ބައެއް ޕްރައިވެޓް އިންޝުއަރެންސްތަކުން ކޭޝްލެސް ސާވިސް މެދުކަނޑާލައިފި

ޕްރައިވެޓް އިންޝުއަރެންސް އޮތް ނަމަ، އެ އިންޝުއަރެންސްގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ނިންމި ނިންމުމާ އެކު ބައެއް އިންޝުއަރެންސް ކުންފުނިތަކުން ކޭޝްލެސް ސާވިސް މެދުކަނޑާލައިފި ކަަމަށް އޭޑީކޭ އިން މިއަދު ބުނެފި އެވެ.

ކޭޝްލެސް ސާވިސްއަކީ ހިދުމަތް ހޯދަން ހޮސްޕިޓަލަށްދާ މީހާއަށް، އިންޝުއަރެންސް ދޭ ތަނާއި ހޮސްޕިޓަލާ ދެމެދު ބިލިންގެ މުއާމަލާތް ހިންގުމެވެ. އެކަމަކު އެ ހިދުމަތް ހުއްޓާލުމާ އެކު ދެން ޑޮކްޓަރަށް ދެއްކުމަށް ފައިސާ ދައްކަން ޖެހެނީ އަމިއްލަ އަތުންނެވެ.

އޭޑީކޭގައި ބޭއްވި ނޫސްވެރިންގެ ބައްދަލުވުމެއްގައި އެ ހޮސްޕިޓަލުގެ ޗީފް މެޑިކަލް އޮފިސަރު ޑރ. އަބްދުﷲ ނިޔާފު ވިދާޅުވީ ސަރުކާރުން އާސަންދަ ސްކީމަށް ގެނައި ބަދަލާ އެކު ޕްރައިވެޓް އިންޝުއަރެންސްދޭ ބައެއް ފަރާތްތަކުން ބަދަލުތައް ގެނެސް އެ ހޮސްޕިޓަލަށް އަންގަމުން އަންނަ ކަމަށެވެ.

ނިޔާފު ވިދާޅުވި ގޮތުގައި ކޭޝްލެސް ސާވިސް ހުއްޓާލަން ނިންމައި ޕްރައިވެޓް އިންޝުއަރެންސް ދެމުންދާ ގިނަ ތަންތަނުން ވަނީ އަންގައިފަ އެވެ.

"ޕްރައިވެޓް އިންޝުއަރެންސްތަކުން ދެމުން އައި ކޭޝްލެސް ސާވިސް ހިދުމަތް ހުއްޓާލުން. މީގެ މާނައަކީ ފަރުވާ ހޯދަން އަންނަ ފަރާތްތަކުން ހިދުމަތަށް ފައިސާ، ސާވިސް ޕްރޮވައިޑާ އަތަށް ދައްކަން ނުޖެހި، ހޮސްޕިޓަލާއި އިންޝުއަރެންސް ދޭ ތަނުން ބިލިން މުއާމަލާތް ހިންގުން. މިހާރު ގިނަ ތަންތަނުން އެދުނީ ކޭޝްލެސް ހުއްޓާލަން،" ނިޔާފު ވިދާޅުވި އެވެ.

ނިޔާފު ވިދާޅުވި ގޮތުގައި ޕްރައިވެޓް އިންޝުއަރެންސްގެ ލިމިޓް ހަމަނުވާ ނަމަ، ހިދުމަތް ހޯދަންދާ މީހާގެ އަތުން އެ ހިދުމަތަށްވާ ފުރިހަމަ އަގު ނަގާނެ އެވެ. އަދި އެ ފައިސާ ހޮސްޕިޓަލަށް ދެއްކުމުން، ބިލެއް ދޭނެ ކަމަށާއި އެ ބިލު ޖެހެނީ ޕްރައިވެޓް އިންޝުއަރެންސް ހިދުމަތްދޭ ތަނަށް ހުށަހަޅައިގެން، ޑޮކްޓަރަށް ދެއްކުމަށް ހޭދަކުރި ފައިސާ އަނބުރާ ހޯދަން ކަމަށް އޭނަ ވިދާޅުވި އެވެ.

