ޕީއެންސީއަށް މެމްބަރުން އިތުރުކުރަން ދައުލަތުގެ ވަސީލަތްތައް ބޭނުންކުރާކަމުގެ ތުހުމަތުކޮށް، އެމްޑީޕީގެ ކަންބޮޑުވުން

ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އަށް މެމްބަރުން އިތުރުކުރުމަށް ދައުލަތުގެ މުދަލާއި ވަސީލަތްތައް ބޭނުންކުރުމާއި މުއައްސަސާތަކަށް ނުފޯރުވަމުންދާ ކަމަށް އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ތުހުމަތުކޮށްފި އެވެ.

އެމްޑީޕީން ނެރުނު ބަޔާނެއްގައި ބުނީ ރައީސް ޑރ. މުހައްމަދު މުއިއްޒުގެ އެންގެވުމަށް ދައުލަތުގެ މުދަލާއި ވަސީލަތްތަކަށް ނުފޫޒު ފޯރުވައި، ޕީއެންސީއަށް މެމްބަރުން އިތުރުކުރުމުގެ މަސައްކަތްތައް ސަރުކާރުގެ އޮފީސްތަކާއި ކުންފުނިތައް މެދުވެރިކޮށް ކުރަމުން އަންނަ ކަމަށާއި އެއީ ކަންބޮޑުވާ ކަމެއް ކަމަށެވެ.

އެ ޕާޓީން ބުނި ގޮތުގައި ރަސްމީ ގަޑީގައި އެ މަސައްކަތް ކުރުމުގެ ސަބަބުން އޮފީސް މަސައްކަތްތަކަށް ބުރޫއަރާކަމުގެ ޝަކުވާ ވެސް މުވައްޒަފުން ކުރަމުންދެ އެވެ.

"ޕާޓީއަށް މީހުން ވެއްދުމަށް ޓަކައި ފޯމު ފުރުމުގެ މަސައްކަތް، ސަރުކާރުގެ އިމާރާތްތަކުގައި އަދި މަސައްކަތުގެ ރަސްމީ ގަޑިތަކުގައި ކުރަމުންގެންދާތީ އާއި، މުވައްޒަފުން ލައްވާ އެކަން ކުރުވަމުން ގެންދާތީ ބައެއް ތަންތަނުގެ މަސައްކަތަށް ދަތިވަމުންދާ ކަމަށް އެ ތަންތަނުގެ މުވައްޒަފުންގެ ފަރާތުން މައުލޫމާތު ލިބެމުންދެ އެވެ،" އެމްޑީޕީގެ ބަޔާނުގައި ބުންޏެވެ.

އެމްޑީޕީން ބުނި ގޮތުގައި ޕީޕީއެމް ސަރުކާރާ އެއްގޮތަށް މިވަގުތު އޮތް ޕީއެންސީގެ ސަރުކާރުން ވެސް ޕާޓީއަށް މެމްބަރުން އިތުރުކުރުމަށް ވަޒީފާއަށް ނުފޫޒު ފޯރުވަމުންދާ ކަމުގެ ޝަކުވާ ވެސް ލިބެމުންދާ ކަމަށެެވެ. އެެހެންވެ، ވަޒީފާގެ ބިރު ދައްކައި ޕީއެންސީއަށް ސޮއިކުރަން މަޖުބޫރުކުރުމަކީ ބަލައިގަނެވޭނެ ކަމެއް ނޫން ކަމަށް އެމްޑީޕީގެ ބަޔާނުގައިވެ އެވެ.

ސަރުކާރުގެ މުއައްސަސާތަކުގައި ރައްކާކޮށްފައި ހުރި އާންމު ރައްޔިތުންގެ ޒާތީ މައުލޫމާތު ބޭނުންކޮށްގެން ޕީއެންސީއަށް ފޯމު ފުރައި، މެމްބަޝިޕް އިތުރުކުރުމަށް މަސައްކަތްކުރަމުންދާ މައްސަލަ ސީރިއަސް މައްސަލައެއްގެ ގޮތުގައި އިލެކްޝަންސް ކޮމިޝަނުން ބަލައި ފިޔަވަޅު އަޅަން ޖެހެ އެވެ.

އެމްޑީޕީން ވަނީ ސޮއި ފޯޖުކޮށްގެން ޕީއެންސީގެ ދަފްތަރުގައި މީހުން ރަޖިސްޓްރީ ކުރަމުންދާ މައްސަލަ ތަހުގީގުކުރުމަށް ވެސް ކަމާ ގުޅޭ އިދާރާތަކަށް ގޮވާލައިފަ އެވެ.