެވޭ ކަމަށް ބުންޏެވެ.

އެހީއަށް އެދި ހުށަހަޅާތާ މިނެޓެއްގެ ތެރޭގައި އަދި ބައެއް ހާލަތްތަކުގައި ހުށަހަޅަންޖެހޭ ހުރިހާ ލިޔެކިޔުމެއް އެންސްޕާއަށް ފޮނުވާ ނުނިމެނީސް، އެންސްޕާގެ އެހީ ބައެއް ފަހަރު ހަމަޖެހިފައި ހުންނަ ކަމަށް އެ ރިޕޯޓުގައި ބުނެފައިވެ އެވެ.

"މިފަދައިން މި ޕްރޮސެސް ކުރިއަށް ގެންދިއުމުގައި ނުފޫޒުވެރި ތިން ވަނަ ފަރާތެއް މެދުވެރި ކުރާކަން މި ފޯކަސް ގްރޫޕު އިންޓަވިއުއިން ވަނީ ފާހަގަ ކުރެވިފަ އެވެ،" ރިޕޯޓުގައި ވެ އެވެ.

ހިދުމަތް ފޯރުކޮށް ދިނުމުގައި ހުންނަ އެފަދަ ކަންކަމުގެ ސަބަބުން އާއްމުންނަށް އެއްހަމައެއްގައި ހިދުމަތްތައް ފޯރުކޮށްދިނުމަށް އަދި ހިދުމަތް ލިބިގަންނަ މީހުންގެ ހައްގުތައް ރައްކާތެރިކުރުމަށް ގޮންޖެހުންތަކާ ކުރިމަތިވާ ކަމަށް އެ ރިޕޯޓުގައިވެ އެވެ.

"ވަކި ހާއްސަ އުސޫލެއް ހެދިފައިވީ ނަމަވެސް، ސިޔާސީ ނުފޫޒަށް ގޮތް ނިންމުމުން ހިދުމަތް އަވަސް މަގުން ހޯދުމުގައި އޮތް ހަމައެކަނި ގޮތަކީ ތިން ވަނަ ފަރާތެއް [މިސާލު: އިންތިހާބުކުރެވޭ މަގާމުތަކުގައި ތިބޭ ފަރާތްތަކާއި އައްޔަން ކުރެވޭ މަގާމުތަކުގައި ތިބޭ ފަރާތްތައް] ނުފޫޒު ބޭނުން ކުރުންކަން ރައްޔިތުންނަށް ގަބޫލު ކުރެވި، މުޖުތަމައުގައި ކޮރަޕްޝަންގެ އަމަލުތައް އަށަގެންނެވުމަށް ހިތްވަރު ލިބި އަދި މިފަދަ އަމަލުތަކަށް ދެވޭ ބާރަކަށްވެދެ އެވެ،" އޭސީސީން ބުނެފައިވެ އެވެ.

އެހެންވެ، އެ ކޮމިޝަނުން ވަނީ އެންސްޕާގެ ބޭސް ފަރުވާގެ އެހީއަށް އެދި ހުށަހަޅާ ފޯމުތަކުގެ ވެރިފިކޭޝަން މަރުހަލާ ހަރުދަނާ ކުރަން އެޅޭނެ ފިޔަވަޅުތައް ދެނެގަނެ، ވެރިފިކޭޝަން ގައިޑްލައިނެއް ކަނޑައަޅައި އާންމު ކުރަން ލަފާ ދީފަ އެވެ. އޭގެ އިތުރުން އެންސްޕާއަށް ފޮނުވާ ހުރިހާ ރިކުއެސްޓެއް ޕޯޓަލްއެއްގެ ތެރެއިން ހުށަހެޅޭ ގޮތަށް ކަނޑައަޅައި، ފޯމުގެ ޕްރޮސެސް މަރުހަލާ، އެ ފޯމު ހުށަހަޅާ މީހާއަށް ފެންނާނެ ގޮތަށް ހާމަކުރަން ވެސް ވަނީ ލަފާ ދީފަ އެވެ.

މީގެ އިތުރުން ބޭސްފަރުވާގެ ބާވަތުން އަދި އެހީއަށް އެދޭ ފަރާތުގެ ހާލަތަށް ރިއާޔަތްކޮށް ދެވޭނެ އެހީގެ ތްރެޝް ހޯލްޑެއް ކަނޑައަޅައި، އާއްމު ކުރުމަށާއި އެ މިންގަނޑަށް އަމަލު ނުކުރެވޭ ހާލަތްތަކުގައި އަމަލުކުރާނެ އުސޫލެއް ވެސް ކަނޑައެޅުމަށްފަހު އާންމުކުރަން އޭސީސީން ލަފާ ދީފައިވެ އެވެ.