ވިއްސާރަވެ މެޗު ނުކުޅެވުނު، ރާއްޖޭގެ މައްޗަށް ލީޑްގައި އޮތް ތައިލެންޑަށް ތަށި

ބޫޓާން އިންޓަނޭޝަނަލް ކްރިކެޓް މުބާރާތުގެ ފައިނަލުގައި ރާއްޖެ އާއި ތައިލެންޑް ކުޅެން ހަމަޖައްސާފައި އޮތް މެޗު ނުކުޅެވުމުން ލީގުބުރުގެ އެންމެ ކުރީގައި އޮތް ތައިލެންޑަށް ތަށި ދީފި އެވެ.

ޓީ 20 ޓްރެންގިއުލާ މުބާރާތުގެ ފައިނަލު މެޗު ކުޅެން ދެ ޓީމު ދަނޑަށް ހާޒިރުވި އެވެ. އެކަމަކު ވިއްސާރައިގެ ސަބަބުން މެޗު ފެށޭ ގޮތެއް ނުވި އެވެ. މެޗުގެ ފެށުން އިތުރަށް ލަސް ކުރީ ވިއްސާރަ ހުއްޓާލަން ދެނެވެ.

ފަހުން ވާރޭ ވެހުން ހުއްޓާލި ނަމަވެސް، ބޫޓާންގެ ކްރިކެޓުން ބުނީ މެޗު ކުޅެވޭނެ ހާލަތެއް ޕިޗުގައި ވެސް ނެތް ކަމަށެވެ.

އެހެންވެ، ޗެމްޕިއަން ޓީމު ކަނޑައެޅުމުގައި ދެން ބެލީ ދެ ޓީމުގެ ތެރެއިން މުބާރާތުގެ ރައުންޑް ރޮބިން ބުރުގައި އެންމެ ރަނގަޅު ނަތީޖާ ނެރުނު ދެ ޓީމަށެވެ. ރާއްޖެއަށް ވުރެ ކުރީގައި ތައިލެންޑް އޮތުމުން، އެ ޓީމަށް ތަށި ދިނެވެ.

ލީގު ބުރުގެ އެއްވަނަ ތައިލެންޑުން ހޯދީ ހަ ޕޮއިންޓާ އެކު އެވެ. ލީގު ބުރުގައި ރާއްޖެ އަށް ލިބުނީ ތިންވަނަ އެވެ. އެއީ އެއް މެޗުން މޮޅުވެ ދެ ޕޮއިންޓް ހޯދައިގެންނެވެ. ދެވަނައިގައި އޮތީ ބޫޓާނާެވެ.

ރާއްޖޭން ފައިނަލަށް ދަތުރު ކުރީ ސެމީ ފައިނަލުގައި ބޫޓާން ބަލި ކުރުމަށް ފަހު އެވެ. ތައިލެންޑުން ފައިނަލަށް ދަތުރު ކުރީ އިންޑޮނޭޝިއާ ބަލި ކުރުމަށް ފަހު އެވެ.

ސެމީ ފައިނަލުން ބަލިވި ދެ ޓީމުގެ މެދުގައި ބުރާސްފަތި ދުވަހު ކުޅުނު ތިންވަނަ ހޮވި މެޗުން ބޫޓާން މޮޅުވީ އެއް ވިކެޓުންނެވެ.