އަނިޔާގެ ހިޔަނި އެޅިފައި އޮތަސް އާޓެޓާ ދިނީ ޔަގީންކަން

އަނިޔާގެ ސަބަބުން މިވަގުތު ޓީމު ބަލިކަށިވެފައި އޮތަސް ޕްރިމިއާ ލީގުގެ ޗެމްޕިއަންކަން ހޯދުމުގެ ރޭހުގައި އާސެނަލް ވަރުގަދައަށް ހަނގުރާމަކުރާނެ ކަމަށް އެ ޓީމުގެ ކޯޗު މިކޭލް އާޓެޓާ ބުނެފި އެވެ.

ލީގުގައި ރޭ އަމިއްލަ ދަނޑުގައި ލިވަޕޫލާ 2-2 އިން އެއްވަރުވުމުން އާސެނަލް އަށް ވަނީ ތާވަލުގެ ދެ ވަނަ އަށް އަރައި، އެއް ވަނައިގައި އޮތް މެންޗެސްޓާ ސިޓީއާ ކައިރިކުރަން ލިބުނު ފުރުސަތު ގެއްލިފަ އެވެ. ރޭގެ މެޗުގައި އާސެނަލުން ދެ ފަހަރު ލީޑު ނެގި ނަމަވެސް ލިވަޕޫލުން ވަނީ އެ ޓީމު މޮޅުވިޔަނުދީ ހިފަހައްޓައިފަ އެވެ.

ތާވަލުގެ އެއް ވަނައިގައި ސިޓީ އޮތީ 23 ޕޮއިންޓް ހަމަކޮށްގެންނެވެ. ލިވަޕޫލް ދެ ވަނައިގައި އޮތީ އެއް ޕޮއިންޓް މަދުން، 22 ޕޮއިންޓާ އެކު އެވެ. އާސެނަލް ތިން ވަނައިގައި އޮތީ 18 ޕޮއިންޓާ އެކު އެވެ.

އެމިރޭޓްސްގައި ރޭ ކުޅުނު މެޗުގެ ނުވަ ވަނަ މިނެޓުގައި އާސެނަލަށް ލީޑު ނަގައިދިނީ ބުކާޔޯ ސަކާ އެވެ. އެކަމަކު އޭގެ ނުވަ މިނެޓު ފަހުން ލިވަޕޫލުގެ ޑިފެންޑަރު ވާޖިލް ވެން ޑައިކް އެ ޓީމަށް އެއްވަރުކޮށްދިނެވެ. އާސެނަލުން ދެ ވަނަ ފަހަރަށް ލީޑު ނެގީ ހާފު ނިމެން ދެ މިނެޓަށް ވެފައިވަނިކޮށް މިކެލް މެރިނޯ ޖެހި ގޯލުންނެވެ. އެކަމަކު 81 ވަނަ މިނެޓުގައި މުހައްމަދު ސަލާހު ލިވަޕޫލަށް އެއްވަރުކޮށްދިނެވެ.

ސަސްޕެންޝަނުގެ ސަބަބުން ވިލިއަމް ސަލީބާ އަދި އަނިޔާގެ ސަބަބުން ރިކާޑޯ ކަލިފިއޯރީ ނެތި ކުޅުމުން ބަލިކަށިވެފައި އޮތް އާސެނަލްގެ ޑިފެންސް އިތުރަށް ބަލިކަށިވީ ރޭ ގެބްރިއަލް މަގަލައިސް އާއި ޔުރިއެން ޓިމްބާ އަށް އަނިޔާވުމުންނެވެ. އެހެންވެ ރޭގެ މެޗުގެ ފަހު ހާފުގައި އާޓެޓާ އަށް ޖެހުނީ އެހެން މަގާމުތަކުން ކުޅުންތެރިން ޑިފެންސަށް ލާށެވެ.

އެކަމަކު އާޓެޓާ ބުނީ ރޭގެ މެޗުން މޮޅު ނުވެވުނީ ފުރަތަމަ ހާފުގައި ދެއްކި މޮޅު ކުޅުމާ އެއްވަރަށް ގޯލުތަކެއް ނުޖެހިގެން ކަމަށެވެ.

"ފުރަތަމަ ހާފުގައި މުޅިން ވެސް އަހަރެމެން މެޗު ޑޮމިނޭޓްކުރީ. ސްކޯލައިން އެއަށް ވުރެ ބޮޑުވާން ޖެހޭ. އެކަމަކު ފެނުނީ ބައިކޮޅަށް ގޯލުތަކެއް ވަތްތަން. އެއީ ދެރަވި ކަމަކީ،" އާޓެޓާ ބުންޏެވެ.

"ދެ ވަނަ ހާފުގައި މާބޮޑު ތަފާތުތަކެއް ނުދެއްކުނު. އަހަރެމެންނަށް މާބޮޑު ހިތްވަރެއް ވެސް ނުކުރެވުނު. އެއީ ވަރަށް ހިތްހަމަނުޖެހުނު ސަބަބެއް. މިއަށް ވުރެ ޖެހިލުންކުޑަކޮށް ކުޅެން ޖެހޭނީ."

އާސެނަލަށް ކުރިމަތިވެފައިވާ އަނިޔާގެ މައްސަލަތަކާ ހެދި އެ ޓީމަށް ލީގަށް ވާދަނުކުރެވޭނެ ކަމަށް ބައެއް ފަރާތްތަކުން ބުނި ނަމަވެސް އާޓެޓާ އެކަން ގަބޫލެއް ނުކުރެ އެވެ.

"ރަނގަޅު، އަހަރެމެން ޓީމު މިއޮތީ ބަލިކަށިކޮށް އަނިޔާގެ ސަބަބުން. އެކަމަކު މި ހާލަތުގެ ސަބަބުން އަހަރެމެންނަށް އިތުރު ހިތްވަރެއް ލިބޭނެ. އަހަރެމެން ޗެމްޕިއަންކަމަށް ވާދަކުރާނަން. ތަށީގެ ހަނގުރާމައިގެ ތެރޭގައި އާސެނަލް ދެމި އޮންނާނެ،" އާޓެޓާ ބުންޏެވެ.