ކަނޑުމަގުން ގެނައި 3.3 ކިލޯގެ ޑްރަގް އަތުލައިގެންފި

ކަނޑުމަގުން ރާއްޖެ އެތެރެކުރަން އުޅުނު 3.3 ކިލޯގްރާމްގެ ޑްރަގް ކަސްޓަމުން އަތުލައިގެންފި އެވެ.

ކަސްޓަމްސްއިން ބުނީ ޑްރަގް އަތުލައިގަތީ، ރާއްޖެއަށް އެންމެ ގިނައިން މުދާ އެތެރެކުރާ، މާލޭ ކޮމާޝަލް ހާބަރުން މިދިޔަ އާދީއްތަ ދުވަހުކަމަށެވެ.

އަތުލައިގަތް ޑްރަގުގެ ތެރޭގައި ހިމެނެނީ 2،282 ގްރާމްގެ ކެނެބިސް އާއި 1،038 ގްރާމްގެ ކެތިނޯން އެވެ.

މިދިޔަ މަހުގެ 31 ވަނަ ދުވަހު ވެސް ކަސްޓަމުން ވަނީ ކަނޑުމަގުން ރާއްޖެ އެތެރެ ކުރަން އުޅުނު 5.9 ކިލޯގެ ޑްރަގް އަތުލައިގެންފަ އެވެ. އޭގެތެރޭގައި ވެސް ހިމެނެނީ ކެނެބިސް އަދި ކެތިނޯން އެވެ.

ވައިގެ މަގުން އެތެރެކުރާ މަސްތުވާތަކެތި ވެސް މި ފަހުން ގިނަ އަދަދަކަށް އަތުލައިގެންފައިވެ އެވެ. އަދި ޕޯސްޓް މެދުވެރިކޮށް ވެސް އެކި ފާޑުގެ ޑްރަގް އެތެރެކުރާ މައްސަލަ މިހާރު ބޮޑެވެ.