"އޮޅު ހިޔާ" އަށް އަށް ބުޅަލުގެ ކާނާ ސަޕްލައިކޮށްދޭނެ ބަޔަކު ހޯދަނީ

މާލޭ ސަރަހައްދުގެ މަގުތަކުގައި އުޅޭ ބުޅާތައް ބަލަހައްޓަން ސަރުކާރުން ހެދި "އޮޅު ހިޔާ" އަށް ބުޅަލުގެ ކާނާ ސަޕްލައިކޮށްދޭނެ ފަރާތެއް ހޯދަން އިއުލާން ކޮށްފި އެވެ.

ހުޅުމާލެ 2 ގައި ގާތްގަނޑަކަށް 5،000 އަކަފޫޓުގެ ބޮޑު ބިމެއްގައި ހަދާފައިވާ ބުޅާ ފެސިލިޓީގައި ގެންގުޅޭ ބުޅާތަކަށް ކާނާ ސަޕްލައި ކޮށްދޭނެ ފަރާތެއް ހޯދުމަށް މާލެ ސިޓީ ކައުންސިލުން ކުރި އިއުލާނެއްގައި ބުނީ، އެކަމަށް ޝައުގުވެރިވާ ފަރާތްތަކުން މައުލޫމާތު ސާފުކުރުމާއި އަގު ހުށަހެޅުން މި މަހުގެ 20 ވަނަ ދުވަހުގެ 10:00 ގައި އޮންނާނެ ކަމަށެވެ. އެ ގަޑި އަށް މައުލޫމާތު ސާފުކުރަން ނުދާ ފަރާތްތަކާއި ގަޑި ޖެހުމުގެ ފަހުން އަންދާސީ ހިސާބު ބަލައިނުގަންނާނެ ކަމަށް ކައުންސިލުން ބުންޏެވެ.

ކައުންސިލުން ބުނީ، އަގު ހުށަހެޅުމުގައި ބައިވެރިވެވޭނީ ދިވެހި ކުންފުނިތަކާއި ޕާޓްނާޝިޕާއި ލޯކަލް އިންވެސްޓްމެންޓް އަދި ވިޔަފާރި ކުރުމުގެ ހުއްދަ ލިބިފައިވާ ފަރާތްތަކަށް ކަމަށެވެ.

ސަރުކާރުން ހެދި ބުޅާ ފެސިލިޓީ މިދިޔަ ހަފުތާގައި ހުޅުވި ނަމަވެސް އަދި އެ ތަނަށް ބުޅާތައް ގެންދާކަށް ނުފަށަ އެވެ.

.ބުޅާ ފެސިލިޓީއަކީ މާލެ ސަރަހައްދުގެ ޕާކުތަކާއި މަގުމައްޗާއި އާންމުން ތަންތަނުގައި އުޅޭ ބުޅާތައް ގިނަވެ، އެ ބުޅާތަކަށް ލިބެމުންދާ އަނިޔާތަކާއި ބުޅަލުން ޖެހޭ ބަލިތަކުން ސަލާމަތްކޮށް، ބުޅާތަކަށް ދިރިއުޅެވޭނެ ރައްކާތެރި މާހައުލެއް ހޯދައިދިނުމަށް ހުޅުވި ތަނެކެވެ.

މިތަނުގައި ބުޅާތައް ކަރަންޓީނު ކުރެވޭ ސަރަހައްދަކާއި ކްލިނިކަކާއި ލެބޯޓްރީއެއް ވެސް ހުންނާނެ އެވެ. ބުޅަލަށް ދޭންޖެހޭ ބޭސްތައް ހުންނަ ފާމަސީއަކާއި އެ އެއްޗިއްސަށް ދުވެ އުޅެވޭ ސަރަހައްދެއް ވެސް ހަދާފައިވެ އެވެ. އެތަނަށް ބޭނުންވާ ޑޮކްޓަރާއި ނަރުހުން ވެސް ވަނީ ހޯދައިފަ އެވެ.