ބޫޓާން އިންޓަނޭޝަނަލް މުބާރާތުގެ އެންމެ މޮޅު ބެޓްސްމަނަކަށް ރާއްޖޭގެ އަޒްޔާން

ބޫޓާން އިންޓަނޭޝަނަލް ކްރިކެޓް މުބާރާތުގެ އެންމެ މޮޅު ބެޓްސްމަންގެ މަގާމު ރާއްޖޭގެ ޔޫސުފް އަޒްޔާން ފަރުހަތު ހޯދައިފި އެވެ.

މުބާރާތުގައި ކުޅުނު ހަތަރު މެޗުގައި އަޒްޔާން ވަނީ 184 ލަނޑު ހަދައިފަ އެވެ. އިއްޔެ ކުޅެން އޮތް ފައިނަލު މެޗަކީ އޭނާ ކުޅޭނެ ފަސްވަނަ މެޗެވެ. ނަމަވެސް ވިއްސާރަވުމުގެ ސަބަބުން މެޗު ނުކުޅެވުނެވެ.

އެންމެ މޮޅު ބެޓްސްމަންގެ އިތުރުން މުޅި މުބާރާތުގައި އެންމެ ގިނައިން ހަޔަކަށް ޖެހި ބެޓްސްމަނަކީ ވެސް އަޒްޔާން އެވެ. އެ އެވޯޑް ވެސް އިއްޔެ އޭނާ އަށް ވަނީ ދީފަ އެވެ.

މުބާރާތުގެ އެންމެ މޮޅު ކުޅުންތެރިޔަކަށް ހޮވުނީ ބޫޓާންގެ ރަންޖަންގް މިކިއޯ ޑޯޖީ އެވެ. އެންމެ މޮޅު ވިކެޓް ކީޕަރަކަށް ހޮވުނީ ބޫޓާންގެ ޝެރިން ޓަށީ އެވެ.

އެންމެ މޮޅު އުކުންތެރިޔަކަށް ހޮވުނީ ތައިލެންޑްގެ ޖަންޑްރޭ ކޯއެޓްޒީ އެވެ.

ވިއްސާރައިގެ ސަބަބުން ފައިނަލު މެޗު ނުކުޅެވުމުން ޗެމްޕިއަން ޓީމު ކަނޑައެޅީ ރާއްޖެ އާއި ތައިލެންޑްގެ ތެރެއިން ލީގު ބުރުގައި އެންމެ ރަނގަޅު ނަތީޖާ ނެރުނު ޓީމު ބެލުމަށް ފަހު އެވެ.

ލީގު ބުރުގެ އެއްވަނަ ތައިލެންޑުން ހޯދީ ކުޅުނު ތިން މެޗުން ވެސް މޮޅުވެގެންނެވެ.