ސިންވާރު ޝަހީދުކޮށްލިޔަސް ހަމާސް ދެމި އޮންނާނެ: ޚާމަނާއީ

ފަލަސްތީނުގެ ޣައްޒާގައި އިޒްރޭލު ސިފައިން ހިންގި އޮޕަރޭޝަނެއްގައި ހަމާސްގެ ލީޑަރު ޔަހްޔާ ސިންވާރު އަވަހާރަވިޔަސް ހަމާސް ޖަމާއަތް މަރުނުވާ ކަމަށާއި އެ ޖަމާއަތް ދެގޮތެއް ނުވެ ކުރިއަށްދާނެ ކަމަށް އިރާނުގެ ރޫހީ ލީޑަރު އާޔަތުﷲ އަލީ ޚާމެނީ ވިދާޅުވެއްޖެ އެވެ.

ސިންވާރު ނެތުމަކީ އިޒްރޭލާ ދެކޮޅު ހަރަކާތްތަކަށް ލިބުނު ދެރައެއް ކަމަށާއި އެކަމަކު ސިންވާރު ޝަހީދުވުމަކީ އިޒްރޭލާ ދެކޮޅު ޖިހާދު ހުއްޓޭނެ ކަމެއް ނޫން ކަމަށް ޚާމަނާއީ ނެރުއްވި ބަޔާނެއްގައި ވިދާޅުވި އެވެ.

ބުދަ ދުވަހު އަވަހާރަކޮށްލި ސިންވަރާ ބެހޭގޮތުން ޚާމަނާއީ ފުރަތަމަ ފަހަރަށް ދެއްކެވި ވާހަކާގައި ވިދާޅުވީ އިޒްރޭލުގެ އަނިޔާވެރިކަމާއި ލާއިންސާނިއްޔަތާ ދެކޮޅަށް ސިންވާރު ދެއްކެވީ ވަރުގަދަ ހިތްވަރާއި ކެރުމާއި ހަނގުރާމައިގެ ހުނަރު ކަމަށެވެ. "ސިންވާރު ވަޑައިގަތީ އޮކްޓޫބަރު 7، 2023 ގައި އިޒްރޭލަށް ދިން ފޫނުބެއްދޭނެ ހަމަލާ އަކީ އޭނާގެ ތަރިކައެއްގެ ގޮތުގައި ދޫކުރައްވާފައި. ޝަރަފުވެރިކަމާއި ފަޚުރުވެރިކަމާ އެކު އެ ވަނީ ޝަހީދުންގެ ދަރަޖައަށް އުފުލިފައި،" އިޒްރޭލުން މިހާރު ޣައްޒާއަށް ދެމުން ގެންދާ ހަމަލާތައް ފެށުމަށް އުޒުރަކަށް ދައްކާ ހަމާސްގެ ވަރުގަދަ ހަމަލާއަށް އިޝާރަތްކުރައްވައި ޚާމަނާއީ ވިދާޅުވެފައިވެ އެވެ. މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހު އިޒްރޭލަށް ހަމާސް އިން ދިން ކުއްލި އަދި ވަރުގަދަ ހަމަލާތަކުގެ މޭސްތިރިޔާ ކަމަށްވާ ސިންވާރް ހަމާސްގެ ވެރިޔަކަށް ހަމަޖެއްސީ މީގެ ދެތިން މަސް ކުރިންނެވެ. އެއީ ލީޑަރު އިސްމާއިލް ހަނިއްޔާ އަވަހާރަކޮށްލުމުންނެވެ.