ހުޅުމާލޭ ބިމުގެ މައްސަލަ ހައްލުނުވެއްޖެ ނަމަ އެފްއޭއެމް ބަނގުރޫޓުވެދާނެ!

ގައުމީ ފުޓްބޯޅަ ސްކޫލް ހަދަން ހުޅުމާލެ އިން އެފްއޭއެމަށް ދީފައި އޮތް ބިމުގެ މައްސަލައިގައި އެޗްޑީސީން އެއްބާރުލުން ނުދީފިނަމަ އެފްއޭއެމް ބަންގުރޫޓް ވެއްޖެކަން ފީފާއިން އިއުލާންކޮށް އެހީ ދިނުން ހުއްޓާލަފާނެކަމުގެ ބިރު އެބައޮތް ކަމަށް، އެ އެސޯސިއޭޝަނުގެ ނޯމަލައިޒޭޝަން ކޮމިޓީގެ ޗެއާޕާސަން އަހްމަދު ޒުހޫރު ވިދާޅުވެއްޖެ އެވެ.

ހުޅުމާލޭ ފޭސް އެކަކުން، އެފްއޭއެމަށް ދޫކޮށްފައިވާ ބިމަށް ކުލި ނުދައްކާތީ، އެ ބިން އެ އެސޯސިއޭޝަނުގެ އަތުން ނެގުމަށް އެޗްޑީސީން ވަނީ ނިންމައިފަ އެވެ. އަދި އެ ބިމުން ވިޔަފާރީގެ ގޮތުގައި ދޫކޮށްފައިވާ ބައިން މީހުން ނެރެ އެތަން ހުސްކުރުމަށް އެފްއޭއެމަށް އެ ކުންފުނިން ވަނީ އަންގައިފަ އެވެ.

އެ ބިން އެފްއޭއެމް އަތުން އަތުލިކަން ހާމަކޮށް، އެ ތަން ހުސްކުރަން އެޗްޑީސީން އެންގީ ސެޕްޓެމްބަރު މަހު އެވެ. މުއްދަތު ފަހަނައަޅައި ދިއުމުން ވެސް ބިން ހުސްކޮށްފައިނުވުމުން، އެޗްޑީސީން ވަނީ، ފަހުގެ އިންޒާރުކަމަށް ބުނެ ހަތް ދުވަހުގެ ނޯޓިހެއް ނެރެ، އެ ލިޔުން ލެމިނޭޓްކޮށް ފެންނަ ގޮތަށް އެ ތަނުގައި ހަރުކޮށްފަ އެވެ.

އެ ބިމުން ވިޔަފާރީގެ ގޮތުގައި އެފްއޭއެމްގެ ކުރީގެ ލީޑާޝިޕުން ވަނީ ދިގު މުއްދަތަށް އެކި ފަރާތްތަކަށް، ކުއްޔަށް ދީފަ އެވެ.

"ބައެއް ކޮންޓްރެކްޓްތައް އެބަހުރި 40 އަހަރަށް ވެސް ހަދާފައި. 10،000 އަކަފޫޓްގެ ބިންތައް ވެސް ކުއްޔަށް ދީފަ ހުރީ. އެގްރިމެންޓްތައް ހުރި ގޮތުން އެތަންތަން އަތުލާނަމަ ބޮޑު ބަދަލެއް ދޭން ޖެހޭނެ. 8 ފަރާތަށް ކުއްޔަށް ދީފަ އެބަހުރި. އޭގެ ތެރެއިން އެންމެ ކުންފުންޏެއް ވެސް މައްސަލަ ހިފައިގެން ކޯޓަށް ހިނގައްޖެ ނަމަ އެފްއޭއެމުން އެ ކުންފުންޏަށް ބަދަލު ދައްކަން ޖެހޭ ފައިސާ 200 މިލިއަނާ ގާތް ކުރާނެ. (އެ ހުރިހާ ކުންފުންޏަކަށް ބަދަލު ދޭން ޖެހިއްޖެނަމަ) އެތަށް ސަތޭކަ މިލިއަނަކަށް އެފްއޭއެމް ދަރަނި އަރައިގެން ދާނެ،" ކަންބޮޑުވުންތަކާ އެކު ޒުހޫރު ވިދާޅުވި އެވެ.

