ކޭޕާކުގެ ސަބްސިޑަރީ ކުންފުނިތަކާ އެކު ހެދި އެއްބަސްވުންތަކުން އެފްއޭއެމް އަނދަވަޅަކަށް

ހުޅުމާލޭގައި ލަގްޒަރީ އެޕާޓްމަންޓް އިމާރާތްތަކެއް ތަރައްގީކޮށް ވިއްކުމުގައި މަކަރާއި، ހީލަތް ހެދިކަމުގެ ތުހުމަތުކުރެވިފައިވާ ކޭޕާކް ކުންފުނީގެ ސަބްސިޑަރީ ކުންފުނިތަކާ އެކު ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެއްބަސްވުންތަކުން އެ އެސޯސިއޭޝަން ސަލާމަތް ނުވާ ހިސާބަށް ހިނގައްޖެ އެވެ.

ކޭޕާކްގެ ސަބްސިޑަރީ ކުންފުނިތަކާ އެކު ގާތްގަނޑަކަށް 50 މިލިއަން ޑޮލަރުގެ އެއްބަސްވުންތައް، ބައްސާމް އަދީލް ޖަލީލުގެ ދައުރުގައި އެފްއޭއެމް އިން ހެދި އެވެ.

ކޭޕާކްގެ ސަބްސިޑަރީ ކުންފުންޏެއް ކަމަށްވާ، ޓީކުއިން ކޮންސްޓްރަކްޝަން ކޯ ލިމިޓެޑާ އެކު ހެދި އެއްބަސްވުމުގެ ދަށުން ވިލިމާލޭ ފުޓްބޯޅަ ދަނޑާއި ހުޅުމާލޭގައި ހަދަން ނިންމި ފުޓްބޯޅަ ސްކޫލްގެ މަސައްކަތް ކޮށްފައިވުމުން ދޭން ޖެހޭ ފައިސާ ދީފައި ނުވުމުން އެ ކުންފުންޏަށް 52 މިލިއަނަށް ވުރެ ގިނަ ރުފިޔާ ދައްކަން ކޯޓުން ވަނީ ހުކުމް ކޮށްފަ އެވެ.

ކޭޕާކްގެ ސަބްސިޑަރީ އެހެން ކުންފުންޏެއް ކަމަށްވާ ސްކައި ވިންޑް ގްލޯބަލް ކުންފުންޏަކާ އެކު ވެސް އެފްއޭއެމުން ވަނީ 17 މިލިއަން ޑޮލަރުގެ އެއްބަސްވުމެއް ހަދައިފަ އެވެ. އެއީ އެ އެސޯސިއޭޝަންގެ އޮފީސް އިމާރާތް 20 ބުރިއަށް އިމާރާތް ކުރުމަށާއި މާފަންނު ސްޓޭޑިއަމްގައި ހަތަރު ބުރިއަށް އިންޑޯ ފުޓްސަލް އެރީނާއެއް ހެދުމަށެވެ.

ވިހި ބުރީގެ އިމާރާތް ހެދުމަށް އެފްއޭއެމް ހައުސް ހުސްކުރުމަށް ފަހު އެ އެސޯސިއޭޝަނުން އަމިއްލަ މީހެއްގެ އިމާރާތާތުން ތަނެއް ކުއްޔަން ހިފައިގެން އޮފީހެއް ހިންގި އިރު ވެސް، އެ ކުންފުނިން އެތަނުގެ އެއްވެސް މަސައްކަތެއް ކޮށްފައެއް ނުވެ އެވެ.

އިމާރާތް ނޭޅުނު އިރު ކުއްޔަށް ހިފި އިމާރާތަށް ވެސް އެފްއޭއެމުން ގަވާއިދުން ކުލި ނުދައްކާ މައްސަލަ ވެސް ފެންމަތިވި އެވެ.

ގައުމީ ފުޓްބޯޅަ ސްކޫލްގެ ދަނޑު ނޭޅުނެވެ. ނަތީޖާއަކަށް ވީ ދިވެހި ކުންފުންޏެއް ލައްވާ ހެދި އެތަނުގެ އިމާރާތް ވެސް އެފްއޭއެމަށް ބޭނުން ނުކުރެވުމެވެ. އެ ބިމަށް ކުލި ނުދައްކައިގެން އެންމެ ފަހުން އެފްއޭއެމް އަތުން ވެސް އެ ބިން އަތުލި އެވެ.

އެ ކުންފުނިތަކާ އެކު އެއްބަސްވުންތައް ހެދި އިރު އެ ކުންފުނިތައް ރާއްޖޭގައި ރަޖިސްޓަރީ ކޮށްފައިވޭތޯ ވެސް އެފްއޭއެމުން ބަލާފައި ނުވެ އެވެ.

އެފްއޭއެމްގައި އޭރު މަސައްކަތް ކުރި ސީނިއާ އޮފިޝަލަކު ބުނީ، އެ ކުންފުނިތަކާ އެކު އެއްބަސްވުން ހެދީ ކޭޕާކްގެ ރާއްޖޭގެ ހިއްސާދާރު ހަސަން މަމްދޫހު (މަންޑޭ) ގެ ބަހަށް އިތުބާރުކޮށްފައި ކަމަށެވެ.

"މަންޑޭ އޭރު ދިން ކޮމިޓްމެންޓާ ދެއްކި ވާހަކަތަކަށް އިތުބާރުކޮށްފައި އެއްބަސްވުންތައް ހެދީ،" އޮފިޝަލް ބުންޏެވެ.

ކޭޕާކްގެ ކުންފުންޏަށް ދައްކަން ޖެހޭ ފައިސާއާ އެކު އެފްއޭއެމްގެ ދަރަނި 150 މިލިއަން ރުފިޔާ އަށް ވުރެ މައްޗެވެ. އެ އެސޯސިއޭޝަން އޮތީ ގާތްގަނޑަކަށް ބަނގުރޫޓް ވެފަ އެވެ.