މާލޭގެ މަގުމަތީގައި އުޅޭ ބުޅާތަކަށް ހާއްސަ "އޮޅު ހިޔާ" ހުޅުވައިފި

މާލެ ސަރަހައްދުގެ މަގުތަކުގައި އުޅޭ ބުޅާތައް ބަލަހައްޓަން ސަރުކާރުން ހެދި "އޮޅު ހިޔާ" މިއަދު ހުޅުވައިފި އެވެ.

ހުޅުމާލެ 2 ގައި ހެދި ބުޅާ ފެސިލިޓީ ހުޅުއްވައި ދެއްވީ ރައީސް ޑރ. މުހައްމަދު މުއިއްޒެވެ.

އެ ތަން ހަދާފައި ވަނީ ރައީސް މުއިއްޒުގެ އެދިވަޑައިގަތުމަކަށް މާލެ ސިޓީ ކައުންސިލަށް އެޗްޑީސީން ދޫކުރި 5،000 އަކަފޫޓުގެ ބިމެއްގަ އެވެ.

މި ވަގުތީ ބުޅާ ފެސިލިޓީއަކީ މާލެ ސަރަހައްދުގެ ޕާކުތަކާއި މަގުމައްޗާއި އާންމުން ތަންތަނުގައި އުޅޭ ބުޅާތައް ގިނަވެ، އެ ބުޅާތަކަށް ލިބެމުންދާ އަނިޔާތަކާއި ބުޅަލުން ޖެހޭ ބަލިތަކުން ސަލާމަތްކޮށް، ބުޅާތަކަށް ދިރިއުޅެވޭނެ ރައްކާތެރި މާހައުލެއް ހޯދައިދިނުމަށް ހުޅުވި ފެސިލިޓީއެކެވެ.

މިތަނުގައި ބުޅާތައް ކަރަންޓީނު ކުރެވޭ ސަރަހައްދަކާއި ކްލިނިކަކާއި ލެބޯޓްރީއެއް ވެސް ހުންނާނެ އެވެ. ބުޅަލަށް ދޭންޖެހޭ ބޭސްތައް ހުންނަ ފާމަސީއަކާއި އެ އެއްޗިއްސަށް ދުވެ އުޅެވޭ ސަރަހައްދެއް ވެސް މިތަނުގައި ހަދާފައިވެ އެވެ.

މާލޭގެ މަގުތަކުގައި ބުޅާ ގިނަވެ، އޭގެ ނަޖިހުން އާންމުންނަށް އުނދަގޫވާ ކަމުގެ ޝަކުވާ ބޮޑުވެފައިވަނިކޮށް ހުޅުވި މި ފެސިލިޓީގެ ސަބަބުން މާލޭގައި އުޅޭ މީހުންނަށް ކުރިއަށް އޮތް ދެތިން މަހުގެ ތެރޭގައި ހަމަޖެހުން ލިބޭނެ ކަމަށް ރައީސް މުއިއްޒު މިއަދު ވިދާޅުވި އެވެ. މާލޭގެ މަގުތަކުގައި އުޅޭ ބުޅާތައް ގެންގޮސް އެ އެއްޗިއްސަށް އަޅާލުން އެ ތަނުން ދޭނެ ކަމަށް އެ މަނިކުފާނު ވިދާޅުވި އެވެ.

އެ މަސައްކަތަކީ ކާމިޔާބު މަސައްކަތަކަށް ހެދުމަށް ކެޓް ކޮމިއުނިޓީގެ އެހީތެރިކަން ބޭނުންވާނެ ކަމަށް ވެސް ރައީސް ވިދާޅުވި އެވެ.

ރައީސް މުއިއްޒު މިއަދު ވިދާޅުވި ގޮތުގައި، މާލޭގެ މޭޔަރަކަށް ހުންނެވި ދުވަސްވަރު ވެސް ބުޅާ ފެސިލިޓީއެއް ގާއިމް ކުރެއްވުމުގެ މަސައްކަތް އެ މަނިކުފާނު ވަރަށް ބޮޑަށް ކުރެއްވި އެވެ. އެކަމަކު، އޭރުގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ އެއްބާރުލުން ލިބިވަޑައިނުގަތުމުން އެކަން ކާމިޔާބު ނުވި ކަމަށް ރައީސް މުއިއްޒު ވިދާޅުވި އެވެ.

އެހެންވެ، މިދިޔަ އަހަރުގެ ނޮވެމްބަރު 17 ގައި ރައީސްގެ މަގާމުގެ ހުވާކުރެއްވުމަށް ފަހު، ބުޅާ ފެސިލިޓީގެ މަސައްކަތުގައި ކުލަޖެއްސުމުގެ އަމަލީ މަސައްކަތް ފެއްޓެވިކަން އެ މަނިކުފާނު ފާހަގަކުރެއްވި އެވެ.

މިދިޔަ މަހު މާލޭ ސިޓީ ކައުންސިލުން ވަނީ ބުޅާ ފެސިލިޓީގައި މަސައްކަތް ކުރާނެ ޑޮކްޓަރުންނާއި ނަރުހުން ވެސް ހޯދައިފަ އެވެ.