ޒުހޫރު ވިދާޅުވީ ދެން އެހާހިސާބުން ފީފާ އަށް ފެންނާނީ ފީފާގެ މެންބަރު ގައުމަކަށް ރާއްޖޭގެ ވާތީ ރާއްޖޭގެ ފުޓްބޯޅަ އަލުން ކޮޅަށް ނަގަން މަސައްކަތް ކުރިޔަސް ދިވެހި ސަރުކާރަކުގެ އެ ވިސްނުމެއް ނެތްކަން ކަމަށެވެ.

"އެހާހިސާބުން ފީފާއިން ވެސް މި މަސައްކަތުން އަތްދޫކޮށްލާނެ. ދެން އިއުލާންކުރާނީ ލިކުއިޑިޓޭޝަނަށް އެފްއޭއެމް ހިނގައްޖެކަމަށް. އެހާހިސާބުން ފުޓްބޯޅަ ކުރިއަރުވަން އެއްވެސް އެހީއެއް ރާއްޖެއަކަށް ނުދޭނެ. ސަބަބަކީ ބަދަލު ދޭކަށް ފީފާއިން ފައިސާއެއް ނުދޭނެ."

ޒުހޫރު ވިދާޅުވީ، ހުޅުމާލޭގެ އެ ބިން އެފްއޭއެމްގެ އަތުން އަތުލަން ނިންމިކަން، އެޗްޑީސީން އެންގި ހިސާބުން އެކަމުގައި ލުއިގޮތްތަކެއް ހޯދުމަށް އެ ކުންފުންޏަށް އެކިފަހަރު މަތިން ސިޓީ ފޮނުވި ކަމަށެވެ.

"ކޮންމެގޮތެއްވިޔަސް މި ތަނަކީ އާއްމު ހާލަތުގައި ހިނގަހިނގާ އޮތް ތަނެއް ނޫން. އެ ހާލަތަށް ދިޔައީމަތާ ނޯމަލައިޒް ކުރަން ޖެހުނީ. މިތަނުގެ ހާލަތު އެޗްޑީސީގެ ބޭފުޅުންނަށް ވެސް ކިޔައިދޭން އަޅުގަނޑުމެން ބޭނުންވޭ. އެހެންވެ އެކަމުގައި ބައްދަލުކުރުމަށް އެދި ސިޓީތައް ފޮނުވާފައި ވާނީ،" އޭއެފްސީގެ ބައްދަލުވުމަށް ސްރީ ލަންކާގައި މި ވަގުތު ހުންނެވި ޒުހޫރު ވިދާޅުވި އެވެ.

"މުޅި ސަރުކާރުގެ ޝާމިލުވުން ނެތި މިހާލަތުން ރާއްޖޭގެ ފުޓްބޯޅައެއް ނުނެގޭނެ. އަޅުގަނޑުމެން ރާއްޖޭން އެބަޖެހޭ އެކަން ފީފާ އަށް ހާމަކޮށްދޭން. އެ އިންޓަރެސްޓް މުޅި ސަރުކާރުން ހާމަކޮށްގެން ނޫނީ މި މަސައްކަތެއް ނުކުރެވޭނެ."

ފުޓްބޯޅަ ސްކޫލަށް ފީފާގެ އެކި ޕްރޮޖެކްޓްތަކުން ހަރަދުކޮށްދޭނެކަމުގެ ޔަގީންކަން، ފީފާގެ ރައީސް ޖިއާނީ އިންފަންޓީނޯ މިދިޔަ މަހު ދެއްވާފައިވާ ކަމަށް ޒުހޫރު ވަނީ ކުރިން ވިދާޅުވެފަ އެވެ. އޭނާ ވިދާޅުވީ އެ ޔަގީންކަން ފީފާ އާއި އޭއެފްސީގެ އެންމެ އިސްވެރިން ދެއްވާފައި ވަނިކޮށް އެ ބިން އެފްއޭއެމް އަތުން ގެއްލިގެން ގޮސްފިނަމަ، އެއީ ދެން ދުވަހަކު ވެސް ފޫނުބެދޭނެ ގެއްލުމަކަށް ވާނެ ކަމަށެވެ.

