އެންސިސް އަށް އެންމެ ގިނައިން މަސްކިރުވި ދޯނިތައްް ހޮވައިފި

ރާއްޖޭގައި ފުޅާދާއިރާއެއްްގައި މަސް އެކްސްޕޯޓް ކުރާ އެންސިސް ފިޝަރީޒަށް މިދިޔަ އަހަރު އެންމެ ގިނައިން މަސްކިރުވި ތިން ދޯނި ހޮވައި، އެ ދޯނިތަކަށް ފައިސާގެ އިނާމާއި އެވޯޑު މިއަދު ދީފި އެވެ.

ހުޅުމާލޭގައި ހުންނަ އެ ކުންފުނީގެ ފެކްޓްރީގައި ބޭއްވި ރަސްމިއްޔާތެއްގައި، އެންސިސް އަށް މިދިޔަ އަހަރު އެންމެ ގިނައިން މަސްކިރުވި އދ. މަހިބަދޫ "ހެދޭކުރި1" އަށް 20،000ރ. އާއި ހަނދާނީ ލިޔުމާއި އެވޯޑު ހަވާލުކޮށްދެއްވީ ފިޝަމަން އެސޯސިއޭޝަންގެ ރައީސް މައިޒާން އަހުމަދު މަނިކު އެވެ. އަދި މިދިޔަ އަހަރުގެ އޭ ގްރޭޑްގެ ކަންނެލި އެންމެ ގިނަ އަދަދަކަށް ކިރުވި ދޯންޏަކަށް ވެސް ހޮވުނީ އެ ދޯންޏެވެ.

މިދިޔަ އަހަރު ދެވަނަ އަށް ހޮވުނު ޅ. ނައިފަރު ޒިކުރާ ދޯންޏަށް 10،000ރ. އާއި ހަނދާނީ ލިޔުމާއި އެވޯޑު ހަވާލުކޮށްދެއްވީ އެންސިސްގެ މެނޭޖިން ޑިރެކްޓަރު މުހައްމަދު ވަސީމް އެވެ. ތިންވަނަ ހޯދި ދ. މީދޫ ހާސް ރޯދި ދޯންޏަށް 7،500ރ.ގެ ފައިސާ އިނާމާއި ސެޓްފިކެޓް އަދި އެވޯޑް ހަވާލުކޮށްދެއްވީ އެންސިސްގެ ޑިރެކްޓަރު އަބްދުލް ވާހިދެވެ.

މިއަދުގެ ރަސްމިއްޔާތުގައި ވާހަކަ ދައްކަވަމުން އެންސިސްގެ މެނޭޖިން ޑިރެކްޓަރު ވަސީމް ވިދާޅުވީ މަސްވެރިންނާއި އެ ކުންފުންޏާ ދެމެދު އޮންނަ ގުޅުން ބަދަހިކުރަން ވަރަށް ބޮޑަށް މަސައްކަތްކުރައްވާ ކަމަށެވެ. އަދި އޭގެ ސަބަބުން މިދިޔަ އަހަރު ވަރަށް ބޮޑުކުރިއެރުންތަކެއް ލިބިފައިވާ ކަމަށް ވެސް އޭނާ ވިދާޅުވި އެވެ.

"މަސްވެރިން ބާނާ މަހަށް ރަނގަޅު އަގެއް ހޯދައި ދިނުމަށް އަބަދުވެސް މިދަނީ މަސައްކަތްކުރަމުން. ތާޒާ މަސް މެދުނުކެނޑި ލިބޭ ނަމަ އަޅުގަނޑުމެންނަށް ކިލޯއެއް 100 ރުފިޔާއަށް ވެސް ގަނެވިދާނެ. އެހެން ނަމަވެސް ރޯދަ މަހު ވެސް މަސް ނުލިބިގެން އެކްސްޕޯޓްނުކުރެވި އެބަދޭ،" ވަސީމް ވިދާޅުވި އެވެ.

އޭނާ ވިދާޅުވީ ތާޒާ މަސް މެދުނުކެނޑި ލިބޭނެ ނަމަ ކުރިޔަށް އޮތްތަނުގައި މަސް ގަންނަ އަގު ބޮޑުކުރާނެ ކަމަށެވެ.