ބުޅާ ފެސިލިޓީ އަންނަ މަހު 2 ގައި ހުޅުވަނީ

މާލޭގެ މަގުތަކުގައި އުޅޭ ބުޅާތައް ބަލަހައްޓަން ހަދާ ފެސިލިޓީ އަންނަ މަހުގެ 2 ގައި ހުޅުވަން ނިންމާފައިވާ ކަމަށް މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާ މިނިސްޓްރީން ބުނެފި އެވެ.

އެ މިނިސްޓްރީގެ އޮފިޝަލަކު "މިހާރު" އަށް ވިދާޅުވި ގޮތުގައި ބުޅާ ފެސިލިޓީގައި މިހާރު ކުރިއަށް ދަނީ ފިނިޝިންގެ މަސައްކަތެވެ.

"އަންނަ މަހުގެ ދޭއްގައި ހުޅުވުމަށް ތައްޔާރީތައް ދަނީ ވަމުން،" އޮފިޝަލް ވިދާޅުވި އެވެ.

ބުޅާ ފެސިލިޓީ ހަދަމުން އަންނަނީ، ހުޅުމާލެ ފަރުކޮޅުފުށިން މާލޭ ސިޓީ ކައުންސިލާ އެޗްޑީސީން ހަވާލުކުރި 5000 އަކަފޫޓުގެ ބިމެއްގަ އެވެ. އެއީ ހިޔާގެ ރަތް ކުލައިގެ ޓަވަރުތަކާ ދިމާލުން އޮންނަ ބިމެކެވެ.

މިދިޔަ މާޗް މަހުގެ ތެރޭގައި ހަދަން ފެށި ފެސިލިޓީ ނިންމައި ހުޅުވަން ތައްޔާރުވެފައިވާއިރު މި ތަނަށް ބޭނުންވާ ޑޮކްޓަރަކާއި ދެ ވެޓެރިނަރީ ނަރުހުން ހޯދަން ކައުންސިލުން ވަނީ އިއުލާނުކޮށްފަ އެވެ.

ވެޓެރިނޭރިއަންއެއް ހޯދަން އިއުލާންކޮށްފައި ވަނީ 35،000ރ. އަށެވެ. ވެޓެރިނަރީ ނަރުހުންގެ މުސާރައިގެ ގޮތުގައި ކަނޑައަޅާފައި ވަނީ 8،130ރ. އެވެ.

އިއުލާނުގައި ބުނީ މަސައްކަތް ކުރާ ކޮންމެ ދުވަހަކަށް ސާވިސް އެލަވަންސްގެ ގޮތުގައި 100ރ. ލިބޭނެ ކަމަށާއި އިތުރުގަޑީގައި މަސައްކަތް ކުރާނަމަ، މުސާރައިގެ 35 ޕަސެންޓު ވެސް ކަމަށެވެ.

މި ވަގުތީ ބުޅާ ފެސިލިޓީއަކީ މާލޭ ސަރަހައްދުގެ ޕާކްތަކާއި މަގުމައްޗާއި އާންމުން އެހެން ތަންތަނަށް އެއްވެ އުޅޭ ބުޅާތައް ގިނަވެ، އެ ބުޅާތަކަށް ލިބެމުންދާ އަނިޔާތަކާއި ތަފާތު ބަލިތައް ޖެހުމުން ސަލާމަތްކޮށް، ބުޅާތައް ދިރިއުޅޭނެ ރައްކާތެރި ސާފު މާހައުލެއް ހޯދައިދިނުމަށް ހުޅުވޭ ފެސިލިޓީއެއް ކަމަށް ކުރިން މިނިސްޓްރީން ބުނެފައިވެ އެވެ.

އެ ތަނުގައި ބުޅާތައް ކަރަންޓީން ކުރެވޭ ސަރަހައްދަކާއި ކްލިނިކަކާއި ލެބޯޓްރީއެއް ހުންނާނެ އެވެ. އަދި ބުޅަލަށް ޖޭހެން ޖެހޭ ބޭސްތައް ހުންނަ ފާމަސީއަކާއި އެ އެއްޗެހި ދުވެ އުޅޭ ސަރަހައްދެއް އޮންނާނެ އެވެ.

މާލޭގެ މަގުތަކުގައި ބުޅާ ގިނަވެ، އޭގެ ނަޖިހުން އާންމުންނަށް އުނދަގޫވާ ކަމުގެ ޝަކުވާ ބޮޑުވެ، ރައީސް ޑރ. މުހައްމަދު މުއިއްޒު މާލޭގެ މޭޔަރު ކަމުގައި ހުންނެވިއިރު ވެސް ވަނީ ވިލިމާލޭގައި ބުޅާ ފެސިލިޓީއެއް ހަދައިދޭނެ ބަޔަކު ހޯދަން ތިން ފަހަރު އިއުލާނުކޮށްފަ އެވެ.