އިޒްރޭލުން އީރާނަށް ހަމަލާދޭން ފަށައިފި

އިޒްރޭލަށް އީރާނުން ހަމަލާދީފައި ވާތީ ބަދަލު ހިފުމުގެ ގޮތުން ކަމަށް ބުނެ އީރާނަށް އިޒްރޭލުން ހަމަލާދޭން ފަށައިފި އެވެ.

"އިޒްރޭލާ ދެކޮޅަށް އީރާނުން އެތައް މަހެއް ވަންދެން ދެމުން ދިޔަ ހަމަލާތަކާ ގުޅިގެން، އީރާންގެ އަސްކަރީ މަގާމުތަކަށް އަމާޒުކޮށް، އިޒްރޭލުން މިހާރު މި ގެންދަނީ ހަމަލާ ދެމުން،" ހަމަލާ ދޭން ފެށިކަން ކަށަވަރުކޮށްދެމުން އިޒްރޭލުގެ އަސްކަރިއްޔާއިން ބުންޏެވެ.

ހަމަލާއާ ގުޅޭ މާ ބޮޑު ތަފްސީލެއް އަދި ނުލިބުނަސް އީރާނުން ބުނީ ވެރިރަށް ތެހެރާންގެ އެކި ހިސާބުތަކުން ވެސް ބާރުގަދަ ގޮވުންތަކުގެ އަޑު އިވިފައިވާ ކަމަށެވެ. އީރާންގެ އެއާ ޑިފެންސް ސިސްޓަމް އެކްޓިވޭޓްކޮށްފައި ވާއިރު އިޒްރޭލުން ބުނީ ހަމަލާ ދެނީ ދެ ފިޔަވައްސަކަށް ބަހާލައިގެން ކަމަށާއި ހަމަލާތައް ނިމުމަކާ ހަމަޔަށް އައިސްފައިވާ ކަމަށެވެ.

އިޒްރޭލުގެ އެކުވެރި އެމެރިކާއިން ބުނީ މި ހަމަލާތައް ބަލައިގަނެވޭ ކަމަށާއި މިއީ އިޒްރޭލުން އަމިއްލަ ދިފާއުގައި ދޭ ހަމަލާތަކެއް ކަމަށެވެ. ރިޕޯޓްތައް ބުނާ ގޮތުގައި ހަމަލާދޭނެ ގޮތާއި ވަގުތު އިޒްރޭލުން އޮތީ އެމެރިކާ އަށް ކުރިން އަންގައިފަ އެވެ. އޭގެ ކުރިން އިޒްރޭލުގެ ދިފާއަށް އެމެރިކާއިން ވަނީ ފިޔަވަޅުތައް ވެސް އަޅައިފަ އެވެ.

ހަމަލާތަކާ ބެހޭ ތަފްސީލްތަކެއް އަދި ނުލިބެ އެވެ.

އިޒްރޭލުން ފަލަސްތީނުގެ ޣައްޒާއަށް މީގެ އަހަރެއް ކުރިން ދޭން ފެށި ހަމަލާތަކުގައި ބައި ލައްކައާ ގާތްކުރާ އަދަދަކަށް މީހުން ޝަހީދުކޮށްފައި ވާއިރު މިހާރު ދަނީ ލުބްނާންގެ ހިޒްބުﷲ ޖަމާއަތުގެ ބާރު ކަނޑުވާލުމުގެ ނަމުގައި ލުބްނާނަށް ވެސް ވަރުގަދަ ހަމަލާތައް ދެމުންނެވެ. އިޒްރޭލުގެ ހަމަލާތަކުގައި ހަމާސްގެ ލީޑަރު އިސްމާއިލް ހަނިއްޔާ އީރާންގައި އަވަހަރާކޮށްލި ހާދިސާއަށް ފަހު އީރާނުން އިޒްރޭލަށް އެތައް ސަތޭކަ މިސައިލެއް ފޮނުވާލި އެވެ. އަދި ފަހުން ހިޒްބުﷲގެ ލީޑަރު ހަސަން ނަސްރުﷲ އަވަހާރަކޮށްލުމުން ވެސް އީރާނުން މިސައިލް ހަމަލާތަކެއް ދީފައިވެ އެވެ.

އީރާނަށް އިޒްރޭލުން ހަމަލާދޭން ފަށާފައި މި ވަނީ ހަނިއްޔާ އަވަހާރަކޮށްލުމުން ހަމާސްގެ ލީޑަރުކަމަށް އައްޔަންކުރި ޔަހްޔާ ސިންވާރު ވެސް އަވަހާރަކޮށްލައި އަދި ހިޒްބުﷲގެ އާ ލީޑަރުކަން ދެން ކުރައްވާނެ ކަމަށް ބެލެވޭ ސަފިއްޔުއްދީން ވެސް އަވަހާރަކޮށްލުމަށް ފަހުގަ އެވެ.