ބިރުބޮޑުވުމުން ސަލްމާން ބުލެޓްޕްރޫފް ކާރެއް ގަނެފި

ބޮލީވުޑްގެ ސުޕަސްޓާރު ސަލްމާން ހާނަށް ތަކުރާރުކޮށް މަރުގެ އިންޒާރު ލިބެމުން ދާތީ އޭނާ ބުލެޓްޕްރޫފް ކާރެއް ގަނެފި އެވެ.

ސަލްމާނާ ވަރަށް ގާތް ގުޅުމެއް ބޭއްވި އިންޑިއާގެ ސިޔާސީ ބޭފުޅެއް ކަމަށްވާ ބާބާ ސިއްދިގީގެ ގަޔަށް ބަޑިޖަހައި މި މަހުގެ 13 ވަނަ ދުވަހު ވަނީ އަވަހާރަކޮށްލައިފަ އެވެ. އިންޑިއާގެ ނުރައްކާތެރި ގޭންގްސްޓާރެއް ކަމަށްވާ ލޯރެންސް ބިޝޯނީގެ ގޭންގުން ވަނީ އެ މަރުގެ ޒިންމާ ވެސް ނަގައިފަ އެވެ. އޭގެ ފަހުން، އެ ގޭންގުން ދަނީ ސަލްމާނަށް ވެސް މަރުގެ އިންޒާރު ދެމުންނެވެ. އެހެންވެ، ސަލްމާންގެ ސެކިއުރިޓީ ވެސް ވަނީ ވަރުގަދަކޮށްފަ އެވެ.

ރިޕޯޓްތައް ބުނިގޮތުގައި، މަރުގެ އިންޒާރުތައް ގިނަވުމުން ސަލްމާން މިހާރު ވަނީ ބުލެޓްޕްރޫފް ކާރެއް ގަނެފަ އެވެ. އެއީ ބުލެޓްޕްރޫފް ނިސާން ޕެޓްރޮލް އެސްޔޫވީ ކާރެކެވެ. ދުބާއީން ގަތް އެ ކާރުގެ އަގަކީ ދެ ކްރޯޑް ރުޕީސް (237,899 ޑޮލަރު) އެވެ. އެ ކާރު އިންޑިއާ އަށް ގެންދިއުމަށް ވެސް ބޮޑު ހަރަދެއް ހިނގާނެ ކަމަށް ރިޕޯޓްތައް ބުންޏެވެ.

ކާރުގެ ހާއްސަ ކަންކަމަށް ބަލާއިރު، ގޮވާ ތަކެތި ހުރިކަން އަންގައިދޭ އެލާޓް އިންޑިކޭޓަރުތައް އޭގައި ވަނީ ހަރުކޮށްފަ އެވެ. އެ ކާރުގެ ދޮރުތަކުގައި ހަރުކޮށްފައި ވަނީ ކައިރީގައި ހުރެގެން ބަޑިޖެހިޔަސް އެތެރެއަށް ވަދެގެން ނުދާނެހާ ބޯ ބިއްލޫރި އެވެ. އެ ބިއްލޫރިތައް ހުންނަނީ އެ ކާރުގެ ޑްރައިވަރު ނުވަތަ ކާރުގެ އެތެރޭގައި ތިބޭ ފަސިންޖަރުން ބޭރަށް ނުފެންނާނެ ގޮތަށް ކަޅުކުލައިގަ އެވެ.

ސަލްމާން ވަނީ މިދިޔަ އަހަރު ވެސް ބުލެޓްޕްރޫފް ކާރެއް ގަނެފަ އެވެ. އެ ފަހަރު ވެސް ބުލެޓްޕްރޫފް ކާރެއް ގަތީ ސަލްމާން އާއި އޭނާގެ ބައްޕަ ސާލިމް ހާނަށް ބިޝޯނީ ގޭންގުން މަރުގެ އިންޒާރުދިނުމުންނެވެ.

ސަލްމާން މި ދުވަސްވަރު އަންނަނީ އިންޑިއާގެ އެންމެ ބޮޑު ރިއަލިޓީ ޝޯ "ބިގް ބޮސް"ގެ އާ ސީޒަން ވެސް ހޮސްޓު ކުރަމުންނެވެ.

