އަހަރީ ފީ އާއި ޖޫރިމަނާތައް ބަހާލައިގެން ދައްކަން 58 މީހަކު ހުށަހަޅައިފި

އެއްގަމު އުޅަނދާއި ކަނޑު އުޅަނދުފަހަރާ ގުޅޭ ގޮތުން ދައްކަން ޖެހޭ އަހަރީ ފީ އާއި ޖޫރިމަނާތައް ބަހާލައިގެން ދައްކަން ހުޅުވާލި ފުރުސަތުގައި 58 މީހަކު އެކަމަށް ކުރިމަތިލައިފި އެވެ.

ޓްރާންސްޕޯޓް މިނިސްޓްރީން ބުނީ މަހުން މަހަށް ބަހާލައިގެން ފައިސާ ދައްކަން 58 މީހަކު އެޕްލިކޭޝަން ހުށަހަޅާފައިވާ ކަމަށާއި އޭގެ ތެރެއިން 20 އެޕްލިކޭޝަނަކަށް މިހާރު ހިދުމަތް ފޯރުކޮށްދީފައިވާ ކަމަށެވެ.

އެކަމަށް އެދި ހުށަހަޅާ ފޯމުގައިވާ ގޮތުން މަހުން މަހަށް ބަހާލައިގެން ފައިސާ ދެއްކޭނީ ނުދައްކާ ހުރި ފައިސާގެ އަދަދު 5،000ރ. އަށް ވުރެ އިތުރު ނަމަ އެވެ. އަދި އެ ފައިސާއަކީ ދައްކަން ޖެހޭ މުއްދަތު ހަމަވެފައިވާ ފައިސާއަށް ވުމާ އެކު ކުރިން ބަހާލައިގެން ފައިސާ ދެއްކުމުގެ ފުރުސަތު ލިބިފައިވާ މީހަކަށް ނުވުން ހިމެނެ އެވެ.

މިނިސްޓްރީން ބުނި ގޮތުގައި ބަހާލައިގެން ފައިސާ ދެއްކުމަށް އެދޭ މީހާއަކީ އުޅަނދުގެ ވެރިފަރާތަށް ވާން ޖެހެ އެވެ.

ކޮމިޓްމަންޓް ޕޭމަންޓާއި އިންސްޓޯލްމަންޓުގެ އަދަދު:

- 5،000-10،000ރ. ދައްކަން ޖެހޭ ނަމަ ކޮމިޓްމަންޓް ޕޭމަންޓުގެ ގޮތުގައި 18 ޕަސެންޓް ދެއްކުން. އެ ފައިސާ ބަހާލައިގެން ދެއްކޭނީ 10 މަހުން.

- 10،001-30،000ރ. ދައްކަން ޖެހޭ ނަމަ، 12 މަސް ދުވަސް ފައިސާ ދައްކަން ލިބޭ. ކޮމިޓްމަންޓް ޕޭމަންޓަކީ 15 ޕަސެންޓް.

- 30،001-50000ރ. އާ ހަމައަށް ފައިސާ ދައްކާ ނަމަ، 14 މަސް ލިބޭނެ. ކޮމިޓްމަންޓް ޕޭމަންޓަކީ 15 ޕަސެންޓް.

- 50،001-75،000ރ. އާ ހަމައަށް ފައިސާ ދައްކަން ޖެހޭ ނަމަ، 16 މަސް ތެރޭގައި ފައިސާ ދައްކަން ޖެހޭ. ކޮމިޓްމަންޓް ފީއަކީ އޭގެ 15 ޕަސެންޓް

- 75،001-100،000ރ. އާ ދެމެދުން ފައިސާ ދައްކަންޖެހޭ ނަމަ، 18 މަސް ތެރޭގައި ފައިސާ ދައްކަންޖެހޭ. 15 ޕަސެންޓް ކޮމިޓްމަންޓް ފީގެ ގޮތުގައި ދައްކަން ޖެހޭ.