"އޭގެ މާނައަކީ ޕްރައިވެޓް އިންޝުއަރެންސް އޮތް ފަރާތްތަކުން އޭނާގެ ލިމިޓް ހަމަނުވާ ކަމަށް ވާނަމަ، އޭނާ އެ ހޯދަން އައި ހިދުމަތުގެ ފުރިހަމަ އަގު އޭނާ އަތުން ދައްކާފައި އޭގެ ބިލްކޮޅު ކަލެކްޓްކޮށްފައި އޭގެ ބިލްކޮޅު އިންޝުއަރެންސަށް ސަބްމިޓްކޮށްގެން އެ ފައިސާ އަނބުރާ ހޯދޭނެއޭ،"

ޕްރައިވެޓް އިންޝުއަރެންސް ދޭ މީހުންގެ އެންގުމަށް އެ ބަދަލު ގެނެސް ހިދުމަތް ދެމުން އައި ނަމަވެސް އިމަޖަންސީ ފަރުވާ ހޯދުމަށް އަންނަ ފަރާތްތަކަށް މިހާރެކޭ އެއްގޮތަށް، ބިލިންގެ ކުރިން ހިދުމަތްދޭނެ ކަމަށް ވެސް ނިޔާފު ވިދާޅުވި އެވެ.

އިއްޔެ އިން ފެށިގެން މި ބަދަލާ އެއްގޮތަށް އަމަލުކުރަމުން އަންނައިރު މެމޯ ހެއްދުމަށް ވަގުތު ނެގުމާއި ކިއު ދިގުވާ މައްސަލަ އޮތީ ކުރިމަތިވެފަ އެވެ.

ނިޔާފު ވިދާޅުވި ގޮތުގައި ސަރުކާރުން މި ބަދަލު ގެންނަން ނިންމާފައިވާކަން އޭޑީކޭއަށް ރަސްމީކޮށް އެންގީ މިދިޔަ ބުރާސްފަތި ދުވަހުގެ ހަވީރު 4:00 ގެ ފަހުންނެވެެ. އެހެންވެ، މިކަމަށް މުވައްޒަފުން އަހުލުވެރިކުރުމަށް ވަގުތު ނަގާނެ ކަމަށް އޭނާ ވިދާޅުވި އެވެ.

އޭނާ ވިދާޅުވީ މި ބަދަލާ އެކު ޕްރައިވެޓް އިންޝުއަރެންސް ފޯރުކޮށްދޭ މީހުންގެ ޕޯޓަލްތަކަށް ވަދެ، ބަލި މީހާގެ ބާކީ އޮތީ ކިހާ ޕަސެންޓެއްތޯ ބަލަން ޖެހެ އެވެ.

ކޮންމެ ޕްރައިވެޓް އިންޝުއަރެންސެއްގެ ޕޯޓަލުން އަޅުގަނޑުމެން މިޖެހެނީ އޭނާގެ ޕްރައިވެޓް އިންޝުއަރެންސް އޮތްތޯ އަދި އޭނާގެ ބާކީ އޮތްތޯ ބަލަން. ނެތިއްޔާ އާސަންދަ އަދި އޮތިއްޔާ އެ އިންޝުއަރެންސަކަށް ބިލްކުރަން މިޖެހެނީ،" އޭނާ ވިދާޅުވި އެވެ.

"ބިލް ކުރާ ވާހަކަ ބުންޏަސް ކޭޝްލެސް ސާވިސް ހުއްޓާލީމަ ބިލެއް ހަދާއިރު އެ ފަރާތްތަކުގައި ދަންނަވާނެ ހޯއްދަވަން އައި ހިދުމަތުގެ ޖުމްލަ އަގަކީ މިހާވަރޭ. އެވަރަށް ފައިސާ ދެއްކީމަ ބިލެއް ދޭނަމޭ. އެ ބިލް އެ ފަރާތުން އަމިއްލައަށް ޕްރައިވެޓް އިންޝުއަރެންސަށް ހުށަހެޅީމަ އެ ބައެއްގެ ޕޮލިސީގައި އޮތް އުސޫލުން އެއަށް ލިބެންވާ ފައިސާ ލިބޭނެއޭ،"

އެ ބަދަލުގެ ސަބަބުން ޕްރައިވެޓް އިންޝުއަރެންސް އޮތް މީހުންނަކީ ދިގު މުއްދަތަށް ބޭހެއް ކާ މީހެއް ކަމަށް ވިޔަސް އެ ބޭސް ނަގަން ޖެހެނީ ވެސް އަމިއްލަ އަތުންނެވެ.

"އާސަންދަ މެމޯއަކުން ޑޮކްޓަރެއްގެ ކޮންސަލްޓޭޝަނެއް ހެދިއްޔާ ނޫނީ ޖެނަރޭޓްވާ ބޭސް ސިޓީއެއްގައި ވެސް އާސަންދަ ކަވާއެއް ނުކުރާނެ. އެހެންވީމަ ޕްރައިވެޓް އިންޝުއަރެންސް އަކުން ކޮންސަލްޓޭޝަންގެ ފީ ދައްކާ ގޮތަށް ބޭސް ސިޓީ ކަވާ ވަންޏާ ވާނީ އެ އިންޝުއަރެންސްއަކުން."

