ގއ. ނިލަންދޫ ފަރަށް އެފްއެސްއެމްގެ ތެޔޮ ބޯޓެއް އަރައިފި

ސަރުކާރުގެ ތެޔޮ ކުންފުނި، އެފްއެސްއެމްގެ ތެޔޮ ބޯޓެއް ގއ. ނިލަންދޫ ފަރަށް އަރައިފި އެވެ.

އެ ރަށު ކައުންސިލްގެ ރައީސް އިބްރާހިމް ނާސިހު "މިހާރު" އަށް ވިދާޅުވީ މިއަދު ހެނދުނުގެ ވަގުތެއްގައި ތެޔޮ ބޯޓު ފަރަށް އެރީ ނިލަންދޫގެ ހުޅަނގު އުތުރު ފަރާތަށް ކަމަށެވެ.

އެއީ ތެޔޮ ހުރި ބޯޓަކަށް ވާތީ ގެއްލުމެއް ލިބި ނުވަތަ ދަށުން ފަޅައިގެން ގޮސްފައިވޭތޯ ނުވަތަ ނޫންތޯ ބެލުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.

"ތެލާ އެކީ ވީމާ އަޅުގަނޑުމެން މި ބަލަނީ ފަޅައިގެން ދިޔަތޯ،" އޭނާ ވިދާޅުވި އެވެ.

ނާސިހު ވިދާޅުވި ގޮތުގައި ބޯޓު ވަރަށް ބޮޑަށް ފަރު މައްޗަށް އަރާފައިވާތީ ފުން ކުރަން އުނދަގޫވާނެ އެވެ. އެކަމަކު، އެ މަސައްކަތް ނުފަށާ ކަމަށް އޭނާ ވިދާޅުވި އެވެ.

އެ މައްސަލަ ކަމާބެހޭ ފަރާތްތަކަށް އަންގާފައިވާ ކަމަށާއި ނަމަވެސް އަދި އެއްވެސް ފަރާތަކުން އެ ސަރަހައްދުގައި ހަރަކާތްތެރި ނުވާ ކަމަށް ނާސިހު ވިދާޅުވި އެވެ.

މި ހާދިސާއާ ގުޅޭ ގޮތުން އެފްއެސްއެމްގެ ބަހެއް އަދި ނުލިބެ އެވެ.