އަރަބިއްޔާގެ މަސައްކަތް ލަސްވީ 80 މިލިއަން ސަލާމަތް ކުރަން ޖެހުމުން: މިނިސްޓަރު

އަރަބިއްޔާ ސްކޫލްގެ އާ އިމާރާތުގެ މަސައްކަތް ލަސްވެފައި ވަނީ އިތުރަށް 80 މިލިއަން ރުފިޔާ ހަރަދުކުރަން ޖެހި، އެ ފައިސާ ސަލާމަތް ކުރުމަށް ކަމަށް އެޑިއުކޭޝަން މިނިސްޓަރު ޑރ. އިސްމާއީލް ޝަފީއު މިއަދު ވިދާޅުވެއްޖެ އެވެ.

އަރަބިއްޔާ ސްކޫލްގެ އާ އިމާރާތުގެ މަސައްކަތް ލަސްވާ ސަބަބާ ގުޅޭ ގޮތުން، ރައްޔިތުންގެ މަޖިލިހުގެ މިއަދުގެ ޖަލްސާގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ ޒަމާނީ ފެންވަރަށް އަރަބިއްޔާ ސްކޫލްގެ އާ އިމާރާތް އެޅުމަށްޓަކައި ކޮންޓްރެކްޓަރާ މަޝްވަރާ ކުރެއްވި ކަމަށެވެ.

އެކަމަކު، މަޝްވަރާ ކުރެއްވި ނަމަވެސް ލިބުނު އަގު ވަރަށް ބޮޑު ކަމަށް އިސްމާއިލް ވިދާޅުވި އެވެ.

"އަޅުގަނޑުމެން މަސައްކަތްކުރީ ފުރަތަމަ 100 ދުވަހުގެ ތެރޭގައި އަމަލީ މަސައްކަތް ފައްޓަން. އެހެން ނަމަވެސް އެ ފެއްޓުމަށް އަޅުގަނޑުމެން ކުރި މަސައްކަތުން އަޅުގަނޑުމެންނަށް ގަބޫލު ކުރެވުނީ ގާތްގަނޑަކަށް ރައްޔިތުންގެ ފައިސާ އިން 80 އެތައް މިލިއަން ރުފިޔާ އަގު ބޮޑުކޮށް ކަން އެކަން ކުރަން ޖެހޭނީ،" މިނިސްޓަރު ވިދާޅުވި އެވެ.

އަރަބިއްޔާ ސްކޫލްގެ އާ އިމާރާތުގެ އަމަލީ މަސައްކަތް މި ވެރިކަމުގެ ފުރަތަމަ 100 ދުވަހު ފެށުމަށް ވައުދުވި ކަމަށާއި 80 މިލިއަން ރުފިޔާ ހަރަދުކުރާ ގޮތަށް އެ މަސައްކަތް ފެށި ނަމަ އެ ވައުދު ފުއްދޭނެ ކަމަށް މިނިސްޓަރު ވިދާޅުވި އެވެ. ނަމަވެސް އެއީ ރައްޔިތުންގެ ފައިސާ އަށް ވުމުން އެކަން އެގޮތަށް ނުކުރެއްވީ ކަމަށް ވިދާޅުވި އެވެ.

"ރައްޔިތުންގެ 80 މިލިއަން ރުފިޔާ ވަރު ސަލާމަތް ކުރުމަށްޓަކައި އެ ޑިލޭ އައީ. އަޅުގަނޑު ގަބޫލުކުރަނީ އެއީ ހަމަ ރަނގަޅު އެދެވިގެންވާ ޑިލޭއެއް ކަމަށް،" އިސްމާއިލް ވިދާޅުވި އެވެ.

އަރަބިއްޔާގެ ކުދިން މިހާރު ކިޔަވަމުން އަންނަ އިމާރާތުގައި އެ ކުދިންނަަށް އެއްވެސް ގެއްލުމެއް ނެތް ކަމަށާއި އެ ސްކޫލްގެ ބެލެނިވެރިންނަށް ހުރިހާ މައުލޫމާތެއް ހިއްސާ ކޮށްފައިވާ ކަމަށް ވެސް މިނިސްޓަރު ވިދާޅުވި އެވެ.

އަރަބިއްޔާ ސްކޫލްގެ އާ އިމާރާތުުގެ މަސައްކަތުގެ އަގު ދަށްކުރަން އަމިން ކޮންސްޓްރަކްޝަނާ އެކު އެއްބަސް ނުވެވުމުން، އެއްބަސްވުން ބާތިލް ކޮށްފައި ވަނީ މިދިޔަ ސެޕްޓެމްބަރު މަހު އެވެ.

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އަރަބިއްޔާގެ އާ އިމާރާތް ބާ ޖަމާލުއްދީން ހުރި ބިމުގައި ހަދަން އަމިން ކޮންސްޓްރަކްޝަނާ ހަވާލުކުރީ ސެޕްޓެމްބަރު 29، 2022 ގަ އެވެ. އެއީ 420 ދުވަހުގެ ތެރޭގައި ނިންމާ ގޮތަށެވެ. އޭރު އެ ކުންފުންޏާ އެކު އެ ސަރުކާރުން އެއްބަސްވީ 168.5 މިލިއަން ރުފިޔާއަށެވެ.

އެކަމަކު، ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެން، ނިންމެވީ ބާ ޖަމާލުއްދީން ހިމެނޭ ސަރަހައްދަކީ ޓްރެފިކް ވަރަށް ބޮޑަށް ތޮއްޖެހޭ އަދި ހަލަބޮލި ހިސާބަކަށް ވާތީ އެހެން ތަނަކަށް އަރަބިއްޔާގެ އާ އިމާރާތް ބަދަލުކުރާށެވެ. އެހެންވެ، މި ސަރުކާރުން ދެއްކީ ކުރީގެ ކުނިކޮށި ހުރި ބިން ކަމަށްވާ 381 ނަންބަރު ކޮށްޓެވެ. އެ ބިމަށް އަރަބިއްޔާގެ އާ އިމާރާތުގެ މަސައްކަތް ބަދަލުކޮށް، އެއީ އެ ސްކޫލް ދާއިމީ ބިން ކަމަށް ވެސް ރައީސް މުއިއްޒު ވަނީ ނިންމަވައިފަ އެވެ.