ކޯލްޑް ސްޓޯރޭޖުގެ ކެޕޭސިޓީ 25،000 ޓަނަށް އިތުރު ކުރަނީ

މަސް ރައްކާ ކުރުމަށް ބޭނުންކުރާ ކޯލްޑް ސްޓޯރޭޖްގެ ކެޕޭސިޓީ 25،000 ޓަނަށް އިތުރު ކުރުމުގެ މަސައްކަތް ފަށާފައިވާ ކަމަށް ފިޝަރީޒް މިނިސްޓަރު އަހުމަދު ޝިޔާމް މިިއަދު ވިދާޅުވެއްޖެ އެވެ.

މަސް ރައްކާކުރުމަށް ބޭނުން ކުރާ ސްޓޯރޭޖްގެ ކެޕޭސިޓީއަކީ މިހާރު 8،500 ޓަނެވެ.

ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޝިޔާމް ވިދާޅުވީ، ސްޓޯރޭޖު ކެޕޭސިޓީ އެކަށީގެންވާ ވަރަށް ނެތުމުން ބޭނުންވާ އަގުގައި މަސް ބޭރުކުރުމަށް ގިނަ ދަތިތަކާއި ކުރިމަތިލާން ޖެހޭ ކަމަށެވެ.

ސަރުކާރުން އަމާޒު ހިފާފައި ވަނީ ރައީސް ޑރ. މުހައްމަދު މުއިއްޒުގެ ވެރިކަމުގެ ފަސް އަހަރު ނިމުމުގެ ކުރިން 25،000 ޓަނުގެ ކޯލްޑް ސްޓޮރޭޖު ރާއްޖޭގެ އެކި ސަރަހައްދުތަކަށް ބެހިގެންދާ ގޮތަށް ގާއިމް ކުރުމަށް ކަމަށް އޭނާ ވިދާޅުވި އެވެ.

"ސްޓޯރޭޖް ކެޕޭސިޓީ ނެތުމުން އަޅުގަނޑުމެންނަށް ނޯވޭ، އަޅުގަނޑުމެން ބޭނުން އަގެއްގައި މަސް ބޭރު ކުރެވޭކަށް. ރޯ މެޓީރިއަލްގެ ގޮތުގައި މަސް ބޭރުކުރަން އަލުގަނޑުމެންނަށް މަޖުބޫރުވެފައި މި އޮތީ. ކެޕޭސިޓީ ނެތުމުން މި ޖެހެނީ ބޭނޭ ވަރަކަށް ބޭރުކުރަން. އެހެންވެ މި ޖެހެނީ އަޅުގަނޑުމެން ބޭނުން ނެތަސް ބޭރުކުރަން އެ މީހުން ބުނި އަގެއްގައި،" މިނިސްޓަރު ވިދާޅުވި އެވެ.

ރާއްޖޭގެ ހުރިހާ ސަރަހައްދެއްގައި މަސް ރައްކާކުރެވޭނެ އިންތިޒާމުތައް ގާއިމުކުރުމަށް ކުރަމުން އަންނަ މަސައްކަތުގެ ތެރެއިން ދެކުނުގެ ހަތަރު ރަށެއްގައި 8،500 ޓަނުގެ މަސް ރައްކާކުރެވޭނެ އިންތިޒާމު ވެސް ކުރަމުން އަންނަ ކަމަށް ޝިޔާމް ވިދާޅުވި އެވެ.

ދެކުނުގައި މިހާރު ހުރި ސްޓޯރޭޖްތައް ބޮޑު ކުރުމުން:

- ގއ. ކޫއްޑޫ: 4،000 ޓަނުގެ މަސް ރައްކާ ކުރެވޭނެ

- ގދ. ފިޔޯރީ: 3،000 ޓަނުގެ މަސް ރައްކާ ކުރެވޭނެ

- ގދ. ތިނަދޫ: 1،000 ޓަނުގެ މަސް ރައްކާ ކުރެވޭނެ

- ސ. ހުޅުދޫ: 500 ޓަނުގެ މަސް ރައްކާ ކުރެވޭނެ

ޝިޔާމް ވިދާޅުވިގޮތުގައި، މެދުރާއްޖެތެރޭގެ ތިން ރަށެއްގައި ވެސް ސްޓޯރޭޖް ގާއިމް ކުރުމަށް ސަރުކާރުން ވަނީ ނިންމައިފަ އެވެ. އެއީ ފ. ނިލަންދޫގައި 1،500 ޓަނުގެ ފެސިލިޓީއެއް އަދި މ. މުލަކުގައި 500 ޓަނުގެ ފެސިލިޓީއެކެވެ.

ހއ. އިހަވަންދޫގައި 1،000 ޓަނުގެ މަސް ރައްކާކުރެވޭނެ ކެޕޭސިޓީ ގާއިމުކުރުމާއި މިފްކޯގެ އެންމެ ދުވަސްވީ ފެސިލިޓީ ކަމަށްވާ ޅ. ފެލިވަރުގެ ކެޕޭސިޓީ އަށް 4،000 ޓަނު އިތުރުކުރުމަށް ވެސް ނިންމާފައިވާ ކަމަށް މިނިސްޓަރު ވިދާޅުވި އެވެ.

ރާއްޖޭގައި މަސް ރައްކާކުރާ ކޯލްޑް ސްޓޯރޭޖްތައް މިހާރު ހުރީ ޅ. ފެލިވަރުގައި 750 ޓަނާއި ގއ. ކޫއްޑޫގައި 2،000 ޓަނާއި ސ. ހުޅުމީދޫގައި 1،500 ޓަނެވެ. ބޯޓުފަހަރުގައި ހުރި ކެޕޭސިޓީއާ އެކު، މުޅި ރާއްޖޭގައި މަސް ރައްކާކުރުމުގެ ކެޕޭސިޓީގެ ގޮތުގައި ހުުރީ 8،500 ޓަނެވެ.