ޑިމޮކްރެޓްސްގެ ރައީސަކަށް އިންތި، ނައިބަކަށް ވައްޑެ ހޮވިއްޖެ

ޑިމޮކްރެޓްސްގެ ރައީސަކަށް އިމްތިޔާޒު ފަހުމީ (އިންތި) އަދި ނައިބު ރައީސަކަށް މުހައްމަދު ވަހީދު (ވައްޑެ) ހޮވިއްޖެ އެވެ.

އެ ޕާޓީގެ އިސް ދެ މަގާމު ހުސްވީ، ރައީސްގެ މަގާމު ފުރުއްވަމުން ގެންދެވި ހެންވޭރު ހުޅަނގު ދާއިރާގެ ކުރީގެ މެމްބަރު ހަސަން ލަތީފު އަދި ނައިބު ރައީސްގެ މަގާމުގައި ހުންނެވި މުހައްމަދު ޝިފާޒު އެމްޑީޕީއާ ގުޅިވަޑައިގަތުމުންނެވެ.

އެހެންވެ، ޑިމޮކްރެޓްސްގެ ހުސްވެފައިވާ ރައީސާއި ނައިބު ރައީސްގެ މަގާމު ހޮވުމަށް އަންނަ މަހުގެ 15 ގައި ޕްރައިމަރީ ބާއްވަން ހަމަޖައްސައި، އެ މަގާމުތަކަށް ކުރިމަތިލާން މިދިޔަ ބުރާސްފަތި ދުވަހާ ހަމައަށް ހުޅުވާލި އެވެ.

ނަމަވެސް، އިންތިހާބާ ބެހޭ ކޮމެޓީން ވަނީ އެ މަގާމުތަކަށް އިތުރު މެމްބަރުން ކުރިމަތިލާފައި ނުވާތީ، އިންތި އާއި ވައްޑެ ހޮވުނީ ކަމަށް ނިންމައިފަ އެވެ.

އެގޮތަށް ކަނޑައެޅީ، ޑިމޮކްރެޓްސް އިން ބުނިގޮތުގައި ޕާޓީގެ ރައީސާއި ނައިބު ރައީސް ކަނޑައަޅާފައި މެމްބަރުންގެ މެދުގައި ނަގާ ސިއްރު ވޯޓަކުން ކަމަށް އަސާސީ ގަވައިދުގައި ބުންޏަސް، އިތުރު ކެންޑިޑޭޓަކު ކުރިމަތިނުލައިފި ނަމަ ކަން ކުރާނެ ގޮތެއް އަސާސީ ގަވާއިދުގައި ބަޔާންކޮށްފައިނުވާތީ އެވެ.

އެކަމާ ގުޅިގެން އިންތިހާބާ ކޮމެޓީން މި ފަހަރު ވެސް ނިންމީ، ޕާޓީގެ ފިރިހެން ނައިބު ރައީސަކު ހޮވުމަށް ބޭއްވި އިންތިހާބުގައި އަމަލުކުރި އުސޫލާ އެއްގޮތަށް ކުރިއަށް ގެންދިއުމަށެވެ.

އެ ފަހަރު ކޮމެޓީން ނިންމީ ޕާޓީގެ ފިރިހެން ނައިބު ރައީސް އަދި ގިނަ ދާއިރާތަކެއްގެ ރައީސުން ހޮވުމަށް ބޭއްވި އިންތިހާބުގައި ކޮންމެ މަގާމަކަށް ވެސް އެންމެ ކެންޑިޑޭޓެއް ކުރިމަތިލުމުން އެ ކެންޑިޑޭޓު ހޮވުނީ ކަމަށެވެ.

ޑިމޮކްރެޓްސްގެ އަސާސީ ގަވާއިދު ބުނާ ގޮތުން، އެ ޕާޓީގެ ރައީސްގެ މަގާމު ހުސްވެއްޖެ ނަމަ، ވަގުތީގޮތުން ރައީސްގެ މަސްއޫލިއްޔަތުތައް އަދާކުރަން ޖެހޭނީ ނައިބު ރައީސުންގެ ތެރެއިން ބޭފުޅެކެވެ.

ނައިބު ރައީސުންގެ ތެރެއިން ވަގުތީ ގޮތުން ރައީސްގެ ޒިންމާތައް މިވަގުތު އަދާ ކުރައްވަނީ މަޑަވެލި ދާއިރާގެ ކުރީގެ މެމްބަރު ހުސެއިން ފިރުޝާނެވެ.