އެލައިޑުން ކޭޝްލެސް ސާވިސް އަލުން ފަށައިފި

ޕްރައިވެޓް އިންޝުއަރެންސެއް އޮތް ނަމަ އެ އިންޝުއަރެންސްގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ނިންމި ނިންމުމާ އެކު، ކޭޝްލެސް ސާވިސް އެލައިޑުން އިއްޔެ މެދުކަނޑާލި ނަމަވެސް އަލުން އެ ހިދުމަތް ފަށައިފި އެވެ.

ރާއްޖޭގައި އެންމެ ގިނަ ބަޔަކު އިންޝުއަރެންސް ހިދުމަތް ހޯދާ އެލައިޑުން އެކަން މިހާރު ވަނީ ސިއްހީ ހިދުމަތްދޭ ތަންތަނަށް ރޭ ފޮނުވި އީމެއިލަކުން އަންގާފައި ކަމަށް ވެ އެވެ.

އާސަންދަ ކުންފުނިން ވަނީ ޕްރައިވެޓް އިންޝުއަރެންސް އޮތް ނަމަ އެ އިންޝުއަރެންސްގެ ލިމިޓް ހަމަވުމުން ނޫން ގޮތަކަށް އާސަންދަ ދޫނުކުރަން ނިންމައި، އެކަމަށް މިދިޔަ ބުރާސްފަތި ދުވަހުން ފެށިގެން އަމަލުކުރަން ފަށައިފަ އެވެ.

އެ ބޮޑު ބަދަލާ އެކު، އެލައިޑް އިންޝުއަރެންސް ހިމެނޭހެން ބައެއް ކުންފުނިތަކުން ވަނީ ބިލް ކުރާ އުސޫލުން ހިދުމަތް ދިނުން މެދުކަނޑާލައިފަ އެވެ. އެހެންވެ، އަމިއްލަ އިންޝުއަރެންސެއް އޮތް ނަމަވެސް، ހިދުމަތް ހޯދާ މީހާގެ އަތުން އޭގެ ފުރިހަމަ އަގު ނަގާނެ އެވެ.

އެ ފައިސާ އަނބުރާ ލިބޭނީ ފަރުވާ ހޯދަން ހޭދަކުރި ބިލް، އެ މީހާ އަމިއްލަ އަށް އިންޝުއަރެންސް ކުންފުންޏަށް ހުށަހެޅުމުންނެވެ.

ނަމަވެސް، އެލައިޑުގެ ނިންމުން ބަދަލުކޮށް، ސިއްހީ ހިދުމަތް ދޭ ތަންތަނަށް އެ ކުންފުނިން ރޭ ފޮނުވި މެއިލްގައި ބުނީ އައުޓްޕޭޝަންޓް ހިދުމަތް ހޯދާ މީހެއްގެ ލިމިޓް ހަމަވަންދެން ކޭޝްލެސް ކޮށް ހިިދުމަތް ދިނުމަށް މިހާރު ނިންމާފައިވާ ކަމަށެވެ. އެހެންވެ، އެ ބަލިމީހަކު "އައުޓްޕޭޝަންޓް" ގެ ހިދުމަތް ދޭ ތަނަކުން ސީދާ ބިލްތައް އެލައިޑަށް މިހާރު ފޮނުވޭނެ ކަމަށް މެއިލްގައި ވެ އެވެ.

އެހެންވެ، އެ ކަމުގައި ދިމާވި ދަތިތަކަށް، ސަރުކާރުގެ އިންޝުއަރެންސް ކުންފުނިން ވަނީ މައާފަށް އެދިފަ އެވެ.

ކޭޝްލެސް ސާވިސްއަކީ ހިދުމަތް ހޯދަން ހޮސްޕިޓަލަށްދާ މީހާ އަށް، އިންޝުއަރެންސް ދޭ ތަނާއި ހޮސްޕިޓަލާ ދެމެދު ބިލިންގެ މުއާމަލާތް ހިންގުމެވެ.

އާސަންދައިގެ ބަދަލުތަކާ ގުޅިގެން އޭޑީކޭ ހޮސްޕިޓަލުން އިއްޔެ ބޭއްވި ނިއުސް ކޮންފަރެންސްގައި، ޗީފް މެޑިކަލް އޮފިސަރު ޑރ. އަބްދުﷲ ނިޔާފު ވިދާޅުވީ ޕްރައިވެޓް އިންޝުއަރެންސް ފޯރުކޮށްދޭ މީހުންގެ ޕޯޓަލްތަކަށް ވަދެ، ބަލި މީހާގެ ބާކީ އޮތީ ކިހާ ޕަސެންޓެއްތޯ ބަލަން ޖެހޭނެ ކަމަށެވެ.

އެ ބަދަލު ގެންނަން ނިންމާފައިވާކަން ސަރުކާރުން އޭޑީކޭއަށް ރަސްމީކޮށް އެންގީ ވެސް މިދިޔަ ބުރާސްފަތި ދުވަހުގެ ހަވީރު 4:00 ގެ ފަހުން ކަމަށް ވާތީ، މިކަމަށް މުވައްޒަފުން އަހުލުވެރިކުރުމަށް ވަގުތު ނަގާނެ ކަމަށް ނިޔާފު ވިދާޅުވި އެވެ.

ޕްރައިވެޓް އިންޝުއަރެންސް ދޭ މީހުންގެ އެންގުމަށް އެ ބަދަލު ގެނެސް ހިދުމަތް ދެމުން އައި ނަމަވެސް އިމަޖެންސީ ފަރުވާ ހޯދުމަށް އަންނަ މީހުންނަށް މިހާރެކޭ އެއްގޮތަށް، ބިލިންގެ ކުރިން ހިދުމަތްދޭނެ އެވެ.