ޓްރާންސްޕޯޓް މިނިސްޓްރީން ބުނި ގޮތުގައި 100،000ރ. އާއި 400،000 އާ ދެމެދުގެ އަދަދަކުން ފައިސާ ދައްކަން ޖެހޭ ފަރާތްތަކަށް އެ ފައިސާ ދައްކަން 20 މަހާއި 28 މަސް ދުވަހުގެ މުއްދަތެއް ލިބޭނެ އެވެ. އެ ފަރާތްތަކުން ކޮމިޓްމަންޓް ފީގެ ގޮތުގައި 10 ޕަސެންޓު ދައްކަން ޖެހެ އެވެ.

ހަތަރު ލައްކަ ރުފިޔާ އިން ފެށިގެން ތިން މިލިއަނާ ހަމައަށް ފައިސާ ދައްކަން ޖެހޭ ފަރާތްތަކަށް ގާތްގަނޑަކަށް ތިން އަހަރުގެ މުއްދަތެއް ލިބެ އެވެ. އެ ފަރާތްތަކުން ކޮމިޓްމަންޓް ފީގެ ގޮތުގައި ފަސް ޕަސެންޓް ދައްކަން ޖެހޭ ކަމަށް މިނިސްޓްރީން ބުންޏެވެ. އަދި ތިން މިލިއަނަށް ވުރެ ގިނަ ފައިސާ ދައްކަން ޖެހޭ ފަރާތްތަކަށް ވެސް ކޮމިޓްމަންޓް ޕޭމަންޓުގެ ފަސް ޕަސެންޓާ އެކު ގާތްގަނޑަކަށް ތިން އަހަރު [42 ހަފުތާ ތެރޭގައި] ފައިސާ ދައްކަންޖެހެ އެވެ.

ބަހާލައިގެން ފައިސާ ދައްކަން ލުޔެއް ދިނަސް މުއްދަތަށް ކޮމިޓްމަންޓް ފީ ނުދައްކާ ނަމަ، ފޯމު ބާތިލުވާނެ އެވެ. އަދި އެ މީހުންނަށް ބަހާލައިގެން ފައިސާ ދެއްކުމުގެ ފުރުސަތު ވެސް ގެއްލޭނެ އެވެ.

އަހަރީ ފީ އާއި ޖޫރިމަނާތައް ބަހާލައިގެން ދައްކަން ފުރުސަތު ދިން އިރު ބޮޑެތި އަދަދުތަކުން ޖޫރިމަނާ ދައްކަން ޖެހި، ފައިސާ ނުދައްކާ މައްސަލަ ބޮޑެވެ.

މިދިޔަ ރިޔާސީ އިންތިހާބުގެ ތެރޭގައި އޭރުގެ ރައީސް އިބްރާހިމް މުހައްމަދު ސޯލިހު ވެސް ވަނީ ފަސް އަހަރުގެ ހުރިހާ ޕާކިން ސްޓިކާތަކުގެ ޖޫރިމަނާތައް މާފުކޮށްދެއްވައިފަ އެވެ. މާފުކޮށް ދިނީ ނޮވެމްބަރު 17، 2018 އިން ފެށިގެން 2023 ގެ އޮކްޓޫބަރު މަހުގެ ފަސް ވަނަ ދުވަހާ ހަމައަށް ކޮށްފައިވާ ޕާކިން ޖޫރިމަނާތަކެވެ.

ޓްރެފިކް އުސޫލުތަކާ ހިލާފުވެގެން ކޮށްފައިވާ ޖޫރިމަނާތައް މާފުކޮށްދޭން އޭރު ނިންމީ އެކަމަށް ހާއްސަކޮށްފައިވާ ޕްރޮގްރާމެއްގައި ބައިވެރިވާ މީހުންނަށެވެ. އެއީ ޓްރެފިކާ ގުޅޭ ގަވާއިދުތަކާއި އިޖުތިމާއީ އެހެން މައްސަލަތަކަށް ހޭލުންތެރިކުރުމަށް ފުލުހުން ފަރުމާކޮށް ކަނޑައަޅާފައިވާ 20 ގަޑިއިރުގެ ޓްރެއިނިން ޕްރޮގްރާމެކެވެ.

އެކަމަކު 2023 ގެ ސެޕްޓެމްބަރު ފަހުކޮޅުގައި ޕްރޮގްރާމުގައި ބައިވެރިވާން ހުޅުވާލިޔަސް އެ ޕްރޮގްރާމަށް ވީގޮތެއް ނޭނގެ އެވެ.