އިންފަންޓީނޯގެ އިތުރުން އޭއެފްސީގެ ރައީސް ޝައިހް ސަލްމާން ބިން އިބްރާހިމް އަލް ހަލީފާ އެ ޔަގީންކަން ދެއްވީ މިދިޔަ މަހު ފަހުކޮޅު ދެކުނު ކޮރެއާގައި ބޭއްވި އޭއެފްސީ ބައްދަލުވުމުގަ އެވެ. އެ ބައްދަލުވުމުގެ ހަވާސާގައި ޒުހުރު ވަނީ އެ ދެ ބޭފުޅުންނާ ވަކިވަކިން ބައްދަލު ކުރައްވައިފަ އެވެ.

"ފީފާ، އޭއެފްސީގެ އެހީތެރިކަން ދެއްވާނެކަމުގެ ޔަގީންކަން ދެއްވާފައިވާ ވަގުތެއްގައި އެ ބިން އެފްއޭއެމަށް ގެއްލިއްޖެނަމަ ދެން ހީއެއްނުވޭ އެފަދަ ޕްރޮޖެކްޓަކަށް ރާއްޖެއަށް ދެން އެހީ ލިބޭނެހެނެއް ވެސް،" ޒުހޫރު ވިދާޅުވި އެވެ.

އެފްއޭއެމްގެ ކުރިގެ ލީޑާޝިޕްގެ ދައުރުގައި ފައިސާ އަށް ހިޔާނާތްތެރިވިކަމުގެ ތުހުމަތު އަމާޒުވުމުން، ފީފާއިން ވަނީ ބައެއް ދާއިރާތަކުން ދޭ ފަންޑު ރާއްޖެ އަށް ދިނުން ހުއްޓާލައިފަ އެވެ. އެކަމަކު ޒުހޫރު ވިދާޅުވި ގޮތުގައި އެ ހާލަތުން އަރައިގަތުމަށް ނޯމަލައިޒޭޝަން ކޮމިޓީން ކުރަމުންދާ މަސައްކަތަށް ބަލައި، ހިފެހެއްޓިފައި ހުރި ފަނޑުތައް ރާއްޖެ އަށް ދިނުމުގެ މަރުހަލާ އަށް މިހާރު އާދެވިފައިވާ ކަމަށެވެ.

"ލަންކާގައި ވެސް މި ވަގުތު މިހުރީ އޭއެފްސީގެ ފައިނޭންސް ކޮންފަރެންސެއްގައި. އަޅުގަނޑުމެންގެ ޕްރޮގްރެޝަނަށް ބަލައި ކޮންޓްރޯލް ފައިނޭންސްގެ ސްޓެޓަސް އަށް ރާއްޖެ ވަނީ މިހާރު ލައިދީފައި. މާނަ އަކީ ހިފެހެއްޓިފައި ހުރި ފަންޑުތައް މަޑުމަޑުން އަން ލޮކް ކުރެވޭނެޔޭ،" ޒުހޫރު ވިދާޅުވި އެވެ.

"ކޮންމެ އަހަރަކު ކުޅެން ޖެހޭ މެޗުތަކުގެ އަދަދު ވެސް ހަމަކޮށް އެ ދާއިރާތަކުގެ ފައިނޭންސް ވެސް އަންނަ އަހަރަށް ލިބޭތޯ މަސައްކަތް ކުރަމުން އަޅުގަނޑުމެން މި އަންނަނީ. އަންހެން ޓީމަށް ވެސް އަދި އިތުރު އެއް މެޗު މި އަހަރު ހޯދީމާ އަންނަ އަހަރުގެ އަންހެން ފުޓްބޯޅައިގެ ފަންޑު ވެސް އިރާދަކުރެއްވިއްޔާ ލިބޭނެ."