ގޯލްޑް ކަޕް ބާއްވަން އެފްއޭއެމުން ހުރަސް އަޅަނީތަ؟

އަމިއްލަ ފަރާތެއް ކަމަށްވާ 'ނައިންޓީ ޕްލަސް' އިން ރާއްޖޭގެ ރަށްރަށަށް ހުޅުވާލައިގެން މާލޭގައި ބާއްވަން ރާވަމުން އަންނަ ގޯލްޑް ކަޕް ބާއްވަން ހުރަސް އެޅިދާނެ ފަދަ ގޮތަށް އެފްއޭއެމް އިން އެހެން މުބާރާތެއް އިއުލާނުކޮށް، މުވައްޒަފުންނަށް އެންގުންތަކެއް އަންގައިފި އެވެ.

މަޝްހޫރު ދެ ކޯޗުން ކަމަށްވާ މުހައްމަދު ޝާޒްލީ އާއި އަލީ ނިޝްތާރު އިސްވެ ތިބެ އިންތިޒާމުކުރާ ގޯލްޑް ކަޕަކީ، ސްޕޯޓްސް މިނިސްޓްރީގެ އެންޑޯޒްމަންޓާ އެކު، މި މަހުގެ 20 އިން ޑިސެމްބަރު 25 އަށް ގަލޮޅު ދަނޑުގައި ބާއްވާ މުބާރާތެކެވެ.

އެ މުބާރާތަށް އެފްއޭއެމުން އެއްވެސް ކަހަލަ ރަސްމީ އެންޑޯސްމަންޓެއް ދީފައެއް ނުވެ އެވެ. އެހެން އެކަން އޮއްވާ އެފްއޭއެމުން އަންގާރަ ދުވަހު އެތަނުގެ މުވައްޒަފުންނަށް ފޮނުވި އިންޓާނަލް މެމޯއެއްގައި ވަނީ މި މަހުގެ 21 ވަނަ ދުވަހު މޯލްޑިވްސް ސޮކާ މޭޓްސްއާ ގުޅިގެން 12 އަހަރުން ދަށް، 14 އަހަރުން ދަށް، އަދި 16 އަހަރުން ދަށަށް ހާއްސަކޮށްގެން 'ދިވެހި ޔޫތު ލީގު' ގެ ނަމުގައި މުބާރާތެއް ފަށާނެ ކަމަށް ބުނެފަ އެވެ.

ރާއްޖޭގެ މަޝްހޫރު ފުޓްބޯޅަ އެކަޑަމީއެއް ކަމަށްވާ ސޮކާ މޭޓްސްއާ ގުޅިގެން އެ ލީގު ބާއްވާން އެފްއޭއެމުން ނިންމާފައި އޮތީ މާލެ ސަހަރައްދުގައި އޮތް އެންމެ ފެންވަރު ރަނގަޅު ތިން ދަނޑު ކަމަށްވާ މާލޭ ގަލޮޅު ދަނޑާއި، ހެންވޭރު ދަނޑު، އަދި ހުޅުމާލޭ ސިންތެޓިކް ޓްރެކުގައި އޮންނަ ދަނޑުގަ އެވެ.

އެ މެމޯގައި އެފްއޭއެމުން ވަނީ އެ އެސޯސިއޭޝަނުގެ އެއްވެސް ބައިވެރިވުމެއް ނެތި ކުރިއަށްދާ މުބާރާތްތަކާއި، ލީގުތަކުގައި އެސޯސިއޭޝަނުގެ ހުއްދަ ނުހޯދާ އެސޯސިއޭޝަނުގެ އެއްވެސް މުވައްޒަފެއް، ރެފްރީއެއް، އަދި ކޯޗެއް ބައިވެރިނުވުމަށް އަންގައިފަ އެވެ.

އެފްއޭއެމުން މިއަދު މީޑިއާއާ ހިއްސާކުރި ޔޫތު ދިވެހި ލީގުގެ ތާވަލު އޮތްގޮތުން މުބާރާތް ކުރިއަށްދާނީ ނޮވެމްބަރު 21 އިން އަންނަ އަހަރުގެ ޖެނުއަރީ 16 އަށެވެ. މީގެ ތެރެއިން ނޮވެމްބަރު 21 އިން ނޮވެމްބަރު 30 އާ ދެމެދު މެޗުތައް އޮންނާނީ ހެންވޭރު ދަނޑުގަ އެވެ. އޭގެ ފަހުން އޮންނާނީ ތިން ދަނޑުގަ އެވެ.

ގޯލްޑް ކަޕަކީ ރާއްޖޭގެ ރަސްމީ ލީގު ސިސްޓަމުގެ ބޭރުން، ބާއްވާ މުބާރާތެކެވެ. މިއީ ފުޓްބޯޅައިގެ ފޯރި ދަށްވެފައިވާތީ އަލުން ގެނައުމަށްޓަކައި، ބާއްވަން ނިންމާފައިވާ ސިލްސިލާ މުބާރާތެކެވެ. ގޯލްޑް ކަޕުގައި މާލެ، އާއި އައްޑޫ، އާއި، ބ. އޭދަފުށި ފަދަ ފުޓްބޯޅައިގެ ވަރުގަދަ ނަންތައް ހިމެނޭހެން 22 ރަށަކުން ޓީމުތައް ވާދަކުރެ އެވެ.

މުބާރާތުގެ ހުރިހާ މެޗެއް ޕީއެސްއެމްގެ ޔެސް ޓީވީން ވަގުތުން ގެނެސް ދިނުމަށް ވަނީ ހަމަޖެހިފަ އެވެ. އަދި މެޗުގެ ޕްރީ މެޗު ޝޯ އާއި ޕޯސްޓް މެޗު ޝޯ ވެސް ޓީވީން ގެނެސް ވަނީ ރާވައިފަ އެވެ.

އެފްއޭއެމް މިހާރު ހިންގަނީ ފީފާ އިން އައްޔަންކޮށްފައިވާ ނޯމަލައިޒޭޝަން ކޮމިޓީއަކުންނެވެ. މިއީ އެ އެސޯސިއޭޝަނުގެ ކުރީގެ ރައީސް ބައްސާމް އަދީލް ޖަލީލުގެ ދައުރުގައި ހިޔާނާތާއި، މަނީ ލޯންޑަރިންގެ މައްސަލަތައް ފެންމަތިވުމާއި، މުބާރާތްތައް ނުބޭއްވި، ފުޓްބޯޅަ އެއްކޮށް ބޮއްސުލުމުން، މައްސަލަ ހައްލުކުރަން އައްޔަންކުރި ކޮމިޓީއެކެވެ. މައިގަނޑު ޒިންމާއަކީ އިންތިހާބަކާ ހަމަޔަށް ގެންދިއުމާއި، ގެއްލުނު ފައިސާ ހޯދުމާއި، އެ މުއްދަތުގައި ދުވަހުން ދުވަހަށް އެސޯސިއޭޝަން ހިންގުމެވެ.