ބިޝޯނީ ގޭންގާއި ސަލްމާންއާ އޮތް ގުޅުމަކީ ކޮބާ؟

ފިލްމު "ހަމް ސާތު ސާތު ހޭ"ގެ މަންޒަރުތަކެއް ނަގަން 1998 ވަނަ އަހަރު ސަލްމާނާއި އެ ފިލްމުގެ ކުރޫ ރާޖިސްތާން ސްޓޭޓުގެ ޖޯދްޕޫރުގެ ޖަންގަލީގައި ހޭދަކުރި ދުވަސްތަކުގައި ވަނީ އިންޑިއާގައި ހިމާޔަތްކޮށްފައިވާ ފުއްލާގެ ވައްތަރެއް ކަމަށްވާ ޗިންކާރާތަކެއްގެ ގަޔަށް ބަޑިޖަހައި މަރާލައިފަ އެވެ. އެ މީހުން އޭގެ ދޭތި މަރާލި އެވެ. އެ މައްސަލާގައި ސަލްމާނަށް ފަސް އަހަރުގެ ޖަލު ހުކުމެއް ވެސް އިއްވި އެވެ. އެކަމަކު، ސަލްމާންގެ ވަކީލުން ވަނީ އެ މައްސަލަ އިސްތިއުނާފުކޮށް، އޭނާ މިނިވަންކޮށްފަ އެވެ.

ޗިންކާރާއަކީ ރާޖިސްތާނުގައި އޮންނަ ބިޝޯނީ ކިޔާ ގަބީލާއެއްގައި ހާއްސަ ގަދަރެއް ދީފައިވާ ޖަނަވާރެކެވެ. އެ ގަބީލާގެ މީހުން ވަރަށް މާތްކޮށް ހިތާ ޖަނަވާރެކެވެ. އެހެންވެ، ސަލްމާން އާއި އޭނާގެ ބައިވެރިން މި ޗިންކާރާތައް މަރާލުމުން އެ ގަބީލާގެ މީހުން ވަރަށް ރުޅިގަދަވި އެވެ.

ލޯރެންސް ބިޝޯނީއަކީ ވެސް އެ ގަބީލާއަށް ނިސްބަތްވާ މީހެކެވެ. މި ހާދިސާ ހިނގިއިރު ލޯރެންސްގެ އުމުރުން ވާނީ އެންމެ ފަސް އަހަރެވެ. މިހާރު އުމުރުން 31 އަހަރުގެ ލޯރެންސް ގިނަ ބަޔަަކަށް އެނގުނީ 2015 ވަނަ އަހަރު ފުލުހުން އޭނާ ހައްޔަރުކުރުމުންނެވެ. ފުލުހުން އޭނާ ހައްޔަރުކުރީ އިންޑިއާގެ ހައި ޕްރޮފައިލް އެތައް ބައެއް މެރުމުގައި އޭނާގެ ބައިވެރިވުން އޮތްކަން އެނގުމުންނެވެ.

އޭރުއްސުރެ އޭނާ އަދިވެސް ހުރީ ޖަލުގަ އެވެ. އެކަމަކު، ޖަލުގައި ހުރެގެން ވެސް ލޯރެންސް ދަނީ އޭނާގެ ގޭންގުގެ މީހުން މެދުވެރިކޮށް ބޮޑެތި ކުށްތައް ކުރުވަމުންނެވެ.

ސަލްމާން މަރާލާނެ ކަމުގެ އިންޒާރު އޭނާ ފުރަތަމަ ދިނީ ފުލުހުންގެ ބެލުމުގެ ދަށުގައި ހުއްޓާ 2018 ވަނަ އަހަރު އެވެ. ސަބަބެއް ކަމަށް އޭނާ ބުނީ ޖޯދުޕޫރުގައި ޗިންކާރާތައް މަރާލުމުން އޭގެ ބަދަލުހިފުމަށެވެ. އަދި އޭގެ ފަހުން ސަލްމާންގެ ބައްޕަ ސާލިމަށް ވެސް މަރުގެ އިންޒާރު ދީ އޭނާގެ ގޭންގުން ސިޓީއެއް ފޮނުވި އެވެ. އަދި މިދިޔަ އަހަރުގެ މާޗު މަހުގައި ވެސް ވަނީ އީމެއިލް މެދުވެރިކޮށް ސަލްމާން އާއި އޭނާގެ އާއިލާއަށް އިންޒާރު ދީފަ އެވެ.

ސިއްދިގީ އަވަހާރަކޮށްލި ފަހުން ވެސް ބިޝޯނީ ގޭންގުން ވަނީ ސަލްމާންގެ އަތުން ފަސް ކްރޯޑް ރުޕީސް ހޯދަން ޑިމާންޑުކޮށް، މުމްބާއީގެ ފުލުހުންނަށް އިންޒާރުގެ ސިޓީއެއް ފޮނުވައިފަ އެވެ. އެހެން ނޫނީ ސިއްދިގީ މަރާލި ގޮތަށް ސަލްމާންގެ ދުވަސް ވެސް ދުއްވާލާނެ ކަމަށް، އެ ގޭންގުން ފުލުހުންނަށް ފޮނުވި ސިޓީގައި ބުނެފައިވެ އެވެ.