މާލީ ފުދުންތެރިކަމަށް ބަލައި އާސަންދަ ދިނުމަށް ދިރާސާކުރަން އޭސީސީން ލަފާދީފި

މާލީ ފުދުންތެރިކަމަށް ބަލައިގެން އާސަންދަ ދިނުމަށް ކުރަންޖެހޭ ދިރާސާތައް ކުރަން އޭސީސީން ލަފާދީފި އެވެ.

އެ ކޮމިޝަނުން މި މަހު ނެރުނު "ސިއްހީ ވެލްފެއާ ނިޒާމުގެ ކޮރަޕްޝަން ރިސްކް އެސެސްމަންޓް" ގައި ވަނީ އިންޝުއަރެންސްގެ ނިޒާމާއި އާސަންދަ އަދި އެންސްޕާ ހިންގުމުގައި ކޮރަޕްޝަނާއި ނާޖާއިޒު މަންފާއަށް މަގުފަހިވާ ކަންކަން ހުރިކަމަށް ބުނެފަ އެވެ.

އެހެންވެ، އާސަންދަ ނިޒާމު ހަރުދަނާކުރުމަށް މުހިއްމު ގަވައިދުތައް ހެދުމާއި ބަދަލުތައް ގެނައުމަށް އެ ކޮމިޝަނުން ވަނީ އެދިފަ އެވެ.

އެ ކަންކަމުގެ ތެރެއިން، އާސަންދައަކީ ދެމެހެއްޓެނިވި ސްކީމަކަށް ހެދުމަށް ކޮންޓްރިބިއުޓަރީ ނުވަތަ އާއްމުން ހިއްސާވާ ސްކީމަކަށް ދިއުމަށް ނުވަތަ މާލީ ފުދުންތެރިކަމަށް ބަލައި އެ މީހުންނަށް ނޮން-ކޮންޓްރިބިއުޓަރީ އުސޫލުން އެ ހިދުމަތް ދިނުމަށް ވަކި ހާއްސަ ދިރާސާތަކެއް ކުރުމަށް ކަމާގުޅޭ ފަރާތްތަކަށް ވަނީ ލަފާދީފަ އެވެ.

މާލީ ފުދުންތެރިކަމަށް ބަލައި އާސަންދަ ދިނުމާ ގުޅޭ ދިރާސާތައް ކުރަން އޭސީސީން ލަފާދިން އިރު، އާސަންދައިގެ މެނޭޖިން ޑިރެކްޓަރު އާމިނަތު ޒީނިޔާ ވެސް ވަނީ އެ ނިޒާމު ދެމެހެއްޓޭނީ ކޯ-ޕޭމަންޓަކަށް ގޮސްގެން ކަމަށް ވިދާޅުވެފަ އެވެ.

އާސަންދަ އެ ކުންފުނީގެ ވެބްސައިޓުގައި އާއްމުކޮށްފައިވާ މައުލޫމާތަށް ބަލާއިރު، މި އަހަރުގެ ފުރަތަމަ ކުއާޓާގައި ފަރުވާއަށް 838 މިލިއަން ރުފިޔާ އަދި ދެ ވަނަ ކުއާޓާގައި 823 މިލިއަން ރުފިޔާއާ އެކު، ފުރަތަމަ ހަ މަސް ދުވަހުގެ ތެރޭގައި، ބޭސްފަރުވާއަށް އެކަނި ވެސް 1.6 ބިލިއަން ރުފިޔާ ހޭދަކޮށްފައިވެ އެވެ. އޭގެ އެންމެ ބޮޑު ހަރަދެއް ކުރަނީ ޑޮކްޓަރީ ބޭހަށެވެ.

އެހެންވެ، ބޭހަށް ކުރޭ ހޭދަ ކުޑަކުރުމަށް ސަރުކާރުން ވަނީ ޔޫރަޕް ކޮލިޓީގެ ބޭސް ބަލްކުކޮށް ގެންނަން ފަށައިފަ އެވެ.

ސަރުކާރުން މަސައްކަތް ކުރަނީ އަސާސީ ބޭސް ލިސްޓުގައި މިހާރު ހިމެނޭ ހުރިހާ ބޭހެއް ޔޫރަޕް ކޮލިޓީގައި އެސްޓީއޯ މެދުވެރިކޮށް ގެންނާށެވެ. އެ ލިސްޓުގައި މިހާރު 400 ބޭސް ހިމެނޭއިރު، އެ ލިސްޓަށް ބޭސް ގެނެސް ނިމުމުން 300 މިލިއަނެއްހާ ރުފިޔާ ސަލާމަތްކުރެވޭނެ ކަމަށް ލަފާކުރެ އެވެ