ޗައިނާގެ 153 މަތިންދާބޯޓު ޓައިވާން ކައިރިން ދަތުރުކުރި

ވަކި ވެރިކަމެއް ހިންގަމުން އަންނަ ޓައިވާން ވަށައިގެން އާދީއްތަ ދުވަހު ޗައިނާއިން ހިންގި އަސްކަރީ ތަމްރީންތަކުގައި އަސްކަރީ 153 މަތިންދާބޯޓު ފާހަގަކުރެވުނު ކަމަށާއި މިއީ އެއް ދުވަހަކު އެންމެ ގިނަ އަސްކަރީ މަތިންދާބޯޓުތައް ފެނުނު ދުވަސް ކަމަށް ޓައިވާންގެ ޑިފެންސް މިިނިސްޓްރީން ބުނެފި އެވެ.

ޑިފެންސް މިނިސްޓްރީގެ ބަޔާނެއްގައި ބުނެފައިވާ ގޮތުގައި މި ބޯޓުތައް ފެނިފައިވަނީ އަންގާރަ ދުވަހުގެ ހެނދުނު 6:00 އަށް ނިމުނު 25 ގަޑިއިރުގެ ތެރޭގަ އެވެ.

ހޯމަ ދުވަހު ޗައިނާއިން ފައިޓަ ޖެޓްތަކާއި، ޑްރޯންތަކާއި، ހަނގުރާމައިގެ އުޅަނދުތަކާއި ކޯސްޓްގާޑް އުޅަނދުތައް ބޭނުންކޮށްގެން ޓައިވާން ވަށައިލި އެވެ. އަދި ޓައިވާނުން ވެސް ރައްދުގައި އަސްކަރިއްޔާ ތައްޔާރީ ހާލަތަށް ގެނަ އެވެ.

ޓައިވާނުން ޗައިނާގެ ޢަމަލުތައް ކުށްވެރިކުރަމުން މިއީ އެއްވެސް ހަމައެއް ނެތް، ރުޅިއެރުވުމުގެ އަމަލެއްގެ ގޮތުގައި ވަނީ ސިފަކޮށްފަ އެވެ. އަދި އެމެރިކާއިން ވަނީ މިއީ ހާލަތާ ނުބައްދަލު އަމަލެއް ކަމަށް ބުނެފަ އެވެ.

ޖަޕާނުން ވަނީ ޗައިނާގެ އަސްކަރީ ޑްރިލްގެ މައްސަލައިގައި ހުރި ކަންބޮޑުވުންތައް ޗައިނާއާ ހިއްސާކޮށްފައިވާ ކަމަށް ބުނެފަ އެވެ.

ޗައިނާއިން ޓައިވާނަކީ އެ ގައުމުގެ ބައެއް ކަމަށް ދައުވާކުރެ އެވެ. އަދި ހޯމަ ދުވަހު ބުނެފައިވަނީ އެ ޖަޒީރާ ޗައިނާގެ ބާރުގެ ދަށަށް ގެންދިއުމުގައި ބާރުގެ ބޭނުން ހިފަން ޖެހޭ ނަމަ އެކަމުގައި ދޫ ދިނުން ނޯންނާނެ ކަމަށެވެ.

ޓައިވާނުގެ ޑިފެންސް މިނިސްޓްރީން ބުނި ގޮތުގައި، 25 ގަޑިއިރުގެ ތެރޭގައި ޗައިނާގެ 14 ނޭވީ އުޅަނދު ވެސް ފާހަގަކުރެވިފައިވާ ކަމަށެވެ. ފެނުނު މަތިންދާބޯޓުތަކުގެ ތެރެއިން 111 ބޯޓު މެއިންލޭންޑް ޗައިނާ އާއި ޓައިވާން ވަކިކުރާ، ރޮނގު ހުރަސްކޮށްފައިވާ ކަމަށް ހިސާބުތަކުން ދައްކަ އެވެ.

ޗައިނާގެ ޑްރިލް ފެށީ ޓައިވާންގެ ރައީސް ލާއި ޗިންގ-ތޭ އެ ގައުމީ ދުވަހުގެ މުނާސަބަތުގައި ދެއްކި ވާހަކައަށް ފަހުގަ އެވެ. މެއި މަހު މަގާމާ ހަވާލުވެ ވަޑައިގަތް ލާއި އަކީ ކުރީގެ ރައީސް ޓްސާއި އިންގް-ވެންއަށް ވުރެ ހަރުކަށިކޮށް ޓައިވާންގެ މިނިވަންކަން ދިފާއުކުރުމަށް ވާހަކަ ދައްކަވާ ބޭފުޅެކެވެ. މިކަމާ ޗައިނާ ރުޅި ގަދަވެ އޭނާއަކީ "ވަކިވެގަތުމަށް މަސައްކަތްކުރާ މީހެއް" ކަމަށް ވަނީ ބުނެފަ އެވެ.

ބުރާސްފަތި ލާއި ވަނީ ޓައިވާން "އަތުލައިގަތުމަށް ދެކޮޅުހަދާނެ" ކަމަށާއި ތައިޕޭ އަކީ "އެއްބަޔަކު އަނެއް ބައެއްގެ ދަށުވެފައިވާ" ދެ ތަން ނޫން ކަމަށް ވިދާޅުވެފަ އެވެ. މި ވާހަކައަށް ފަހު ޗައިނާއިން ވަނީ "ރުޅިއެރުވުންތަކުގެ" ނަތީޖާ ނުރައްކާވާނެ ކަމަށް ބުނެ އިންޒާރު ދީފަ އެވެ.

ޑްރިލް ފެށިތާ 24 ގަޑިއެއްހާއިރު ފަހުން ޗައިނާއިން ވަނީ ދިފާއީ ބާރުތަކުގެ ގުޅުމާއި ތައްޔާރީ ހާލަތު ވަޒަންކުރުމުގެ ޑްރިލް ކާމިޔާބުކަމާ އެކު ނިންމާލާފައިވާ ކަމަށެވެ.