އާ އުސޫލަށް އަމަލުކުރަން ފެށި ވަގުތަކީ ގިނަ ސާވިސް ޕްރޮވައިޑަރުންގެ ހިދުމަތް ބަންދު ދުވަހެކެވެ. އެހެންވެ، ޕީކް ގަޑިތަކުގައި މިކަމަށް ހިނގާނެ ލޯޑު ސާފު ނުވާ ކަމަށް ނިޔާފު ވިދާޅުވި އެވެ.

އާސަންދައިން ސިއްހީ ހިދުމަތްދޭ ތަންތަނަށް ފޮނުވި ސާކިއުލާގައި ފާހަގަކުރާ ކަންކަން:

- ސިއްހީ ހިދުމަތް ހޯދުމަށް އަންނަ ފަރާތަކީ އަމިއްލަ އިންޝުއަރެންސެއް އޮތް ފަރާތެއް ނަމަ، މި ހިދުމަތުގެ މެމޯ ތައްޔާރުކުރުމުގެ ކުރިން، އެކަން ކަށަވަރުކޮށް، އެ އިންޝުއަރެންސެއްގެ ކަވަރޭޖް ލިމިޓް ހަމަވަންދެން އެ އިންޝުއަރެންސް މެދުވެރިކޮށް ހިދުމަތް ފޯރުކޮށްދިނުން.

- ހޯދަން އެދޭ ހިދުމަތަކީ އަމިއްލަ އިންޝުއަރެންސް އިން ކަވާކުރާ ހިދުމަތް ނަމަ، އެ އިންޝުއަރެންސް މެދުވެރިކޮށް ހިދުމަތް ފޯރުކޮށްދިނުން (އެންމެހައި ހިދުމަތްތަކާއި ބޭސް ސިޓީގެ ހިދުމަތްތައް).

- މިހާރު އަމަލުކުރަމުންދާ އުސޫލާ އެއްގޮތަށް އައުޓްޕޭޝަންޓް ހިދުމަތްތަކަށް އަމިއްލަ އިންޝުއަރެންސާ އެކު އާސަންދައަށް ބިލް ނުކުރުން.

- އަމިއްލަ އިންޝުއަރެންސެއްގެ ދަށުން ނުލިބޭ ހިދުމަތެއް، އާސަންދައިން ލިބޭ ނަމަ، އެ ހިދުމަތެއް އާސަންދައިގެ ދަށުން ފޯރުކޮށްދިނުން.

- އަމިއްލަ އިންޝުއަރެންސް ކަވަރޭޖް ލިމިޓް ހަމަވެފައިވާ ނަމަ، އަދި އާސަންދައިން އެ ހިދުމަތެއް ލިބޭ ނަމަ، އާސަންދައިގެ ދަށުން ފޯރުކޮށްދިނުން.

- އަމިއްލަ އިންޝުއަރެންސެއް އޮންނަ ފަރާތްތަކުން ހޯދާ ހިދުމަތާ ގުޅޭ ކަވަރޭޖް ލިމިޓް ހުސްނުވާ ނަމަ، ހިދުމަތް ފޯރުކޮށްދިނުމުގައި އާސަންދަ ޕޯޓަލް ބޭނުންނުކުރުމާއި ބޭސް ސިޓީ ލިޔުމަށް ވިނަވި ޕޯޓަލް ބޭނުން ނުކުރުން.

- ޕްރައިވެޓް އިންޝުއަރެންސްގެ ތެރޭގައި ފުލުހުންނާއި އެމްއެންޑީއެފުން ހިންގާ ސްކީމްތައް ނުހިމެނޭނެ.

- އިންޕޭޝަންޓް ބިލްތަކަށް މިހާރު ވެސް އަމަލުކުރަމުންދާ އުސޫލުން އާސަންދަ ސްކީމުން ހިދުމަތް ދިނުން.

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން މި އަހަރުގެ ޖެނުއަރީ އިން ޖޫން މަހުގެ ނިޔަލަށް އާސަންދަ ސްކީމަށް ވަނީ 918 މިލިއަން ރުފިޔާ ހޭދަކޮށްފަ އެވެ. މިއީ އަހަރަށް ކަނޑައަޅާފައިވާ ބަޖެޓުގެ ގާތްގަނޑަކަށް 50 ޕަސެންޓެވެ. އާސަންދައަށް ހޭދަކުރަން 1.9 ބިލިއަން ރުފިޔާ ބަޖެޓުގައި ހިމަނާފައިވެ އެވެ.